11 سال تک بیوی سے ملنے والی رقم جمع کرتا رہا شوہر، انتقال سے پہلے ایسا راز کھلا کہ سب آبدیدہ ہوگئے ایک شوہر کی جانب سے اپنی بیوی کے لیے برسوں تک خاموشی سے رقم جمع کرنے اور اس کے نام پر اپارٹمنٹ خریدنے کی کہانی سوشل میڈیا پر توجہ حاصل کر رہی ہے۔ کہانی کے مطابق، شوہر ہر ماہ اپنی بیوی سے ملنے والے 1500 سعودی ریال اسی دن ایک الگ بچت اکاؤنٹ میں منتقل کر دیتا تھا۔ یہ سلسلہ 11 سال تک جاری رہا اور جمع ہونے والی رقم ایک لاکھ 90 ہزار ریال سے تجاوز کر گئی۔ بیوی سمجھتی رہی کہ اس کا شوہر یہ رقم اپنے کسی ذاتی مقصد کے لیے جمع کر رہا ہے، لیکن بینک کی دستاویزات سے معلوم ہوا کہ اس رقم کا مقصد ایک چھوٹا سا اپارٹمنٹ خریدنا تھا، جو بیوی کے نام پر رجسٹرڈ تھا۔ کہانی میں بتایا گیا ہے کہ شوہر نے انتقال سے چند روز قبل اپنے وکیل کو ایک فائل بیوی کے حوالے کرنے کی ہدایت کی۔ فائل میں موجود پرانی رسیدوں اور خطوط سے ایک اور اہم بات سامنے آئی۔ بیوی نے شادی سے پہلے اپنے والد سے وراثت میں ملنے والی زمین کا ایک حصہ فروخت کیا تھا اور اس کی رقم شوہر کو کاروبار شروع کرنے میں مدد دینے کے لیے دی تھی۔ بعد میں یہی کاروبار کامیاب ہوا اور کئی برس تک خاندان کی آمدنی کا ذریعہ بنا رہا۔ شوہر نے برسوں بعد بھی بیوی کی اس قربانی کو فراموش نہیں کیا اور اس کے لیے رقم جمع کرتا رہا، یہاں تک کہ اس کے نام پر اپارٹمنٹ خریدنے کا انتظام کر لیا۔ کہانی کے مطابق، فائل کے آخری صفحے پر شوہر نے اپنی بیوی کے لیے ایک پیغام بھی لکھا تھا، تاہم اس پیغام کے مکمل الفاظ دستیاب نہیں ہیں۔ یہ کہانی میاں بیوی کے درمیان وفاداری، قربانی اور احسان کو یاد رکھنے کے جذبے کی عکاسی کرتی ہے۔ تاہم، اس واقعے کی آزاد ذرائع سے تصدیق فراہم نہیں کی گئی۔ - @badashaharain