@abdu_llah.2: <كلامي طويل بس بعد هذا تعبيري هيج طلع همزين وكفت كلام جان صار كتاب.> آني تظاهرت إن كلشي صار وياي عادي، وإن المواقف اللي مريت بيها ما أثرت بيّه، بس بالحقيقة چنت أتألم أكثر مما أبين. وأشوف إن هذا الشي صعب كلش على الإنسان، مو سهل أبدًا إنّه يتألم ويسكت، ويخفي كلشي بداخله وكأن ماكو شي صاير. صعب أضحك وآني بداخلي ألف وجع، وأگول عادي وآني كلشي بداخلي مو عادي. مرات أتمنى لو أگدر أحچي كل اللي بداخلي، بس مو كل وجع ينحچي، ومو كل شعور نعرف شلون نفسّره. وأصعب شي من تتعود تخفي تعبك لدرجة محد يحس بيك، والكل يعتقد إنّك بخير، بينما إنت وحدك تعرف شكد دا تتعب من الداخل. مو لأنّي نسيت أو تجاوزت، بس لأنّي تعبت من كثر ما أحاول أتخطى أشياء بعدها توجعني، وتعبت من إني كل مرة أجمع نفسي وأتصرف وكأن ما صار شي.بس رغم كل هذا، أحاول أذكّر نفسي إن الحياة هي هيج، بيها أشياء توجعنا، ومواقف تغيّرنا، وأيام تجبرنا نسكت ونتحمّل أكثر من طاقتنا، ومو كلشي يصير ويانه نكدر نفهم حكمته بوقتها. بالنهاية، مو كل مرة أگول بيها عادي يعني فعلًا عادي، ومو كل مرة أضحك بيها يعني آني مرتاح، مرات كل اللي أسويه هو إنّي أحاول أتحمّل وأكمّل، وأخلّي الأيام تمشي، لأن أعرف إن مو كل وجع يبقى، ومو كل ضيقة تدوم.وآني مؤمن إن مهما صعبت الحياة، ومهما ثگلت علينا الأيام، من يكون رب العالمين ويانه، كلشي يهون. لأن أكو أشياء ما نكدر نحچيها لأحد، وأوجاع ما يعرف بيها غير الله، هو وحده يعرف شكد حاولنا نكون أقوياء، وشكد مرة ابتسمنا وإحنا محتاجين نبچي، وشكد مرة گُلنا الحمد لله رغم كل التعب اللي بداخلنا. ولهذا أحاول أصبر وأرضى، وأخلّي كلشي على الله، لأن بالنهاية ماكو أحنّ من رب العالمين، وماكو أمان أكبر من إنّك تسلّم أمرك إله وتطمئن إنّه شايف كلشي، وعالم بكل اللي بگلبك. ويمكن مو كلشي يتغيّر بالوقت اللي نريده، بس يبقى عندي إيمان إن الله ما ينسى تعب أحد، وإن بعد الصبر فرج، وبعد الضيق سعة، وإن كل وجع نعيشه ربّي أعلم بيه، وهو وحده القادر يهوّن علينا كلشي ويعوّض گلَبنا عن كل لحظة تعب مرّينا بيها. #thegreenmile #fyp #foryou #foryoupage #iraq
