@toplumtv: Azərbaycan prezidenti İlham Əliyev oktyabrın 12-də İranın daxili işlər naziri İsgəndər Momenini qəbul edib. Prezidentin rəsmi saytı yazır ki, görüşdə Azərbaycan və İran arasında təhlükəsizlik, eləcə də ictimai asayişin qorunması sahəsində əməkdaşlığın vacibliyi vurğulanıb. İlham Əliyev İran Daxili İşlər Nazirliyinin nümayəndə heyətinin Bakıya səfərini ikitərəfli təmasların davamı kimi qiymətləndirib. O, bir müddət əvvəl Azərbaycan nümayəndə heyətinin İrana səfər etdiyini və orada görüşlər keçirdiyini xatırladıb. İsgəndər Momeni Azərbaycana səfərindən məmnunluğunu bildirib və Azərbaycanın İran üçün “dost və qardaş ölkə” olduğunu deyib. O, İranda müxtəlif vaxtlarda baş verən zəlzələlər və meşə yanğınları zamanı Azərbaycanın göstərdiyi humanitar yardıma görə təşəkkür edib. Momeni bölgədə gərginliyin aradan qaldırılması istiqamətində aparılan danışıqlar barədə də Azərbaycan prezidentinə məlumat verib. İlham Əliyev Yaxın Şərqdə mövcud gərginliyin danışıqlar yolu ilə həll olunacağına ümid etdiyini bildirib. Görüş ölkədə hicablı şagird və müəllimlərin bəzi məktəblərə buraxılmaması ilə bağlı müzakirələrin fonunda keçirilib. Son günlər bir sıra məktəblərin qarşısında etirazlar baş tutub. Daxili İşlər Nazirliyi vahid geyim qaydalarına etiraz edən 37 nəfərin saxlanıldığını və faktla bağlı cinayət işi açıldığını bildirib. Məktəblərdə yeni geyim qaydalarını müdafiə edən dövlət mediasında isə bu proseslə bağlı “xarici təxribat” iddiaları səsləndirilib. Bu iddiaları irəli sürən bəzi şəxslər və media resursları etirazları, həmçinin hicab məsələsini İranla əlaqələndiriblər. Lakin bununla bağlı konkret sübut və ya rəsmi açıqlama təqdim olunmayıb.
