MANILA, Philippines — Kaya raw madaling talunin ng China ang Pilipinas kung gugustuhin nitong gumamit ng puwersa. Ito ang kontrobersiyal na pahayag ni Chinese Ambassador Jing Quan na umani ng matinding reaksiyon mula sa Department of Foreign Affairs (DFA) at Philippine Coast Guard (PCG). Sa isang panayam noong Oktubre 15, iginiit ni Jing na dapat umanong maging masaya ang Pilipinas dahil China ang kapitbahay nito sa rehiyon. “We should feel fortunate enough that you have a neighbor like China in this region,” pahayag ng Chinese ambassador. Ngunit mas naging kontrobersiyal ang kasunod niyang sinabi. “If we want to use force, we may easily win. But no, we will not use force. We love peace.” Ginawa ni Jing ang pahayag habang tinatanggihan ang bansag na “troublemaker” laban sa China at ipinagtatanggol ang posisyon ng Beijing sa gitna ng tensiyon sa West Philippine Sea. Hindi ito pinalampas ng DFA, na nagsabing ang naturang pananalita ay maaaring ituring na “thinly veiled threat of the use of force” laban sa Pilipinas. Ayon sa kagawaran, hindi nakatutulong sa sensitibong relasyon ng dalawang bansa ang ganitong mga pahayag, lalo na kung ang layunin ay mapanatili ang diplomasya at mapayapang pag-uusap. Mas direkta naman ang naging reaksiyon ni Philippine Coast Guard spokesperson Rear Admiral Jay Tarriela. “That is not reassurance. That is a direct threat, and wrapping it in ‘We love peace’ does not change what it is,” giit ni Tarriela. Ikinumpara rin niya ang pahayag sa isang bisitang nagsasabing kaya niyang saktan ang kanyang host ngunit piniling huwag gawin iyon, at pagkatapos ay umaasang pasasalamatan pa siya. Dumating ang kontrobersiya habang patuloy ang tensiyon sa West Philippine Sea, kung saan ilang beses nang nagkaroon ng komprontasyon sa pagitan ng Chinese vessels at Philippine authorities. Iginiit ng Pilipinas ang karapatan nito sa ilalim ng international law at ng 2016 arbitral ruling na nagpawalang-bisa sa malawak na maritime claims ng Beijing. Patuloy namang tinatanggihan ng China ang nasabing ruling. Sa kabila ng pagtitiyak ni Jing na hindi gagamit ng puwersa ang Beijing, malinaw ang posisyon ng DFA na dapat umiwas ang mga diplomat sa mga salitang maaaring magpalala ng tensiyon. Para sa pamahalaan ng Pilipinas, ang tunay na mapayapang pakikipag-ugnayan ay kailangang nakabatay sa respeto sa soberanya, international law at pantay na dignidad ng bawat bansa. #AgendaPilipinas - @agendapilipinas