ХАЛЫҚ ҮНІ ЕСКЕРІЛІП, АВТОБУС ҚАТЫНАСЫ ҚАЙТА ЖАНДАНДЫ Казталов ауданы тұрғындарының Орал қаласына қатынау мәселесі халықпен кездесулер барысында бірнеше мәрте көтеріліп, нәтижесінде аудан әкімдігінің қолдауымен Казталов–Орал бағытындағы автобус қатынасы қайта жанданды. Аталған бағыттың іске қосылуы аудан тұрғындары үшін маңызды. Өйткені облыс орталығына қатынау халықтың күнделікті тұрмысымен, әлеуметтік қажеттіліктерімен тығыз байланысты. Ендігі міндет – осы мүмкіндікті тиімді пайдаланып, жолаушыларға қолайлы әрі қауіпсіз қатынас қызметін қамтамасыз ету. Жолаушылар тасымалын «Сайхадденова У.И.» жеке кәсіпкерлігі жүзеге асырады. 49 орындық автобус белгіленген бағыт бойынша қатынайды. Қозғалыс уақыты – сағат 05:00-ден 15:00-ге дейін. Жол жүру ақысы ересектер үшін – 2 028 теңге, балалар үшін 1 014 теңге болып белгіленген. «Алтын алқа», «Күміс алқа» иегерлері мен бірінші топтағы мүгедектігі бар азаматтар тегін жүру құқығына ие. Казталов ауылында автобус мешіт алдынан жүрсе, Орал қаласында «Адал» сауда үйінің алдынан шығады. Билеттерді Оралдағы автопарктен, «Адал» сауда үйінен және Жәңгір хан сауда үйінен сатып алуға болады. Автобус қатынасының қайта жандануы мәселенің бір бөлігі ғана. Ең бастысы тұрғындардың осы мүмкіндікті пайдаланып, қауіпсіз көлікпен қатынауына жағдай жасау. Жолаушылардың белгіленген бағыттағы автобусқа тұрақты сұраныс танытуы да қатынастың үздіксіз әрі ұзақ мерзімді жұмыс істеуіне ықпал етеді. Өйткені кез келген қоғамдық қызметтің өміршеңдігі оны ұйымдастырумен ғана емес, халықтың оны пайдалануымен де өлшенеді. Халықпен кездесулерде айтылған ұсыныстарды назарға алып, өзекті мәселелерді шешу жергілікті атқарушы органдар жұмысының маңызды бағыттарының бірі. Казталов–Орал бағытындағы автобус қатынасының қайта жандануы тұрғындар сұранысының ескерілгенін көрсетеді. Ендігі кезекте тасымал қызметінің тұрақты жұмыс істеуі үшін жолаушылардың қауіпсіздігіне басымдық беріліп, тұрғындардың да осы бағытты қолдап, белсенді пайдалануы маңызды. Асылбек НӘСІПҚАЛИҰЛЫ - @auylainasy_media