يا بنات،نبي نقوللكن حاجة من القلب، وياريت كل بنت تقرا كلامي وتحطه في بالها، لأن الدنيا مش ديما تمشي زي ما نبوها، والناس مش ديما تطلع زي ما توقعناهم، وحتى الشخص اللي نعطوه من قلبنا ونحطوه في مكانة كبيرة، مرات يكون هو نفسه سبب وجعنا وكسرتنا. أول حاجة، يا بنت، حافظي على روحك وكرامتك، وماتخليش حبك لحد ينسيك قيمة نفسك. مهما حبيتي شخص، ومهما كان غالي عليك، ماتوصليش لمرحلة تتنازلي فيها على راحتك وكرامتك باش ترضيه، ولا تقعدي طول الوقت خايفة تخسريه وهو مش خايف يخسرك. الحب الصح مش مفروض يخليك كل ليلة ترقدي وعيونك بالدموع، ولا يخليك تستني في رسالة بالساعات وانتي مش عارفة مكانتك عنده شن هي. ثاني حاجة، ماتجريش ورا حد مشى باختياره، وماتترجيش حد باش يقعد معاك. اللي يبيك بجد، حيعرف كيف يحافظ عليك، واللي يشوفك غالية عليه، حيبينلك قيمتك بأفعاله قبل كلامه. ماتصدقيش كل كلمة حلوة تسمعيها، لأن الكلام ساهل، لكن المواقف هي اللي تكشف معادن الناس. مش كل واحد يقولك نحبك يكون صادق، ومش كل واحد يوعدك بالمستقبل يكون ناوي يبنيه معاك. شوفي أفعاله، شوفي وقفته معاك وقت الشدة، وشوفي هل وجوده في حياتك يريحك ولا يتعبك. ثالث حاجة، يا بنت، ماتعطيش ثقتك لأي حد بسرعة، حتى لو حسّيتي إنه مختلف عن الباقي. خذي وقتك في معرفة الناس، وخلي أسرارك عندك لين تتأكدي من الشخص اللي قدامك. مش كل حد يسمعك وقت حزنك يكون يحبلك الخير، ومش كل حد يضحك معاك يكون صافي من قلبه. لكن في نفس الوقت، ماتخليش خيباتك مع ناس تخليك تقفلي قلبك على الناس الكويسة، لأن مش كل الناس كيف بعضهم. ورابع حاجة، ماتهمليش روحك على خاطر حد. اهتمي بقرايتك، وبمستقبلك، وبشكلك، وبصحتك، وبحياتك، وخلي عندك أحلام وطموحات تسعي لهن. ماتخليش يومك مربوط برسالة من شخص، ولا فرحتك متعلقة باهتمامه، ولا قيمتك تتحدد على حسب معاملته ليك. انتي عندك حياة تخصك، وعندك روح تستاهل الفرح، وعندك مستقبل لازم تخدمي عليه. خلي الحب جزء حلو من حياتك، مش حياتك كلها. ويا بنات، بالله عليكن، ماترضوش بعلاقة انتي فيها ديما اللي تبادري، واللي تسألي، واللي تصالحي، واللي تخافي، واللي تحاولي تصلحي كل شي بروحك. العلاقة بين اثنين، مش شخص واحد يشيلها على كتافه. لو غلطتي، اعتذري، ولو هو غلط، من حقك توضحي زعلك. لكن ماتخليش الخوف من الفراق يخليك تسكتي على كل وجع، لأن الشخص اللي يحبك المفروض يسمعك ويحاول يفهمك، مش كل مرة يحسسك إن مشاعرك عبء عليه. ولو كان في حياتك شخص تحبيه وتبي تكملّي معاه، ادعيله وادعي ربي يكتبلكم الخير، لكن ماتنسيش إن الحب بروحه مش كفاية. لازم احترام، وصدق، وأمان، ووضوح، وخطوات جدية. واللي يبيك بالحلال، خليه يثبت جديته بالفعل، ويسعى ليك بالطرق الصح، مش يخليك معلقة بين الأمل والخوف، وكل يوم تقولي يمكن بكرة يتغير. وأهم حاجة، ماتقيسيش قيمتك بكون شخص اختارك أو لا. انتي مش ناقصة لو حد ماقدّركش، ومش فاشلة لو علاقة ماكملتش، ومش قليلة لو شخص قرر يمشي. مرات ربي يبعد علينا حاجات نبوها من كل قلبنا، لأننا مانعرفوش شن مخبيلنا القدر. وابكي لو وجعك الفراق، وازعلي لو انكسرتي، وخذي وقتك باش تتعافي، لكن ماتخليش وجع اليوم يسرق منك فرحة العمر كله. وخليها قاعدة في بالك يا بنت: اللي يحبك مش لازم يكون كامل، لكن لازم يحترمك ويحاول معاك، واللي يغلط في حقك لازم يعرف يصلح غلطه، واللي يوعدك لازم يكون قد وعده. ماتجريش ورا الحب لدرجة تنسي روحك، وماتتمسكيش بإنسان لمجرد إنك خايفة تبدئي من جديد. مرات البداية الجديدة أرحم من ألف محاولة مع شخص مش مستعد يتغير. وفي الأخير، نبي كل بنت تعرف إن كرامتها مش ضد الحب، وإن قوتها مش معناها إنها ما تبكيش، وإن طيبتها مش معناها تسمح لكل حد يستغلها. كوني حنينة، لكن مش على حساب روحك؛ سامحي، لكن تعلمي من اللي صار؛ حبي، لكن بعقل وقلب مع بعض؛ وثقي، لكن بعد ما تشوفي المواقف. يا بنت، ماتخليش خوفك من خسارة إنسان يخليك تخسري نفسك، لأن الناس ممكن يمشوا ويرجعوا، وممكن يتبدلوا، لكن انتي اللي حتعيشي مع روحك طول عمرك. اختاري نفسك وقت اللي يكون اختيار غيرك على حساب وجعك، وافتكري ديما إنك تستاهلي حب يطمن قلبك، مش حب يخليك كل يوم تسألي روحك: هو يبيّني بجد، ولا أني بس اللي نبيه🥹❤️‍🩹#كلام_من_ذهب #شعب_الصيني_ماله_حل😂😂 #mmmmmmmmmmmmmmmmmmmmmmmm #الخمس_لكبيده_مصراته_زليطن_طرابلس_بنغازي️ - @.m75840