Writing លោកឧត្តមសេនីយ៍ទោ ហេង រតនា ចុះត្រួតពិនិត្យការអនុវត្តច្បាប់ចរាចរណ៍ និងពង្រឹងការប្រើប្រាស់កាមេរ៉ាសុវត្ថិភាពចល័តនៅតាមគោលដៅក្នុងរាជធានីភ្នំពេញ ដោយទទួលបានការអនុញ្ញាតពីឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅព្រឹកថ្ងៃទី១៩ ខែតុលា ឆ្នាំ២០២៦ លោកឧត្តមសេនីយ៍ទោ ហេង រតនា ស្នងការរងទទួលផែនការងារនគរបាលចរាចរណ៍ បានអញ្ជើញចុះត្រួតពិនិត្យការអនុវត្តច្បាប់ចរាចរណ៍របស់មន្ត្រីនគរបាលចរាចរណ៍នៅតាមគោលដៅនានាក្នុងភូមិសាស្ត្ររាជធានីភ្នំពេញ។ ការចុះត្រួតពិនិត្យនេះ មានគោលបំណងពង្រឹងប្រសិទ្ធភាពនៃការអនុវត្តច្បាប់ឱ្យបានម៉ឺងម៉ាត់ ត្រឹមត្រូវ និងច្បាស់លាស់ ព្រមទាំងធានាឱ្យមន្ត្រីនគរបាលចរាចរណ៍គ្រប់រូបប្រកាន់ខ្ជាប់នូវក្រមសីលធម៌ និងវិជ្ជាជីវៈក្នុងការបំពេញតួនាទីភារកិច្ច ដោយគោរពច្បាប់ និងសិទ្ធិសេរីភាពរបស់ប្រជាពលរដ្ឋ។ ជាមួយគ្នានេះ លោកឧត្តមសេនីយ៍ទោ ហេង រតនា បានយកចិត្តទុកដាក់លើការត្រួតពិនិត្យ និងពង្រឹងការប្រើប្រាស់កាមេរ៉ាសុវត្ថិភាពចល័តនៅតាមគោលដៅនីមួយៗ ព្រមទាំងជំរុញការបំពាក់កាមេរ៉ាបន្ថែមឱ្យបានគ្រប់គោលដៅ ដើម្បីបង្កើនប្រសិទ្ធភាពក្នុងការតាមដាន ត្រួតពិនិត្យ និងស្វែងរកភាពមិនប្រក្រតីដែលអាចកើតមានឡើងក្នុងទំនាក់ទំនងរវាងប្រជាពលរដ្ឋ និងមន្ត្រីអនុវត្តច្បាប់។ - @mohorsoth