SISTER THEODORA FAUSTIN AWATAKA WAZAZI KUWALEA WATOTO KATIKA UTAMADUNI WA HISANI NA KUJALI WENYE UHITAJI Sister Theodora Faustin, Mkuu wa Shule ya Sekondari ya St. Joseph Cathedral High School, ametoa wito kwa wazazi na walimu kuwalea watoto katika misingi ya huruma, ukarimu na kuwajali watu wenye uhitaji, akisisitiza kuwa watoto wanapaswa kujifunza kushirikiana na wenzao wenye changamoto za maisha tangu wakiwa wadogo. Akizungumza wakati wa Matembezi ya Hisani, maarufu kama Charity Day, Sister Theodora amesema watoto wanaolelewa katika familia zenye uwezo wa kiuchumi wanapaswa kufundishwa kutambua kuwa si kila mtoto ana nafasi sawa ya kupata mahitaji muhimu kama chakula, mavazi na makazi. Amesema ni wajibu wa wazazi kutumia mazingira ya kila siku kuwaelimisha watoto kuhusu changamoto zinazowakabili watu wengine katika jamii, ili kuwajengea moyo wa huruma na utayari wa kushiriki kile walicho nacho na wenye uhitaji. Aidha, ameeleza kuwa shule za Kanisa zina utaratibu wa kuwasaidia wanafunzi kutoka familia zenye changamoto za kiuchumi kupata elimu kupitia ufadhili wa majimbo na wafadhili mbalimbali. Amesisitiza kuwa shule hizo pia huweka msisitizo katika usawa wa wanafunzi kwa kuhakikisha tofauti za kiuchumi hazisababishi baadhi yao kujiona duni mbele ya wenzao. Sister Theodora amebainisha kuwa malezi ya kiroho na kijamii ni muhimu katika kumjenga mtoto mwenye utu, akisisitiza kuwa thamani ya mtu haipimwi kwa mali alizonazo, bali kwa tabia yake, utu na namna anavyowatendea wengine. Amehitimisha kwa kutoa wito kwa wazazi na jamii kwa ujumla kushirikiana katika kuwalea watoto wanaotambua umuhimu wa kutoa, kusaidia na kuwajali wengine, akisisitiza kuwa malezi bora yanapaswa kumfundisha mtoto si tu kupokea, bali pia kushiriki alicho nacho kwa ajili ya ustawi wa wengine. Imeandikwa na Izahaki Mwacha #KanisaKatoliki #mkombozicommercialbank #Tanzania #BaloziwaAmani #breezonlinetv #woisooriginalproducts #CharityDay #news - @breezt4