Құрметті жерлестер, қадірлі ағайын! Біздің Жетісай өңірі, оның ішінде Асықата аймағы үшін ең өзекті, халықтың тұрмысы мен диқандардың несібесіне тікелей әсер ететін үлкен мәселе – жердің сорлануы мен жер асты суларының көтерілуі екені бәрімізге мәлім. Мен осы түйткілді мәселені аттай 18 жыл бойы талмай көтеріп, әрбір тиісті мінберде халықтың үнін жеткізумен келдім. Осынау жылдар бойғы табандылық пен бірлескен еңбектің арқасында бүгін көптен күткен тарихи шешім қабылданып, нақты іс басталғанын зор мақтанышпен хабарлаймын! Жетісай ауданы Асықата өңіріндегі суармалы жерлердің құнарлылығын қайта қалпына келтіру мақсатында ауқымды мемлекеттік жоба ресми түрде іске асырылып жатыр. Жоба аясында 210 дана тік дренажды ұңғымаларды қайта құру және толық қалпына келтіру жұмыстары қолға алынды. Бұл – жалпы құны 11,3 миллиард теңгені құрайтын, Дүниежүзілік Ислам Даму банкі арқылы қаржыландырылып отырған өте ірі жоба. Бұл жоба 45 876 гектардан астам құнарлы жерді қамтып, егістік алқаптарымыздың сорланудан аман қалуына және өнімділіктің артуына тікелей ықпал етеді. Оның ішінде Ділдәбеков ауылдық округі бойынша 35 ұңғыма, сондай-ақ Ералиев, Мақталы, Ынтымақ, Қызылқұм, Абай ауылдық округтері мен Асықата кентіндегі дренаждар толығымен жаңартылатын болады. Бұған қоса, аудандағы шаруашылық аралық және ішкі коллекторларды тазалау мәселелері де кезең-кезеңімен өз шешімін табуда. қазіргі уақытта «Қазсушар» РМК тарапынан құрылыс жұмыстарын жүргізу үшін конкурстық рәсімдер атқарылуда. 18 жыл бойы халықтың аманатын арқалап, осы күнге жету жолында аянбай тер төктік. Бүгінгі бұл жеңіс пен басталған іс – ата-бабамыздан қалған берекелі жеріміздің болашағы, келер ұрпақтың игілігі. Басталған ауқымды құрылыс жұмыстарының сапалы әрі уақытылы орындалуын депутат ретінде өз бақылауымда ұстап, соңына дейін жеткізуге ат салыстым. Жеріміз берекелі, еліміз аман болсын! Құрметпен, Марат Ділдәбеков #рекомендации #elbruso - @dildabekov_marat