*خیبرپختونخوا کے عوام کو 13 سالہ تاریک دور سے نجات مل گئی، امن اور عوامی مسائل کے حل کے لیے مل کر کام کریں گے: انجینئر امیر مقام* سنگوٹہ، سوات: وفاقی وزیر و صدر پاکستان مسلم لیگ (ن) خیبرپختونخوا انجینئر امیر مقام کی رہائش گاہ پر پارٹی عہدیداران اور کارکنان کا اجلاس منعقد ہوا۔ اجلاس سے خطاب کرتے ہوئے انجینئر امیر مقام نے کہا کہ اللہ تعالیٰ کے فضل و کرم سے بالآخر خیبرپختونخوا کے عوام کو 13 سالہ تاریک دور سے نجات مل گئی ہے۔ انہوں نے صوبے کے عوام کا شکریہ ادا کرتے ہوئے کہا کہ اس دور کے خاتمے پر جگہ جگہ خوشی کا اظہار کیا گیا اور جشن منایا گیا۔ ان کا کہنا تھا کہ صوبے کے 38 اضلاع میں سے صرف باڑہ میں معمولی احتجاج ہوا، جبکہ باقی تمام اضلاع میں عوام نے جشن منایا۔ وفاقی وزیر نے کہا کہ ہمارا عزم ہے کہ عوام، وفاقی و صوبائی حکومتیں اور تمام متعلقہ ادارے مل کر ادھورے کام مکمل کریں، دہشت گردی کا خاتمہ کریں اور صوبے میں پائیدار امن یقینی بنائیں۔ انہوں نے کہا کہ خیبرپختونخوا کے عوام کے بنیادی مسائل کے حل کے لیے اپنا بھرپور کردار ادا کرتا رہوں گا۔ پنجاب سے صوبے کو آٹے کی بلاامتیاز اور بلا رکاوٹ فراہمی یقینی بنانے اور اس راہ میں حائل چیک پوسٹوں کے خاتمے کے لیے کوششیں جاری رکھوں گا۔ انہوں نے پاٹا/ مالاکنڈ ڈویژن اور سابقہ فاٹا می وفاقی اور صوبائی ٹیکسوں کے نفاذ کا فیصلہ واپس لینے سمیت سوات موٹروے پر جلد کام شروع کرانے کے لیے بھی بھرپور کوشش کروں گا۔ نیت صاف ہو تو اللہ تعالیٰ ضرور مدد فرماتا ہے۔ اس موقع پر پارٹی عہدیداران اور کارکنان کی خواہش پر انہوں نے اتوار کو مینگورہ میں یومِ نجات منانے اور قیامِ امن کے لیے ایک بڑے جلسۂ عام کے انعقاد کا اعلان بھی کیا۔ - @amirmuqam29