@altyb.dldwm: التجارب بتخليك تنضج من غير ما تفقد روحك، وتبقى عاقل من غير ما تبطّل فرفشة، وتعرف متين تكون جاد ومتين تقول: يا جماعة خلونا نعيش، الدنيا دي ما ناقصة وجع راس! 😂🤍 بمرور الوقت بتكتشف إنك ما محتاج تاخد كل حاجة بجدية، ولا كل موقف يستاهل منك تفكير ليلة كاملة، ولا كل زول لازم يفهمك ويقتنع بيك. في حاجات أحسن رد ليها إنك تضحك وتواصل يومك، وفي حاجات ما بتستاهل منك أكتر من: حصل خير، وربنا يسهل! 😂بتلقى نفسك بقيت أهدأ في ردود أفعالك، أقل اندفاعًا، وأكتر قدرة على إنك تميّز بين الحاجات المهمة والحاجات البتاخد أكبر من حجمها. حاجات زمان كانت ممكن تعكّر مزاجك بالأيام، هسع بتعدّيها وتفتش ليك عن حاجة حلوة تعملها بدل ما تضيّع يومك فيها. وبتتغيّر أولوياتك، وتكتشف إنو سعادتك ما مفروض تكون معلّقة على وجود زول، ولا على حصول حاجة معينة، ولا على إنو كل حاجة تمشي بالطريقة البتتمناها. مرات أحلى حاجة بتحصل ليك إنك تتصالح مع الواقع، وتبطل تحاول تتحكم في كل التفاصيل، وتدي نفسك فرصة تعيش اللحظة بدل ما تفضل مشغولة بالجايات والفاتت. والأجمل من ده كلو إنك بتتعلم تستغنى عن حاجات كنت فاكرها أساسية، وتستمتع بحاجات بسيطة ما كنت منتبه ليها، وتفهم إنو النضج ما معناه تبقى تقيل ومكشّر أربعة وعشرين ساعة، ولا إنك تفقد عفويتك وضحكتك عشان تثبت إنك كبرت. كبرنا وعرفنا إنو راحة البال رزق، وإنو الدلع حق، والضحكة ضرورة، وإنو الحياة مهما علّمتنا، ما مفروض تنسّينا نعيشها وننبسط بيها. 🥹♥️🌷🤍😇 عشان الكلام الجميل برضو عندو أصل.#كلنا #للأمانة #مليون_مشاهدة❤🔥🔥🔥🔥🔥🔥🔥
