⭕ შინაგან საქმეთა სამინისტროს მიგრაციის დეპარტამენტის თანამშრომლებმა გუშინ, 12 ოქტომბერს ირანელი აქტივისტი, მოჰამად მაჰდი რაჰიმიანი დააკავეს და დროებითი განთავსების ცენტრში გადაიყვანეს. შინაგან საქმეთა სამინისტრო აქტივისტის დაკავებას ადასტურებს და აცხადებს, რომ მის მიმართ ადმინისტრაციული საქმის წარმოება დაიწყო. უწყების ინფორმაციით, რაჰიმიანი საქართველოში 2022 წლის 22 აპრილს შემოვიდა, იმავე წლის 26 დეკემბერს კი საერთაშორისო დაცვის მოთხოვნით მიგრაციის დეპარტამენტს მიმართა. სამინისტროს განცხადებით, 2024 წლის 16 ივნისს რაჰიმიანს საერთაშორისო დაცვის მინიჭებაზე უარი ეთქვა, რადგან, „ამისთვის კანონით გათვალისწინებული საფუძველი არ არსებობდა“. გადაწყვეტილება მან სასამართლოში გაასაჩივრა, თუმცა თბილისის საქალაქო და სააპელაციო სასამართლოებმა გადაწყვეტილება ძალაში დატოვეს. შსს-ს განმარტებით, 2026 წლის 26 ივნისიდან რაჰიმიანს თავშესაფრის მაძიებლის სტატუსი შეუწყდა და საქართველოში ყოფნის სხვა სამართლებრივი საფუძველი აღარ ჰქონდა. მიუხედავად ამისა, მან ქვეყანა არ დატოვა, რის გამოც, დააკავეს. სამინისტრო აცხადებს, რომ რაჰიმიანს უფლება აქვს, საქართველო ნებაყოფლობით დატოვოს და გაემგზავროს როგორც წარმოშობის, ისე მესამე ქვეყნის მიმართულებით. ირანელი აქტივისტის ცოლი „პუბლიკასთან“ საუბარში ქმრის დაკავებას იხსენებს. ამბობს, რომ მიგრაციის დეპარტამენტის თანამშრომლებმა მოჰამად მაჰდი რაჰიმიანი საცხოვრებელი სახლიდან წაიყვანეს. მისივე თქმით, მცირეწლოვანი შვილების გამო თვითონ არ დააკავეს, თუმცა ხელი მოაწერინეს დოკუმენტზე და მიგრაციის დეპარტამენტში გამოცხადება მოსთხოვეს. ქალი ამბობს, რომ ამ ეტაპზე არ იცის, რა გადაწყვეტილებას მიიღებენ მის საქმეზე. ის არ გამორიცხავს, რომ ქვეყნის დატოვებასთან დაკავშირებული განაცხადის გაკეთებაც მოუწიოს. ქალი შიშობს, რომ შესაძლოა ისიც დააკავონ და შვილები, რომლებიც საქართველოში სწავლობენ, მზრუნველის გარეშე დარჩნენ. - @publika.ge