MANILA, Philippines — Inamin ni Interior and Local Government Secretary Jonvic Remulla na nagkamali siya sa hindi pag-aresto kay Senador Ronald “Bato” Dela Rosa noong nagkaroon ng pagkakataon sa Senado, habang patuloy na nakikipagnegosasyon ang pamahalaan sa mga umano’y makapangyarihang taong nagpoprotekta sa senador. “I dropped the ball. I should have arrested him in the Senate,” pag-amin ni Remulla sa panayam sa ANC noong Oktubre 19. Ayon sa DILG chief, pinili niyang igalang noon ang isang “gentleman’s agreement” kay Senador Alan Peter Cayetano na hindi aarestuhin si Dela Rosa sa loob ng Senado. Ngunit matapos makaalis ang senador, sinabi niyang hindi na niya muling kikilalanin ang naturang kasunduan bilang hadlang sa pagpapatupad ng batas. Kinumpirma rin ni Remulla na nasa Mindanao umano si Dela Rosa at pinoprotektahan ng isang makapangyarihang grupo na may kakayahang lumaban sa mga awtoridad. “They are a powerful group there that we have to negotiate,” ani Remulla. Nagbabala siya na maaaring maging madugo ang operasyon kapag puwersahang sinalakay ang kinaroroonan ng senador. Ayon sa kalihim, maaari umanong umabot sa daan-daan ang casualties sa hanay ng pulisya kung mauuwi sa armadong sagupaan ang pag-aresto. “We do not want a civil war to start because of our arrest of one man. We want to do it properly, we want to do it judiciously, and we want to do it cleanly,” paliwanag niya. Matatandaang naglabas ang International Criminal Court (ICC) ng arrest warrant laban kay Dela Rosa kaugnay ng alegasyon ng crimes against humanity of murder noong siya ang hepe ng Philippine National Police sa ilalim ng administrasyon ni dating Pangulong Rodrigo Duterte. Naging publiko ang warrant noong Mayo 11, 2026. Makalipas ang ilang araw, nakalabas si Dela Rosa sa Senate premises at mula noon ay hindi pa siya naaresto. Hindi pa siya nahahatulan ng ICC sa mga kasong ibinibintang sa kanya. Sa ngayon, mas pinipili ng DILG ang negosasyon para sa mapayapang pagsuko kaysa sa isang operasyong maaaring maglagay sa panganib sa buhay ng mga pulis at sibilyan. Ngunit sa sariling pag-amin ni Remulla, nagkaroon na ng pagkakataong maaresto si Dela Rosa—isang pagkakataong hindi nagamit at ngayo’y naging mas komplikadong operasyon dahil sa mga umano’y armadong protector ng senador. #AgendaPilipinas - @agendapilipinas