@rawan.abdalmahmoud: مرات أحسن حاجة ممكن نعملها إننا ما نستعجل.. لا نستعجل خطوة، ولا قرار، ولا وصول. نخلي كل حاجة تاخد وقتها، ونمشي بالقدر البنقدر عليه، من غير ما نحمّل يومنا أكتر من طاقتو. في حاجات ما بتتضح من أول الطريق، وفي حاجات ما بنفهم حكمتها إلا بعد ما نمشي مسافة. عشان كده خلو بالكم من خطواتكم.. من الكلام البتقولوه، من القرارات البتاخدوها، ومن الطرق البتختاروها. ما كل طريق لازم نكملو للنهاية، وما كل تأخير معناه إننا اتأخرنا.. مرات التمهّل بيخلينا نشوف حاجات الاستعجال كان ممكن يخلينا نفوتها. والحياة أصلًا ما ماشّة بخطة واحدة.. يوم بيفتح ليك باب، ويوم بيقفّل ليك طريق، ويوم تفتكر إنك اتأخرت، تلقى إنو كل التأخير ده كان ترتيب. فامشوا على مهلكم.. اعملوا العليكم، وسيبوا الباقي على الله. وفي كل مرحلة، حاولوا تعيشوها زي ما هي.. لا تستعجلوا نهايتها، ولا تخافوا من التغيير. يمكن أجمل الحاجات لسه جاية، بس محتاجة مننا نمشي ليها بهدوء. وفي النهاية.. كل مرحلة عندها وقتها، وكل طريق عندو آخره، وربنا وحدو العارف وين الخير. فنسأل الله أن يجعل خطواتنا مباركة، وطرقنا خفيفة، وأيامنا جاية علينا بالخير والرضا.. وأن نصل في الوقت الصح، للمكان الصح، ونلتفت ورا ونقول: الحمد لله.. كل حاجة مشت زي ما كان مفروض تمشي. 🤍

Rawan Abdalmahmoud

Open In TikTok:

Region: SD

Wednesday 14 October 2026 19:36:44 GMT