🛑 فيه طالب بيطلع سُلّم المدرسة عشان يلحق فصله.. وعاشور بيطلع زميله على كتفه عشان ما يحسّش إنه لوحده! ♦️ مش كل درس بيتشرح على السبورة، ومش كل التربية بنلاقيها في الكتب.. ساعات درس واحد من طالب في أولى إعدادي يعلّمنا معنى الإنسانية والنخوة والأخوة أكتر من كلام كتير. 📌 عزة صلاح، معلمة بمدرسة أحمد إسماعيل الإعدادية بالصوامعة في سوهاج، نشرت صورة لطالب اسمه عاشور، وهو شايل زميله من ذوي الإعاقة الحركية على كتفه، وبيساعده يطلع وينزل سلالم المدرسة؛ لأن الحركة صعبة عليه. 📌 وكتبت المعلمة الموقرة: «لو ما شوفتش حاجة حلوة النهارده.. تعالى شوف عاشور.. ده طالب في أولى إعدادي عندي، الصبح وآخر اليوم بيشيل زميله اللي عنده إعاقة حركية وصعب يطلع أو ينزل السلم عشان يساعده.. حاجة في منتهى الإنسانية.. كل ما أشوفهم تعب اليوم كله بيروح.. ربنا يبارك فيك يا ابني والله». ♦️ عاشور يمكن لسه بيتعلم دروسه في أولى إعدادي، لكنه فهم درس كبير جدًا.. إن الجدعنة مش كلام، وإن صاحبك مش بس اللي تقعد جنبه في الفصل، صاحبك هو اللي يسندك لما الطريق يبقى صعب عليك. ❗️ تخيلوا زميله وهو بيلاقي حد مستنيه كل صباح، يمد إيده له، ويشيله وقت ما يحتاج، من غير ما يحسسه إنه عبء، ولا يسيبه يواجه صعوبة السلالم لوحده! 📍دي مش مجرد مساعدة في طلوع ونزول السلم.. دي مواقف بتزرع في قلب الإنسان إحساس إنه محبوب، وإن فيه حد شايفه، وحريص إنه يكون معاه، وإن إعاقته مش سبب يحرمه من صحبة زميله أو فرحة يومه في المدرسة. 📌 والتحية هنا كمان للبيت اللي ربّى عاشور على النخوة، وللمدرسة والمعلمة اللي شافت الموقف وقدّرته، ونقلته لينا عشان نفكر إن التربية الحقيقية بتبان في تصرفات أولادنا، خصوصًا لما يعملوا الصح من غير ما يستنوا مقابل أو تصفيق. 🔴 برافو يا عاشور.. رفعت زميلك على كتفك، لكن بموقفك رفعت قيمة الرحمة والجدعنة في عيوننا كلنا.. تستحق إننا نكتب عنك، ونحييك ونشكرك، لأنك نموذج محترم نتمنى نشوفه في شوارعنا ومدارسنا.. نموذج بيأكد لنا إن مصر لسه فيها حاجات حلوة.. ♥️ ربنا يبارك فيك، ويحفظ زميلك، ويجعل بينكم دايمًا المحبة والسند، ويكتر من أمثالك يا ابن الأصول.. لأن الدنيا لسه بخير طول ما فيها قلوب بتشيل بعض بجد.. عاشور طفل بأخلاق الكبار 🙏 📌 كرموا عاشور لأنه قدوة حسنة ويستحق وزارة_التربية_والتعليم - @lailaibrahim2158