Ақан сері кесенесіне апаратын жол қашан жөнделеді? Үлкен тастар, терең шұңқырлар мен бітпеген жөндеу жұмыстары! Солтүстік Қазақстан облысының Айыртау мен Тайынша аудандарының шекарасындағы жолдың жағдайы тұрғындарды әбден қажытқан. Бұл жолмен күн сайын жергілікті халық қана емес, атақты Ақан серінің кесенесіне зиярат етуге келген адамдар да қатынайды. Біз тұрғындардың шағымынан кейін арнайы барып, жолдың қазіргі жағдайын өз көзімізбен көрдік. Мәдениет пен Талап ауылдарының маңындағы жолдарды жөндеу жұмыстары басталғанымен, әлі күнге дейін аяқталмаған. Кейбір учаскелерге қиыршық тас төселген, алайда көлік өткен сайын көтерілген шаң тұрғындарға қолайсыздық туғызып отыр. Тағы бір өзекті мәселе — Мәдениет ауылына кіреберіс жол. Тұрғындардың айтуынша, бұл жолды да жөндеуге уәде берілген, бірақ әзірге ешқандай жұмыс жүргізілмеген. Ауыл халқы бірнеше жылдан бері жол азабын тартып келеді. Осы мәселеге байланысты тұрғындар ұжымдық шағым да жолдаған. Түсірілім барысында біз Тайынша ауданының әкімі Берік Әлжановты кездестіріп, мәселенің мән-жайын сұрадық. Аудан әкімінің айтуынша, жөндеу жұмыстары қаржы тапшылығына байланысты уақытша тоқтап қалған. Дегенмен жолдарды жөндеу жоспарынан ешкім бас тартпаған. Ең бастысы, аудан әкімі ауылдар арасындағы жолды, сондай-ақ Мәдениет ауылына кіреберіс жолды да жөндеуге уәде берді. Енді бұл уәденің қашан және қалай орындалатынын уақыт көрсетеді. Біз де мәселені назарда ұстаймыз. Ал сіз бұл жолмен жүріп көрдіңіз бе? Жолдың жағдайы туралы пікіріңізді жазыңыз! - @alma_baigu