@kaolyjankie: បណ្តានាយកប្រតិបត្តិនៃក្រុមហ៊ុនថាមពលយក្សសកលលោកបានលើកឡើងនៅក្នុងវេទិកាថាមពល Energy Intelligence Forum នាទីក្រុងឡុងដ៍ថា បរិមាណប្រេងឆៅនៅក្នុងស្តុកពាណិជ្ជកម្មដែលអាចទាញយកមកប្រើប្រាស់បានក្នុងទីផ្សារសកលលោកកំពុងតែថយចុះដល់កម្រិតប្រកាសអាសន្ន។ ស្ថានភាពនេះបានធ្វើឲ្យទីផ្សារថាមពលសកលកាន់តែងាយរងគ្រោះ និងកំពុងជម្រុញឲ្យតម្លៃប្រេងហក់ឡើងខ្ពស់។ រដ្ឋាភិបាលនៃប្រទេសនានា រួមជាមួយក្រុមហ៊ុនថាមពលធំៗ បានខិតខំដកប្រេងចេញពីស្តុកបម្រុង ដើម្បីសម្រាលសម្ពាធលើទីផ្សារដែលកំពុងជួបប្រទះការរំខានដល់ខ្សែច្រវាក់ផ្គត់ផ្គង់យ៉ាងធ្ងន់ធ្ងរ ដោយសារឥទ្ធិពលនៃសង្គ្រាមនៅតំបន់មជ្ឈិមបូព៌ា និងអ៊ុយក្រែន។ លោក Amin Nasser នាយកប្រតិបត្តិ (CEO) នៃក្រុមហ៊ុនប្រេងរដ្ឋអារ៉ាប៊ីសាអ៊ូឌីត Saudi Aramco បានថ្លែងថា៖ «បច្ចុប្បន្ន ស្តុកប្រេងពាណិជ្ជកម្មនៅលើពិភពលោកនៅសល់តិចជាង 6 ប៊ីលាន (ពាន់លាន) បារ៉ែលប៉ុណ្ណោះ ហើយភាគច្រើននៃចំនួននេះមិនអាចទាញយកមកប្រើប្រាស់ក្នុងអនុវត្តស្តែងបានឡើយ ដែលធ្វើឲ្យប្រព័ន្ធផ្គត់ផ្គង់ជួបការលំបាកយ៉ាងខ្លាំង»។ លោកបានបន្ថែមថា ចាប់តាំងពីដើមឆ្នាំនេះ ក្នុងអំឡុងពេលវិបត្តិនៅមជ្ឈិមបូព៌ា ប្រេងជាង 1 ប៊ីលានបារ៉ែលត្រូវ បានបញ្ចេញពីស្តុកពាណិជ្ជកម្មនៅលើដី ដើម្បីទប់ទល់នឹងស្ថានការណ៍ ដែលនេះជាឧបករណ៍ចុងក្រោយបង្អស់ដែលគេអាចប្រើប្រាស់បាន។ ជាមួយគ្នានេះ ទីភ្នាក់ងារថាមពលអន្តរជាតិ (IEA) កំពុងរៀបចំផែនការបញ្ចេញប្រេងឆៅ និងប្រេងម៉ាស៊ូតចំនួន 100 លានបារ៉ែលបន្ថែមទៀត ដើម្បីជួយសម្រាលការកើនឡើងយ៉ាងកំហុកនៃតម្លៃប្រេងម៉ាស៊ូត។ យោងតាមទិន្នន័យពី IEA តម្រូវការប្រេងសរុបនៅលើពិភពលោកបច្ចុប្បន្នមានប្រមាណ 102 លានបារ៉ែលក្នុងមួយថ្ងៃ។ លោក Mike Wirth នាយកប្រតិបត្តិនៃក្រុមហ៊ុន Chevron បានគូសបញ្ជាក់ថា ការបាត់បង់ស្តុកប្រេងបម្រុងបានធ្វើឲ្យទីផ្សារបាត់បង់លំនឹង និងជម្រុញឲ្យតម្លៃប្រេងមានកម្រិតទាបបំផុត (Price Floor) កាន់តែខ្ពស់ជាងមុន។ បណ្តាប្រធានក្រុមហ៊ុនបានព្យាករណ៍ថា ភាពច្របូកច្របល់ក្នុងទីផ្សារប្រេងនឹងបន្តប្រឈមមុខហួសពីឆ្នាំមុខទៀត ដោយសារតែការបំពេញស្តុកបម្រុងឡើងវិញត្រូវចំណាយពេលច្រើនឆ្នាំ។ បច្ចុប្បន្ន ស្តុកប្រេងបម្រុងយុទ្ធសាស្ត្ររបស់សហរដ្ឋអាមេរិក (U.S. Strategic Petroleum Reserve) បានធ្លាក់ចុះដល់កម្រិតទាបបំផុតមិនធ្លាប់មានគិតចាប់តាំងពីខែតុលា ឆ្នាំ 1982 មក។ លើសពីនេះ ស្តុកឧស្ម័នធម្មជាតិនានាក៏កំពុងជួបប្រទះការខ្វះខាតដូចគ្នា ដែលអាចធ្វើឲ្យតម្លៃប្រេង និងឧស្ម័នហក់ឡើងកាន់តែខ្លាំង ប្រសិនបើរដូវរងាខាងមុខមានភាពត្រជាក់ខ្លាំងខ្លាំងខុសធម្មតា។ ប្រភព: Reuters

KaoLyJankie

Open In TikTok:

Region: KH

Wednesday 07 October 2026 00:49:20 GMT