ဘဝမှာ အရာတော်တော်များများက နားလည်ပြီးမှ လက်ခံရတာမဟုတ်ဘူး။ လက်ခံပြီးမှ တဖြည်းဖြည်း နားလည်လာတာ။ တချို့ဆုံးရှုံးမှုတွေမှာ ဘာကြောင့်ဆုံးရှုံးရတယ်ဆိုတဲ့ အဖြေမရှိဘူး။ တချို့လူတွေက ဘာကြောင့် ကိုယ့်ဘဝထဲ ဝင်လာခဲ့သလဲဆိုတာ မသိရသေးခင် ပြန်ထွက်သွားကြတယ်။ တချို့အိပ်မက်တွေက ကိုယ်အရမ်းကြိုးစားခဲ့ပေမယ့် မဖြစ်လာဘူး။ တချို့အချိန်တွေမှာ ကိုယ်မှန်တယ်လို့ ယုံကြည်ခဲ့တဲ့အရာတောင် နောက်ဆုံးမှာ ကိုယ့်အတွက် မဟုတ်ခဲ့တာကို သိလာရတယ်။ အရာအားလုံးကို နားလည်အောင် ကြိုးစားနေရင် တစ်ခါတလေ ကိုယ့်ကိုယ်ကိုပဲ ပိုနာကျင်စေတတ်တယ်။ ဘာလဲဆိုတော့ တချို့အဖြေတွေဟာ အဲ့ဒီအချိန်မှာ ကိုယ်သိနိုင်တဲ့အရာ မဟုတ်သေးလို့ပဲ။ နားလည်ဖို့အတွက် အချိန်လိုတယ်။ ဒါထက်ပိုပြီး ကိုယ်ကိုယ်တိုင် ပြောင်းလဲလာဖို့ လိုတယ်။ ဒီနေ့ ကိုယ်မေးနေတဲ့ မေးခွန်းတစ်ခုဟာ နှစ်အနည်းငယ်ကြာပြီးတဲ့နောက်မှာ မေးခွန်းတောင် မဟုတ်တော့တာမျိုး ရှိတတ်တယ်။ အဖြေကို ရှာတွေ့သွားလို့ မဟုတ်ဘူး။ ကိုယ်ကိုယ်တိုင်က အဲ့ဒီအဖြေကို နားလည်နိုင်တဲ့လူ ဖြစ်လာလို့ပဲ ။ ဆုံးရှုံးမှုတစ်ခုက ကိုယ်ဘာကို တန်ဖိုးထားခဲ့သလဲဆိုတာ ပြလာတယ်။ ဝေးကွာမှုတစ်ခုက ဘယ်သူ့ကို ဘယ်လောက်အထိ ဆုပ်ကိုင်ထားခဲ့သလဲဆိုတာ ပြလာတယ်။ မအောင်မြင်မှုတစ်ခုက ကိုယ်တကယ်လိုချင်တာနဲ့ ကိုယ်လိုချင်တယ်ထင်တဲ့အရာ ဘာကွာသလဲဆိုတာ ပြလာတယ်။ နာကျင်မှုတစ်ခုက ကိုယ့်အတွင်းက ကိုယ်တောင် မသိခဲ့တဲ့ အားနည်းချက်တွေနဲ့ ခွန်အားတွေကို ပြလာတယ်။ အဲ့ဒီအချိန်မှာ ဘာကြောင့် ငါမှဒီလိုဖြစ်ခဲ့တာလဲ ဆိုတဲ့ မေးခွန်းကနေ ဒါက ငါ့ကို ဘာသင်ပေးခဲ့လဲ ဆိုတဲ့ မေးခွန်းအဖြစ် ပြောင်းသွားတယ်။ ဒါဟာ နားလည်လာခြင်းပဲ။ အရာတွေ ပြောင်းလဲသွားလို့ မဟုတ်ဘူး။ အဲ့ဒီအရာတွေကို ကြည့်နေတဲ့ ကိုယ်က ပြောင်းလဲလာလို့။ တချို့အဖြေတွေက စာအုပ်ထဲမှာ မရှိဘူး။ တစ်စုံတစ်ယောက်ရဲ့ စကားတွေ ထဲမှာလည်း မရှိဘူး။ ကိုယ်ကိုယ်တိုင် နေ့ရက်တွေကို ကုန်ဆုံးရင်း တဖြည်းဖြည်း ရလာတာ။ ဒီအခါမှာ သိလာမယ် ဘဝမှာ အရာအားလုံးကို နားလည်ပြီးမှ လက်ခံရတာ မဟုတ်ဘူး ဆိုတာ ။ တချို့အရာတွေက အရင်ဆုံး လက်ခံရတယ်။ ပြီးတော့ အချိန်ပေးရတယ်။ ဖြတ်သန်းရတယ်။ ပြောင်းလဲလာရတယ်။ ပြီးမှ ကိုယ့်ဘဝကို နားလည်စေတဲ့ အဖြေတစ်ခု ဖြစ်လာလိမ့်မယ်။ လက်ခံခြင်းက နားလည်ခြင်းရဲ့ နောက်ဆုံးအဆင့် မဟုတ်ဘူး။ တစ်ခါတလေ နားလည်ခြင်းဆီကို သွားရတဲ့ ပထမဆုံးခြေလှမ်းပဲ ။ #ရိပ်ငြိမ် - @yeik.nyain