السلام عليكم اني هُـدى وهاذي قصتي عائلتي متكونه مِن ام وأب وثلاث شباب واثنين اخوات مِن غيري اني.. ـــــــــــ2016 ـــــــــــ الصبح فزيت علىٰ صوت اختي الچبيره ضحى تسحب البطانيه مني وتصيح :- -هددى!يلاا گومي راح الوكت ولچ هددى. رفعت راسي مزعوجه اكثر شي أكرهه إذا واحد گعدني واني بعز نومتي نترت بيها.. -ما تشوفين واحد نااايم شبيج ضحى شبيج؟ ضحى :: بسرعه بلا حچي زايد. تأفأفت ضايجه وهيه طلعت مِن الغرفه گمت ادردم ورفعت شعري كبايه وگمت دايخه ومابيه حيل شفت الكل گاعد وگاعدين يتريگون بالصاله رفعوا رأسهم مِن فتحت باب الغرفه حچه اخوي.. ياسر :: دگولي صباح الخير صخمي. هدى :: ياسر ترا مالي خلك والله. فر ايده ما عاجبه تجاهلته ورحت غسلت ورجعت گعدت يمهم مطنگره وامي صبتلي گلاص چاي خلته گدامي تحچي وداد :: يلا يمه أكلي. هزيت راسي ساكته وبقيت اكل بدون صوت وهمه يحچون بينهم واني حرف ماحچيت بعدها طنگورة الصبح بيه رفعت راسي من ياسر يحچي موجه كلامه اليه.. -ادري شبيج معكمشه وجهج!. هدى :: كلش مالي خلك خليني ساكته ليش تريد تحچيني گوه؟. -هسه اني شگتلچ وانهديتي عليه!. گلبت عيوني ضايجه ومارديت عليه كملنه ريوك وضحى غسلت المواعين والولد طلعو وابوي هم طلع بقينه بس احنه النسوان بالبيت،گاعدين اني وامي بالصاله اجت سجى اختي الصغيره گعدت يمنه سجى :: يمه. -ها يمه. سجى :: والله ضوجه اخذينه لبيت عمو محمد. -هسه؟. سجى :: اي يمه عليج الله والله كلش ضوجه!. -خوش چا گومن بدلن بسرعه. هزت رأسها سجى فرحانه گامت ورجعت التفتت عليه وأشرت بايدها بمعنى گومي گمت وراها رحنه لـ ضحى بالمطبخ تنظف گنالها فرحت ويانه ورحنه ركض بدلنه وطلعنه للصاله شفنه امي گاعده تلبس بجواربها رفعت رأسها شافتنه رجعت دنگت تكمل لبس الجواريب وداد :: ضحى يمه رمشي على أبوچ خاطر نگله. سجى :: يمه ترا هذولي بيت عمي بصفنه؟ وداد:: ميخالف يمه،يلا ولج ضحى. أخذت التليفون ضحى ورمشت على ابوي لان امي ماعدها رصيد بس ترميشه رمشت مرتين وابوي دك انطته لامي بسرعه فتحت امي الخط تحجي.. وداد :: ها أبو حيدر..أكلك..نريد نروح لبيت محمد البنات ضايجات..خوش خوش..مع السلامه. هدى :: ها شگال؟. وداد :: كال روحن. فرحنه وكمنه طلعنه بيت عمي كلش قريب علينه يبعد أربع بيوت سدينه الباب ورانه وطلعنه نتمشه حتى بسرعه وصلنه دگينه الباب وطلع بوجهنه حسين بس شافنه دنك راسه سلم علينه وعلى امي وفتح الباب على حيله ووصار على جهه حسين :: تفضلن. دخلنه وهو سد الباب وطلع دخلنه لگينه مرة عمي گاعده على فراشها بالصاله لان توها جايبه وبتها الچبيره غزل گاعده يمها والبنيه الي توها جايبتها اسمها ازل عائلتهم صغيره حسين وغزل وازل وعمي ومرته ابتسمت مرة عمي مِن شافتنه گامت غزل على وجهه ابتسامه اجت سلمت علينه وسحبتني من أيدي رحنه لغرفتها وكعدنه نسولف غزل :: شلونج،مشتاقتلج. هدى :: والله حتى اني مشتاقتلج. غزل :: أوف أتمنى نعيش ببيت سويه للابد. هدى :: الله تخيلي يوميه اشوفج. وبقينه نسولف بعدين طلعنه يمهن بالصاله ورحت يم ازل اباوعلها واضحك جانت كلش صغيره وحلوه كالت مرة عمي تضحك.. انتصار :: ها حلوه؟. هدى :: تجنن فدوه. انتصار :: تزوجي وخلفي. هدى :: هاي شنوو عماتووو يا زواج غير اريد أكمل دراسه. انتصار :: عفيه الشطوره. دزيتها بوسه بالهوى وهيه تضحك ياربي شكد حبابه هاي المره تنوكل ابد ما تشيل حقد على احد وحنينه إلى ابعد درجه احبها كلش قريبه عليه اقرب وحده اليه من نسوان عمامي هيه وسبورتيه كلش بقينه شويه وبعدين رجعنه لبيتنه وامي وضحى راحن يسون غده واني وسجى كل وحده استلمت شغله تسويها قبل الغده اجو ابوي والولد..وگفت امي بباب المطبخ تسألهم -تردون غده؟. جاوب ابوي.. جاسم :: لا خلي ورا الصلاه. هزت رأسها وسألت اخواني وچانو نفس جواب ابوي رجعت امي للمطبخ تكمل الغده صارت صلاه صلينه وتغدينه.. للعصر چنه گاعدين كلنه بالصاله وفجأه فزينه على صوت الباب يندك بكل قوته!بقينه واحد يباوع للثاني مستغربين وداد :: يا ستار گوم يمه ياسر شوف شكو! طفر ياسر بسرعه يفتح الباب وسمعنه صوت بنيه تبچي وتشهگ بصوت عالي!دخل ياسر متخرذل شكله ودخلت ورا غزل بس حالتها يرثى لها خدودها حمر ومتزلغه ولابسه حجابها بـ إهمال وشعرها طالع وعيونها حمررر ودموعها على خدودها! گمنه كلنه من شفنه حالتها مستغربين ونفس الوكت خايفين عليها جاسم :: شصاير عمو؟ وشني هذا حااالج؟؟. الشهگه مچلوبه ببلعومها نطقت گوه وهيه تشهگ ولطمت على خدودها..نطقت خبر وچان مثل الصاعقه ونزلت على راسنه غزل :: ابوووي كتـ.ـل امييي. اكمل؟! - @ali2008ali26