Saudiyya ta zartar da hukuncin kisa kan wasu ’yan ƙasar Bangladesh biyu da aka samu da laifin aikata badala a cikin masallacin Harami da ke birnin Makka. Wata jaridar Khaleej Times ta ruwaito cewa Ma’aikatar Harkokin Cikin Gida ta Saudiyya ce ta bayyana hakan cikin wata sanarwa da ta fitar ranar Laraba, inda ta bayyana sunayen mutanen da aka kashea a matsayin Nazrul Islam Abdul Basir da Siti Akhtar. Ma’aikatar ta ce jami’an tsaro sun kama mutanen biyu bayan faruwar lamarin, inda aka gudanar da bincike tare da gurfanar da su a gaban kotun da ta dace. Daga bisani, kotun ta same su da laifi, ta kuma yanke musu hukuncin kisa bisa la’akari da girman laifin da kuma keta alfarmar lokaci da wurin da abin ya faru. Sanarwar ta bayyana cewa an yanke musu hukuncin ne ƙarƙashin tsarin **Ta’azir**, wanda ke ba kotu damar yanke hukuncin ladabtarwa bisa tanade-tanaden Shari’ar Musulunci. Ma’aikatar ta ƙara da cewa hukuncin ya zama na ƙarshe bayan hukumomin da abin ya shafa sun tabbatar da shi. Daga nan ne aka bayar da umarnin sarauta na aiwatar da hukuncin kisan bisa Shari’ar Musulunci. Sanarwar ta ce an aiwatar da hukuncin kisan ne a yankin Makka a ranar Laraba, 14 ga Oktoba, 2026. Ma’aikatar Harkokin Cikin Gida ta Saudiyya ta sake jaddada ƙudurin gwamnatin ƙasar na tabbatar da tsaro, tabbatar da adalci da kuma aiwatar da dokokin Shari’a kan duk wanda ya karya alfarmar masallatai ko ya aikata laifukan da suka shafi mutuncin wasu. Ta kuma yi gargaɗin cewa duk wanda aka samu da aikata irin waɗannan laifuka zai fuskanci hukuncin da Shari’ar Musulunci ta tanada. - @adn.hausa2