@millardayo_: Mahakama Kuu ya Tanzania imeuagiza Uongozi wa Gereza la Ukonga Jijini Dar es salaam kuhakikisha Mawakili na Washauri wa kisheria wa Mwenyekiti wa CHADEMA, Tundu Lissu wanaruhusiwa kukutana na kuzungumza naye kwa usiri bila mazungumzo yao kusikilizwa na Maafisa wa Magereza. Kwa mujibu wa taarifa ya uamuzi huo uliotolewa leo, Oktoba 16, 2026, katika Shauri Na. 7300/2026 lililofunguliwa na Wakili Kulwa Maduhu na wenzake, Mahakama imeeleza kuwa Maafisa wa Magereza wanapaswa kusimamia usalama kwa kukaa umbali unaowawezesha kuona mazungumzo yanapofanyika, lakini si kusikia kinachozungumzwa. Akisoma uamuzi huo, Jaji Amir Mruma, aliyeongoza Jopo la Majaji watatu, amesema Maafisa wa Magereza wanapaswa kuzingatia Kanuni ya 13 ya Kanuni za Uendeshaji wa Magereza za mwaka 1968, inayotaka mashauriano kati ya Mfungwa na Wakili au Mshauri wake wa kisheria yafanyike kwa usiri. Aidha, Mahakama imeeleza kuwa kuzuiwa kwa Wakili Maduhu kuingia Gereza la Ukonga Oktoba 28, 2025, kwa sababu jina lake halikuwapo kwenye orodha ya Mawakili iliyowasilishwa na Lissu, hakukuwa na sababu ya kutosha ya kumnyima fursa ya kuonana na mteja wake. Mahakama pia imewaagiza Mwanasheria Mkuu wa Serikali, Kamishna Jenerali wa Magereza na Mkuu wa Gereza la Ukonga kuhakikisha Mawakili wa Lissu wanapofika gerezani wanapata fursa ya kufanya mazungumzo na mashauriano na Mteja wao bila kuingiliwa wala kusikilizwa. #MillardAyoUPDATES

millardayo

Open In TikTok:

Region: TZ

Friday 16 October 2026 11:03:41 GMT