میری شادی کو پچیس سال گزر چکے تھے، لیکن سچ کہوں تو میں نے کبھی اپنے شوہر کی قدر نہیں کی۔ وہ ایک سادہ مزاج اور محنتی انسان تھا۔ صبح گھر سے نکلتا اور رات گئے واپس آتا، صرف اس لیے کہ مجھے اور بچوں کو کسی چیز کی کمی نہ ہو مگر مجھے اس کی محبت کبھی نظر نہیں آئی۔ مجھے ہمیشہ یہی شکایت رہتی کہ وہ مجھے مہنگے کپڑے نہیں خرید کر دیتا، گھمانے نہیں لے جاتا اور نہ ہی دوسروں کے شوہروں کی طرح مجھے تحفے دیتا ہے جب میں اپنی سہیلیوں کو ان کے شوہروں کے ساتھ خوش دیکھتی تو گھر آکر اپنے شوہر کو طعنے دیتی میں اکثر اسے کہتی ’’تم سے شادی کرکے میری زندگی برباد ہوگئی۔ تم مجھے کبھی خوش نہیں رکھ سکے وہ خاموشی سے میری باتیں سنتا اور بس اتنا کہتا ’’رمشا، میرے پاس تمہیں دینے کے لیے دولت کم ہے، لیکن میری پوری زندگی تمہارے نام ہے مگر میں اس کی باتوں کا مذاق اڑا دیتی۔ مجھے کیا معلوم تھا کہ ایک دن یہی الفاظ میری زندگی کا سب سے بڑا پچھتاوا بن جائیں گے وقت گزرتا گیا۔ بچے بڑے ہوگئے، ان کی شادیاں ہوگئیں اور وہ اپنی اپنی زندگیوں میں مصروف ہوگئے۔ اب گھر میں صرف میں اور میرا شوہر رہ گئے تھے۔ مگر میں نے کبھی اس سے یہ نہیں پوچھا کہ تم تھک تو نہیں گئے؟ تمہیں کسی چیز کی ضرورت تو نہیں؟ تمہارا دل تو نہیں چاہتا کہ کوئی تمہارے پاس بیٹھ کر تمہاری باتیں سنے؟ میں نے ساری زندگی اس کی محبت کو معمولی سمجھا۔ پھر ایک رات اچانک اس کی طبیعت خراب ہوگئی۔ وہ سینے پر ہاتھ رکھے میرے پاس آیا اور کہنے لگا: ’’رمشا، میری طبیعت بہت خراب ہے، مجھے ہسپتال لے چلو۔‘‘ ہم اسے ہسپتال لے گئے۔ ڈاکٹر نے بتایا کہ اس کی حالت تشویش ناک ہے میں ہسپتال کی راہداری میں بیٹھی رو رہی تھی۔ میری زبان پر یہی دعا تھی ’’یا اللہ! میرے شوہر کو بچا لے۔ میں اب اسے کبھی نہیں ستاؤں گی، کبھی اس سے لڑائی نہیں کروں گی۔ بس اسے میرے پاس رہنے دے۔ اس رات مجھے پہلی بار احساس ہوا کہ جس انسان سے میں ساری زندگی شکایتیں کرتی رہی، وہی میری زندگی کا سب سے مستقل ساتھی تھا۔ دو دن بعد اسے ہوش آیا تو میں بھاگ کر اس کے پاس گئی۔ اس کا ہاتھ اپنے ہاتھوں میں لے کر رونے لگی۔ میں نے کہا ’’مجھے معاف کردو۔ میں نے تمہیں کبھی سمجھا ہی نہیں۔ تم ساری زندگی مجھ سے محبت کرتے رہے اور میں تمہیں نفرت دیتی رہی۔ اب تم ٹھیک ہوجاؤ، میں تمہاری زندگی خوشیوں سے بھر دوں گی۔‘‘ اس نے کمزور سی مسکراہٹ کے ساتھ میری طرف دیکھا ’’رمشا، میں نے تم سے کبھی بڑی بڑی خوشیاں نہیں مانگیں۔ بس اتنا چاہتا تھا کہ کبھی میرے پاس بیٹھ کر چائے پی لیا کرو، کبھی میرے دن بھر کے کام کے بارے میں پوچھ لیا کرو۔ جب میں گھر آؤں تو تمہارے چہرے پر میرے لیے تھوڑی سی خوشی ہو۔‘‘ اس کی بات سن کر میرا دل ٹوٹ گیا۔ میں نے اس کا ہاتھ اپنے سینے سے لگا لیا اور وعدہ کیا کہ اب اسے کبھی تنہا نہیں چھوڑوں گی۔ مگر شاید زندگی نے مجھے ایک آخری سبق سکھانے کا فیصلہ کرلیا تھا۔ تیسرے دن فجر کے وقت اس کی طبیعت اچانک بگڑ گئی۔ میں اس کے پاس بیٹھی اس کا ہاتھ پکڑے ہوئے تھی۔ میں چیخ کر کہنے لگی: ’’میری طرف دیکھو! میں رمشا ہوں، تمہاری بیوی۔ تم نے کہا تھا کہ تم ساری زندگی میرے ساتھ رہو گے۔ اب مجھے اکیلا چھوڑ کر کہاں جا رہے ہو؟‘‘ اس نے بڑی مشکل سے آنکھیں کھولیں، میری طرف دیکھا اور دھیمی آواز میں کہا: ’’اپنا خیال رکھنا، رمشا... خوش رہنا۔‘‘ پھر اس کا ہاتھ میرے ہاتھوں میں ڈھیلا پڑ گیا۔ میرا شوہر مجھے ہمیشہ کے لیے چھوڑ کر جا چکا تھا۔ میں اس کے سینے پر سر رکھ کر چیختی رہی: مگر اس بار اس نے میری آواز نہیں سنی۔ آج اس کی وفات کو ایک سال گزر چکا ہے۔ اب بھی صبح دو کپ چائے بناتی ہوں۔ ایک اپنے لیے اور دوسرا اس کی خالی کرسی کے سامنے رکھ دیتی ہوں۔ پھر اس کرسی کو دیکھ کر آہستہ سے کہتی ہوں: ’’دیکھو، آج چائے میں چینی کم ہے۔ تم ہوتے تو مجھے ضرور بتاتے۔‘‘ مگر اب مجھے جواب دینے والا کوئی نہیں۔ کچھ دن پہلے مجھے اس کی پرانی ڈائری ملی۔ اس میں اس نے لکھا تھا: ’’میں جانتا ہوں کہ رمشا مجھ سے خوش نہیں۔ شاید میں اسے وہ زندگی نہیں دے سکا جس کی اسے خواہش تھی۔ لیکن اللہ گواہ ہے کہ میں نے اس سے محبت کرنے میں کبھی کمی نہیں کی۔ میری بس ایک خواہش ہے کہ کسی دن وہ مجھے نفرت سے نہیں، محبت سے دیکھے۔ شاید اس دن مجھے لگے گا کہ میری زندگی کامیاب ہوگئی۔‘‘ یہ پڑھ کر میں زمین پر بیٹھ گئی اور پھوٹ پھوٹ کر روئی۔ ’’حامد! تم جیت گئے، تمہاری محبت سچی تھی اور میری نفرت غلط تھی۔ کاش میں تمہاری قدر تمہارے جیتے جی کرلیتی۔ کاش میں نے تمہیں کبھی محبت سے دیکھا ہوتا۔ کاش میں نے کبھی تمہارے پاس بیٹھ کر تمہارا حال پوچھا ہوتا۔‘‘ 🥀 میری کہانی سے اگر کسی کو کوئی سبق ملے تو بس اتنا کہ اپنے شریکِ حیات کی قدر اس کی زندگی میں کریں۔ کیونکہ بعض اوقات ایک معافی، ایک مسکراہٹ اور محبت کے دو بول کہنے میں کی گئی دیر پوری زندگی کا پچھتاوا بن جاتی ہے۔ - @writeswrites34