کبھی میں سوچتا ہوں کہ اگر تمہیں میری زندگی کے آخری دن کی خبر ہوتی، تو کیا تم ایک بار مجھے دیکھنے آتی؟ کیا تم میرے سرہانے بیٹھ کر میرا ہاتھ تھام لیتی؟ یا پھر تمہیں تب بھی یہی لگتا کہ میں ہمیشہ کی طرح تمہارے لوٹ آنے کا انتظار کر رہا ہوں، اور اس بار بھی انتظار کر لوں گا؟ تمہیں معلوم ہے، میں نے تمہارے جانے کے بعد خود کو بہت سمجھایا ہے۔ میں نے اپنے دل کو بتایا کہ کچھ لوگ زندگی میں صرف محبت کرنا سکھانے آتے ہیں، ساتھ نبھانے نہیں۔ مگر میرا دل ہر بار ایک ہی سوال کرتا ہے کہ اگر تمہیں جانا ہی تھا تو مجھے اتنی شدت سے اپنا کیوں بنایا؟ مجھے اپنی عادتیں کیوں لگائیں؟ مجھے اپنے بغیر جینے کا ہنر کیوں نہیں سکھایا؟ تم چلی گئیں، مگر تمہارے جانے کے بعد بھی میری زندگی میں تمہاری موجودگی ختم نہیں ہوئی۔ آج بھی کوئی بات اچھی لگے تو دل چاہتا ہے تمہیں بتاؤں، کوئی دکھ ملے تو جی چاہتا ہے تمہارے کندھے پر سر رکھ کر رو لوں۔ پھر اچانک یاد آتا ہے کہ اب میرے دکھ تمہارے نہیں رہے، میری خوشیوں پر تمہارا حق نہیں رہا، اور میری آنکھوں میں ٹھہرے آنسوؤں سے تمہیں کوئی فرق نہیں پڑتا۔ سب سے زیادہ تکلیف تمہارے چھوڑ جانے کی نہیں ہے، شاہ تکلیف تو اس بات کی ہے کہ جس شخص کے سامنے میں دنیا بھر سے لڑ سکتا تھا، آج اسی شخص کی یاد کے سامنے بے بس بیٹھا ہوں۔ میں تمہیں بھولنے کی کوشش نہیں کرتا اب، کیونکہ بھولنے کے لیے انسان کو پہلے یہ یقین کرنا پڑتا ہے کہ وہ شخص کبھی اس کا تھا۔ اور تمہیں اپنا کہنے کا حق تو شاید مجھے کبھی ملا ہی نہیں تھا۔ میں نے بس تمہیں اپنی زندگی سمجھ لیا تھا، اور تم نے شاید مجھے اپنی زندگی کا ایک خوبصورت سا حصہ۔ فرق صرف اتنا تھا کہ تمہارے لیے وہ حصہ ختم ہوگیا، اور میرے لیے پوری زندگی وہیں رک گئی۔ کبھی کبھی دل چاہتا ہے کہ تم واپس آؤ اور مجھ سے پوچھو کہ میرے بعد کیسے رہے؟ میں تمہیں کچھ نہ بتاؤں، بس تمہارے سامنے بیٹھ کر رو دوں، تاکہ تمہیں اندازہ ہو کہ جس شخص کو تم نے مضبوط سمجھ کر چھوڑا تھا، وہ اندر سے کب کا ٹوٹ چکا ہے۔ مگر پھر سوچتا ہوں، تم واپس آ بھی گئی تو کیا ہوگا؟ کیا بچھڑے ہوئے لمحے واپس آ جائیں گے؟ کیا وہ راتیں لوٹ آئیں گی جب تم سے بات کیے بغیر نیند نہیں آتی تھی؟ کیا میں دوبارہ وہی شخص بن سکوں گا جو تمہارے ایک پیغام سے مسکرانے لگتا تھا؟ شاید نہیں۔ کیونکہ کچھ جدائیاں انسان کو صرف تنہا نہیں کرتیں، اس کے اندر سے وہ انسان بھی چھین لیتی ہیں جو کبھی ہنسا کرتا تھا، خواب دیکھا کرتا تھا، اور یقین رکھتا تھا کہ محبت کرنے والے ایک دن ضرور مل جاتے ہیں۔ شاہ ، اگر کبھی تمہیں میری یاد آئے تو مجھے ڈھونڈنے مت نکلنا۔ بس ایک لمحے کے لیے آنکھیں بند کرکے سوچنا کہ ایک شخص تھا جو تمہارے جانے کے بعد بھی تمہیں برا نہیں کہہ سکا، جو تم سے شکوہ کرتے کرتے بھی تمہاری خوشیوں کی دعا کرتا رہا، اور جو اپنی پوری زندگی ہار کر بھی تمہیں قصوروار ٹھہرانے سے ڈرتا رہا۔ اور اگر کبھی تمہارے دل میں یہ خیال آئے کہ میں اب تک تمہارا انتظار کیوں کر رہا ہوں، تو بس اتنا سمجھ لینا کہ کچھ لوگ محبت سے نکل تو جاتے ہیں، مگر محبت اُن کے اندر سے کبھی نہیں نکلتی۔ میں بھی شاید اُنہی لوگوں میں سے ہوں۔ بس اب فرق اتنا ہے کہ پہلے تمہارے لوٹ آنے کی امید میں جیتا تھا، اور اب تمہارے لوٹ آنے کا خواب دیکھنے کے لیے سوتا ہوں۔ کیونکہ جاگتی آنکھوں سے تو تم بہت پہلے کسی اور دنیا کی ہو چکی ہو۔ اور میں؟ میں آج بھی اُس آخری لمحے میں قید ہوں، جہاں تم نے میرا ساتھ چھوڑا تھا اور میرا دل یہ سمجھ ہی نہیں پایا تھا کہ کسی کا زندہ رہتے ہوئے بچھڑ جانا بھی انسان کو عمر بھر کے لیے ماضی بنا سکتا ہے۔##2025newyear #happyramadan #poetry #dontunderreviewmyvideo #dontunderreviewmyvideo - @123shah46