MƏNİM ÖLKƏMƏ TOXUNMAYIN! Mən bilmirəm, siz nədən narazısınız, nə istəyirsiniz. Amma sizdən bir xahişim var: gül kimi məmləkətimizi məhv etməyin! Azərbaycanı Suriyanın, Əfqanıstanın, İranın gününə salmayın! Bu ölkə bizim Vətənimizdir, bizim evimizdir. Biz bu torpaqları kiminsə dini və ya siyasi ambisiyalarına qurban vermək üçün qoruyub saxlamamışıq! Baxın, mənim geyim tərzim budur! Başımı örtməməklə əxlaqsız olmuram! Siz deyirsiniz ki, hicab namusdur. Xeyr! Namus baş örtüyü ilə ölçülmür! Namus insanın vicdanında, əxlaqında, davranışında, dürüstlüyündə və insanlığına sadiqliyindədir. Hicab taxan qadın da hörmətə layiqdir, başını örtməyən qadın da! Heç kimin digərinin həyat tərzini mühakimə etmək, ona əxlaqsız damğası vurmaq haqqı yoxdur. Bu ölkədə sizin düşüncənizdən fərqli düşünən, dünyəvi geyinən, azad yaşamaq istəyən milyonlarla insan var. Sevinin ki, həmin insanlar sizin sözlərinizə, təhqirlərinizə və ittihamlarınıza baxmayaraq, sizin üstünüzə qalxmır, ölkədə qarşıdurma yaratmır, heç kimin azadlığını əlindən almağa çalışmırlar. Çünki onlar fərqli düşüncəyə hörmət etməyi bacarırlar. Bəs siz niyə bacarmırsınız?! Bir az ətrafınıza baxın! Hər tərəfdə düşmənlər fürsət gözləyir. Ermənistan fürsət axtarır. Qarabağ uğrunda canından keçən minlərlə şəhidimizin qanı, bu xalqın çəkdiyi ağrı-acı hələ unudulmayıb. O torpaqlar uğrunda 3000-ə yaxın şəhid vermişik. Analar oğulsuz, uşaqlar atasız qalıb. Bütün bunlar nəyin uğrunda idi? Azərbaycanımızın bütövlüyü, müstəqilliyi və gələcəyi naminə! Siz doğrudanmı düşünürsünüz ki, ölkədə qarışıqlıq salmaqla, insanları bir-birinə düşmən etməklə yaxşı günlərə çıxacaqsınız? Doğrudanmı bu xalqın yenidən faciələr yaşamasını istəyirsiniz? Allah eləməsin, sabah yenidən torpaqlarımız təhlükə qarşısında qalsın, yenidən şəhidlər verək! Onda bu qədər oğulun qanına kim cavab verəcək? O şəhidlərin ruhu qarşısında necə dayanacaqsınız? Hələ bunlarla kifayətlənsələr, dərd yarı! Bölgədəki siyasi reallıqları görməzdən gəlmək olmaz. İranda milyonlarla azərbaycanlının milli kimliyi, ana dili və hüquqları ilə bağlı problemlər mövcuddur. Belə bir şəraitdə öz ölkəmizdə də insanları dini şüarlarla parçalamaq, cəmiyyəti qarşı-qarşıya qoymaq kimə və nəyə xidmət edir? Biz başqalarının təcrübəsindən dərs çıxarmalıyıq, yoxsa eyni səhvləri öz əlimizlə təkrarlamalıyıq? Prezidenti tərifləmək sizə görə yaltaqlıqdırsa, bu, sizin düşüncənizdir. Amma mənim üçün kiminsə fəaliyyətini bəyənmək, gördüyüm müsbət məqamları dilə gətirmək yaltaqlıq deyil, şəxsi mövqeyimi ifadə etməkdir. Mən prezidentə yaltaqlanıb nə əldə edəcəyəm? Jurnalist olaraq öz peşəmin zirvəsindəyəm. Öz zəhmətimə, biliyimə və peşəkarlığıma güvənirəm. Kimdənsə nəsə ummaq, kiməsə yarınmaq üçün fikirlərimi ifadə etmirəm. Mənim öz mövqeyim, öz düşüncəm var və onu açıq deməkdən çəkinmirəm. Şükür Allaha, sevdiyim insanlarla, öz istəyimlə köçüb gəldiyim, sevdiyim şəhərdə Gəncədə yaşayıram. Öz işim, öz həyatım, öz seçimlərim var. Günün istənilən vaxtında şəhərdə rahat gəzə bilirəmsə, özümü təhlükəsiz hiss edirəmsə, bunun ölkədəki qanunların, ictimai asayişin və mövcud idarəçilik sisteminin də öz payı olduğunu düşünürəm. Bəs mən niyə bunu dilə gətirməməliyəm? Niyə gördüyüm müsbət məqamları demək kiməsə yaltaqlıq kimi görünməlidir? Tənqid etmək nə qədər hüquqdursa, bəyəndiyini söyləmək də bir o qədər hüquqdur! Azərbaycanı dini və siyasi qarşıdurmaların meydanına çevirməyin! İnsanları bir-birinə düşmən etməyin! Şəhidlərimizin qanı ilə qorunan bu torpaqlarda nifaq toxumları səpməyin! Bizim Vətənimiz başqalarının siyasi və ideoloji oyunlarının qurbanı olmamalıdır. Azərbaycan nə kiminsə dini hakimiyyət arzusuna, nə də cəmiyyəti parçalamaq istəyənlərin ambisiyalarına qurban verilə bilər. Mən Azərbaycanımı sevirəm. Onun azad, dünyəvi, müstəqil və təhlükəsiz qalmasını istəyirəm. Ilham Aliyevin arxasında tək 10 milyon deyil Dünya azərbaycanlıları var🇦🇿 - @sakina_nadirqizi_resmi