إستوقفني الفيديو دا وخلاني أتذكر ايام طفولتي. زمان عملتَ مشكلة مع شيخ الخلوة (شيخ ادم ) كان جابوهو من الدمازين يدرّسنا في خلوة حي الدونكي (كانت خلوة نموزجية شديد). كان باقي الشباب بينبذو الشيخ وعندهم عبارة بنادوهو بيها (جَرلُو مديدة امبرورو) وكالعادة كان في كيزان معانا(معرصين وطبالين/ supervisor) شغلهم انو ينقلو كل تقرير اليوم للشيخ والعجب بيضيفو حاجات ما كانت حاصلة وانا طبعاً عامل فيها (ولد الاستاذ الفاهم) ههههههه. كنت بقول الاسم وسط الناس وكانو دا الاسم الاصلاً السموهو بيه(جَرلُو). والله يسامحهم للان م عرفتهم الكلمو الشيخ. الشيخ كان ناوي يعاقبني وانا كمان يا سلاام عامل فيها انو مستحيل يدقوني طوالي ركبتَ راس مع الشيخ وجريت البيت وعملتَ يومين ما جيت الخلوة والشيخ الله يكّتر خيرو طوالي اتصل لي والدي وكلمو بالحاصل ابوي بعد صلاة الصبح طوالي مسكني من يدي و مشينا الخلوة. الوالد الله يطول بعمرو اصلا ما قصّر معاي شال سوط الشيخ واداني ليك كم جلدة وقال للشيخ (ليك اللحم ولينا العضم). قبل ابوي ما يطلع الشيخ قال يلا يقومو أربعة نفر ، وقال ليهم (شيلوه فارّي😂) والله يكتّر خير (عمي سامي و ود خالتي صلاح الدقولي) اول ناس قاموا مسكو كُرعِيني (أرادوا بأهلهم سوء العذاب) يلا الشيخ بدا يجلد فيني من دون حساب وتقريبا كانوا (100-150 جلدة). بعديها ما قدرته امشي المدرسة (يومين موجوع) وحتي دا كان سبب رئيسي انو انا اترك الخلوة. ومن العجايب انو لما مشيت المدرسة الفصل كلو جااء يشوف ضهري والحاصل عليه (الشمار وصلهم قبل يومين) بعديها بديت افتش واختلق أعذار شان م امشي الخلوة لحدي ما اقتنع والدي ربنا يعطيه الصحة والعافية واتنازل عن الموضوع . بس دا كان عائق خلاني م اكمل دراسة القرءان الكريم. الخلاصة:- حببو أولادكم في القراية والدراسة اياً كانت (مدرسة/خلوة) فهموهم انو القراية رغبه واعملوا كل جهدكم انهم يقتنعو يدرسوا بإرادتهم او باللتي هسي احسن. لانو اجبارهم عليها نادراً ينفعهم خصوصاً اذا بقا الضغط علي نفس الموضوع متكرر بدل يكونو مطيعين بحاول يفتشو طرق يتخلصو بيها من الضغط. أغلبية الناس المخ م بديها إشارة الاستسلام مباشرة اولاً وكـ خطة (أ) بقاوموا بكل ما عندهم والخطة (ب) بتكون الهروب ، الاستسلام دايما بكون فرصة اخيرة(الخطة (جـ)). *كسرة:- إذا طفلك م بحب الخلوة ودراسة القرءان خليه يدرس مجال تاني بس حاول تربيهو تربية دينية صحيحة وشوفو شوية شوية براهو بقتنع. وإ ذا رفض المدرسة برضو م تضغطو اجباري يدرس حاول ازرع الفكرة في عقله وحاول اقنعو (حتي ولو تخليه يزور طبيب نفسي يعرف مشكلته) احسن من انك تضغطو وتخليه يكره الدراسة. افهموا مشاكل أولادكم وفكّروا في حلول إيجابية تكون في صالحكم وصالحهم. #daba_دابا @صلاح الدين الدقولي @سامي ابو وفاق عبدالله ابكر - @hfwzydaba