@brandmedia123: សម្តេចធិបតី ហ៊ុន ម៉ាណែត ថ្លែងក្នុងកិច្ចប្រជុំកំពូល CICA លើកទី៧ គូសបញ្ជាក់ពីភាពស្មុគស្មាញនៃបញ្ហាព្រំដែនកម្ពុជា-ថៃ ការពារអធិបតេយ្យភាព និងជំហរដោះស្រាយដោយសន្តិវិធី រាជធានីបាគូ៖ ក្នុងឱកាសអញ្ជើញចូលរួមកិច្ចប្រជុំកំពូលលើកទី៧ នៃសន្និសីទស្តីពីអន្តរសកម្មភាព និងវិធានការកសាងទំនុកចិត្តនៅអាស៊ី (CICA) នៅរដ្ឋធានីបាគូ ប្រទេសអាស៊ែបៃសង់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងសុន្ទរកថាដោយបានគូសបញ្ជាក់ពីការគាំទ្រយ៉ាងពេញទំហឹងរបស់កម្ពុជាចំពោះការបំលែង CICA ទៅជាអង្គការអន្តរជាតិពេញលេញ ព្រមទាំងបានសង្កត់ធ្ងន់លើសារៈសំខាន់នៃការប្រកាន់ខ្ជាប់នូវគោលការណ៍អធិបតេយ្យភាព សន្តិវិធី និងការគោរពធម្មនុញ្ញអង្គការសហប្រជាជាតិ ដើម្បីដោះស្រាយបញ្ហាប្រឈមភូមិសាស្ត្រនយោបាយ និងសេដ្ឋកិច្ចសកល។ ទន្ទឹមនឹងនេះ សម្តេចធិបតីបានលើកឡើងយ៉ាងច្បាស់ៗអំពីបច្ចុប្បន្នភាព និងភាពស្មុគស្មាញនៃស្ថានការណ៍ព្រំដែនរវាងកម្ពុជា និងថៃ។ សម្តេចបានគូសបញ្ជាក់ថា មកទល់ពេលនេះ បទឈប់បាញ់រវាងកម្ពុជា និងថៃ នៅតែបន្តគោរពបាន ប៉ុន្តែស្ថានការណ៍ទូទៅនៅតែមានភាពស្មុគស្មាញ ដោយសារបញ្ហាស្នូលពាក់ព័ន្ធនឹងបូរណភាពទឹកដី និងអធិបតេយ្យភាព ស្របតាមច្បាប់អន្តរជាតិ និងកិច្ចព្រមព្រៀងដែលមានជាធរមាន នៅមិនទាន់ត្រូវបានដោះស្រាយនៅឡើយ។ ជាមួយគ្នានេះ សម្តេចនាយករដ្ឋមន្ត្រី បានសង្កត់ធ្ងន់ថា កម្ពុជានៅតែមានក្តីបារម្ភចំពោះស្ថានភាពជាក់ស្តែងនៅតាមតំបន់ដែលកងទ័ពថៃ កំពុងកាន់កាប់ ដែលស្ថិតនៅជ្រៅក្នុងទឹកដីកម្ពុជា ហើយការខណ្ឌសីមាព្រំដែន តាមរយៈគណៈកម្មការចម្រុះខណ្ឌសីមាព្រំដែនគោក (JBC) ដែលជាយន្តការគន្លឹះសម្រាប់ការដោះស្រាយវិវាទដោយសន្តិវិធី ដូចមានចែងយ៉ាងច្បាស់ក្នុងកិច្ចព្រមព្រៀងរវាងកម្ពុជា-ថៃ រួមទាំងសេចក្តីថ្លែងការណ៍រួមទីក្រុងគូឡាឡាំពួរ និងសេចក្តីប្រកាសរួម នៅមិនទាន់ត្រូវបានអនុវត្តជាក់ស្តែងនៅលើទីតាំងនៅឡើយ។ សម្តេចធិបតីបានបន្ថែមថា ការយឺតយ៉ាវក្នុងការអនុវត្តកិច្ចព្រមព្រៀងទាំងនេះ បានរារាំងប្រជាពលរដ្ឋកម្ពុជាប្រមាណ ២ម៉ឺននាក់ មិនឱ្យត្រឡប់ទៅកាន់លំនៅឋានវិញដោយសុវត្ថិភាព និងសេចក្តីថ្លៃថ្នូរ។ ទោះបីជាយ៉ាងណាក៏ដោយ កម្ពុជានៅតែបន្តប្រកាន់ខ្ជាប់នូវការប្តេជ្ញាចិត្តយ៉ាងមុតមាំ ក្នុងការដោះស្រាយបញ្ហាដែលនៅសេសសល់ជាមួយថៃ ដោយសន្តិវិធី តាមរយៈការកាត់បន្ថយភាពតានតឹង កិច្ចសន្ទនា យន្តការទ្វេភាគី និងច្បាប់អន្តរជាតិ ដើម្បីការពារអធិបតេយ្យភាព និងបូរណភាពទឹកដីរបស់ខ្លួនឱ្យបានដាច់ខាត ដែលស្មារតីនៃការបង្កើតទំនុកចិត្ត និងការរួមរស់ជាមួយគ្នាដោយសន្តិវិធីនេះ គឺស្របគ្នាយ៉ាងល្អឥតខ្ចោះទៅនឹងបេសកកម្ម និងគោលការណ៍គ្រឹះរបស់ CICA នៅក្នុងតំបន់អាស៊ីទាំងមូល។

brandmedia

Open In TikTok:

Region: KH

Friday 16 October 2026 03:54:11 GMT