လေထဲခုန်တက်ကာ ဇောက်ထိုးမောင်းနှင်နိုင်တဲ့ Tesla ရဲ့ မျိုးဆက်သစ် Roadster လျှပ်စစ်စူပါကားကို စတင်မိတ်ဆက် ၁၆ အောက်တိုဘာ ၂၀၂၆ (Eastern ThanLwin ) ကြည်ညို ကမ္ဘာကျော် လျှပ်စစ်ကားထုတ်လုပ်ရေးကုမ္ပဏီ Tesla ဟာ မျိုးဆက်သစ် Roadster လျှပ်စစ်စူပါကားကို အောက်တိုဘာ ၁၅ ရက်မှာ မိတ်ဆက်ပြသခဲ့ပြီး SpaceX နည်းပညာနဲ့ ဆက်စပ်တဲ့ တွန်းကန်စနစ်တွေကို အသုံးပြုထားကြောင်း ဖော်ပြမှုတွေကြောင့် နည်းပညာလေ့လာသူတွေနဲ့ ကားချစ်သူတွေအကြား စိတ်ဝင်စားမှု မြင့်တက်လာပါတယ်။ မိတ်ဆက်ပွဲနဲ့ပတ်သက်တဲ့ ရုပ်သံပြကွက်တွေမှာ Roadster ကားဟာ အထူးပြင်ဆင်ထားတဲ့ လမ်းစောင်းတစ်ခုပေါ်ကနေ အရှိန်နဲ့ ခုန်တက်သွားပြီး လေထဲမှာ ခဏတာ ရွေ့လျားနေတဲ့ မြင်ကွင်းတွေအပြင် ဇောက်ထိုးအနေအထားနဲ့ မောင်းနှင်သလို မြင်ရတဲ့ သရုပ်ပြမှုတွေကိုလည်း ပြသခဲ့ပါတယ်။ Tesla Roadster ဟာ လူနှစ်ဦးစီးနင်းနိုင်တဲ့ လျှပ်စစ်စွမ်းအင်သုံး စူပါကားအမျိုးအစားဖြစ်ပြီး အရှိန်မြန်ဆန်မှု၊ စွမ်းဆောင်ရည်မြင့်မားမှုနဲ့ နည်းပညာဆန်းသစ်မှုတွေကို အဓိကထား တည်ဆောက်ထားတဲ့ မော်ဒယ်တစ်ခု ဖြစ်ပါတယ်။ ဒီကားရဲ့ အထူးခြားဆုံးအချက်တစ်ခုကတော့ SpaceX ရဲ့ အာကာသနည်းပညာနဲ့ ဆက်စပ်တဲ့ တွန်းကန်စနစ်ကို ထည့်သွင်းအသုံးပြုနိုင်ဖို့ ရည်ရွယ်ထားခြင်း ဖြစ်ပါတယ်။ အဆိုပါနည်းပညာဟာ ကားရဲ့ အရှိန်တင်နိုင်စွမ်းနဲ့ လှုပ်ရှားမှုစွမ်းဆောင်ရည်ကို ပိုမိုမြှင့်တင်ပေးနိုင်ဖို့ ရည်ရွယ်ထားတာဖြစ်ပြီး လက်တွေ့အသုံးပြုနိုင်မယ့် အတိုင်းအတာနဲ့ နောက်ဆုံးထုတ်လုပ်မှုမော်ဒယ်မှာ ပါဝင်လာမယ့် အသေးစိတ်အချက်အလက်တွေကိုတော့ ဆက်လက်စောင့်ကြည့်ရဦးမှာ ဖြစ်ပါတယ်။ Tesla ဟာ Roadster မျိုးဆက်သစ်ကို ၂၀၁၇ ခုနှစ်ကတည်းက ပထမဆုံးကြေညာခဲ့ပေမဲ့ ထုတ်လုပ်မှုအစီအစဉ်ကို အကြိမ်ကြိမ် ရွှေ့ဆိုင်းခဲ့ရပါတယ်။ ယခု ၂၀၂၆ ခုနှစ်မှာတော့ မျိုးဆက်သစ်ဒီဇိုင်းနဲ့ ပြန်လည်မိတ်ဆက်ပြသလာတာ ဖြစ်ပါတယ်။ လက်ရှိကြေညာထားတဲ့ အစီအစဉ်အရ Roadster ကို ၂၀၂၈ ခုနှစ်မှာ စတင်ထုတ်လုပ်ဖို့ ရည်ရွယ်ထားပေမဲ့ အမှန်တကယ်ရောင်းချမယ့်ရက်၊ နောက်ဆုံးသတ်မှတ်ချက်တွေနဲ့ ဈေးနှုန်းကိုတော့ အသေးစိတ်ထုတ်ပြန်ထားခြင်း မရှိသေးပါဘူး။ လျှပ်စစ်ကားနည်းပညာနဲ့ အာကာသနည်းပညာကို ပေါင်းစပ်အသုံးပြုနိုင်မယ့် အလားအလာကြောင့် Tesla Roadster ဟာ စိတ်ဝင်စားမှုမြင့်တက်နေတဲ့ မော်ဒယ်တစ်ခုဖြစ်လာပြီး လက်တွေ့ထုတ်လုပ်မှုအဆင့်မှာ ဘယ်လောက်အထိ စွမ်းဆောင်နိုင်မလဲဆိုတာ စောင့်ကြည့်ရဦးမှာ ဖြစ်ပါတယ်။ #လျှပ်စစ်ကား #TeslaRoadster #SpaceXCar (2)# - @easternthanlwin