@thanlwintimes: ဘောလုံးသမိုင်းတစ်လျှောက် အကောင်းဆုံး ဘလွန်းဒီအော (Ballon d'Or) ဆုရရှိခဲ့တဲ့ နှစ်ကို ရွေးချယ်ဖို့ တရားဝင် Ballon d'Or ပလက်ဖောင်းက ပြုလုပ်နေတဲ့ ပရိသတ်မဲပေးပွဲမှာ ပေါ်တူဂီတိုက်စစ်မှူး ခရစ္စတီယာနို ရော်နယ်ဒိုက မဲအများဆုံးနဲ့ ဦးဆောင်နေတယ်လို့ သတင်းတွေက ဖော်ပြပါတယ်။ Ballon d'Or တရားဝင်ပလက်ဖောင်းဟာ သမိုင်းတစ်လျှောက် အကောင်းဆုံး ရွှေဘောလုံးဆုရရှိခဲ့တဲ့ နှစ်ကို ရွေးချယ်နိုင်ဖို့အတွက် B.O.A.T (Ballon d'Or Of All Time) အမည်နဲ့ အထူးပရိသတ်မဲပေးပွဲတစ်ခုကို အောက်တိုဘာလအစောပိုင်းက စတင်ကျင်းပခဲ့တာပါ။ အဲဒီမဲပေးပွဲမှာ ဘလွန်းဒီအောဆုကို အနည်းဆုံး နှစ်ကြိမ် ရရှိဖူးတဲ့ ကမ္ဘာကျော် ဘောလုံးသမား ၁၀ ဦး ပါဝင်နေပြီး လီယွန်နယ် မက်ဆီ၊ ခရစ္စတီယာနို ရော်နယ်ဒို၊ ဘရာဇီးတိုက်စစ်မှူးဟောင်း ရိုနယ်လ်ဒို နာဇာရီယို၊ ယိုဟန် ခရိုက်ဖ်၊ မစ်ချယ် ပလာတီနီနဲ့ ဖရန့်ဇ် ဘက်ကင်ဘောင်ဝါတို့လို ဘောလုံးဂန္တဝင်တွေ ပါဝင်နေပါတယ်။ အောက်တိုဘာ ၁၉ ရက်က ထွက်ပေါ်ခဲ့တဲ့ သတင်းတွေအရ ရော်နယ်ဒိုဟာ ၂၀၀၈ ခုနှစ် ဘလွန်းဒီအောဆု ရရှိခဲ့တဲ့ စွမ်းဆောင်ရည်အတွက် ပရိသတ်မဲ ၆၂ ရာခိုင်နှုန်းအထိ ရရှိထားပြီး ပြိုင်ဘက်တွေကို အပြတ်အသတ် ဦးဆောင်နေတယ်လို့ သိရပါတယ်။ ဒါပေမဲ့ အဲဒီမဲရာခိုင်နှုန်းကို တရားဝင်ပလက်ဖောင်းကနေ သီးခြားအတည်ပြုနိုင်ခြင်း မရှိသေးပါဘူး။ ရော်နယ်ဒိုဟာ ၂၀၀၈ ခုနှစ်မှာ မန်ချက်စတာ ယူနိုက်တက်အသင်းနဲ့အတူ ပရီးမီးယားလိဂ်နဲ့ ဥရောပချန်ပီယံလိဂ်ဖလားတွေကို ဆွတ်ခူးနိုင်ခဲ့သလို တစ်နှစ်တာအတွင်း အသင်းအတွက် ပြိုင်ပွဲစုံ ၄၂ ဂိုး သွင်းယူနိုင်ခဲ့ပါတယ်။ အဲဒီစွမ်းဆောင်ရည်တွေကြောင့်ပဲ သူ့ရဲ့ ကစားသမားဘဝ ပထမဆုံး ဘလွန်းဒီအောဆုကို ဆွတ်ခူးနိုင်ခဲ့တာ ဖြစ်ပါတယ်။ အခုကျင်းပနေတဲ့ မဲပေးပွဲမှာတော့ ပရိသတ်တွေဟာ မိမိနှစ်သက်တဲ့ ကစားသမားတစ်ဦးကိုသာ ရွေးချယ်ရတာ မဟုတ်ဘဲ ဘလွန်းဒီအောဆု ရရှိခဲ့တဲ့ သက်ဆိုင်ရာနှစ်အလိုက် အကောင်းဆုံးစွမ်းဆောင်ရည်ကို ရွေးချယ်မဲပေးရတာ ဖြစ်ပါတယ်။ ထူးခြားချက်ကတော့ မဲပေးမှုဟာ အခမဲ့မဟုတ်ဘဲ မဲတစ်မဲအတွက် ၁ ယူရို ပေးဆောင်ရပြီး ပရိသတ်တစ်ဦးတည်းကလည်း မိမိနှစ်သက်တဲ့ ကစားသမားကို အကြိမ်ကြိမ် မဲပေးနိုင်တာ ဖြစ်ပါတယ်။ ဒါကြောင့် အခုထွက်ပေါ်နေတဲ့ မဲရလဒ်တွေဟာ ဘောလုံးကျွမ်းကျင်သူတွေရဲ့ အကဲဖြတ်ဆုံးဖြတ်ချက်ထက် ပရိသတ်တွေရဲ့ ပါဝင်မဲပေးမှုနဲ့ ငွေကြေးသုံးစွဲနိုင်မှုအပေါ် အဓိက မူတည်နေတာလည်း ဖြစ်ပါတယ်။ မဲပေးမှုကို အောက်တိုဘာ ၂၇ ရက်မှာ ပိတ်သိမ်းမှာဖြစ်ပြီး အောက်တိုဘာ ၂၈ ရက်မှာ နောက်ဆုံးရလဒ်ကို ထုတ်ပြန်ကြေညာသွားဖို့ စီစဉ်ထားပါတယ်။ လက်ရှိမှာ ရော်နယ်ဒိုက ဦးဆောင်နေတယ်လို့ သတင်းတွေ ထွက်ပေါ်နေပေမဲ့ မဲပေးပွဲမပြီးဆုံးသေးတာကြောင့် နောက်ဆုံးရလဒ် အပြောင်းအလဲ ရှိလာနိုင်ပါတယ်။ ဒီအထူးဆုဟာ နှစ်စဉ်ချီးမြှင့်တဲ့ တရားဝင် ဘလွန်းဒီအောဆုနဲ့ သီးခြားဖြစ်တာကြောင့် ရော်နယ်ဒို အနိုင်ရရှိခဲ့ရင်လည်း သူ့ရဲ့ ဘလွန်းဒီအောဆု ငါးကြိမ်ရရှိထားတဲ့ မှတ်တမ်းမှာ နောက်ထပ်တစ်ကြိမ် တိုးလာမှာတော့ မဟုတ်ပါဘူး။ #Ronado #ရော်နယ်ဒို #အားကစား

Than Lwin Times

Open In TikTok:

Region: TH

Tuesday 20 October 2026 01:40:59 GMT