@qogamdyq_kelisim_krg: 2026 жылғы 20 қазанда Қарағанды облысының Достық үйінде Қазақстан Республикасының күніне орай «Өнеріміз саған – Қазақстан!» облыстық байқауы өтті. Байқау барысында түрлі этнос өкілдері қазақ тілінде ән шырқап, дәстүрлі күйлер орындап, ұлттық билерді ұсынды. Қатысушылар өз өнерлері арқылы мемлекеттік тілге және қазақ халқының мәдениетіне деген құрметтерін көрсетті. Іс-шарада Қарағанды облысы ішкі саясат басқармасының «Қоғамдық келісім» КММ директорының міндетін атқарушы Гүлнара Калиқызы Касембаева құттықтау сөз сөйлеп, қазақ мәдениеті мен мемлекеттік тілдің қоғамды біріктірудегі маңызды рөлін атап өтті. Сондай-ақ қазақ халқының мұрасы еліміздің әрбір азаматы үшін ортақ құндылық әрі мақтаныш екенін жеткізді. Қазақстан Халық Кеңесінің мүшесі, Қарағанды қаласындағы «Кәусар» оқушылар сарайының директоры Айгерім Әуэзқызы Исбекова өз сөзінде өзара құрметке, патриотизм мен саналы азаматтық ұстанымға негізделген жаңа қоғамдық сананы қалыптастырудың маңыздылығына тоқталды. Байқаудың ашылу рәсімінде «Айтұмар» үлгілі би ансамблі «Салтанат» хореографиялық композициясын орындады. Өңірдің әр түкпірінен келген шығармашылық ұжымдар мен жеке орындаушылар үш номинация бойынша бақ сынады: «Ән – достықтың алтын көпірі» (вокалдық өнер), «Күй күмбірі» (аспаптық өнер) және «Би – өнердің әсем өрнегі» (хореографиялық өнер). Қатысушылардың өнерін қоғам қайраткері Майра Төлеубекқызы Абдрахманова төрағалық еткен қазылар алқасы бағалады. Қазылар алқасының құрамына Қазақстан Республикасының еңбек сіңірген қайраткері, Қ. Байжанов атындағы концерттік бірлестіктің «Назқоңыр» ансамблінің солисі Полатхан Тохтанұлы Ташимов, Қарағанды қаласы Оқушылар сарайының «Волшебная страна» үлгілі хореографиялық ансамблінің көркемдік жетекшісі Ирина Юрьевна Вазем, «Русалица» халықтық ансамблі мен «МелодиКа» балалар вокалдық студиясының жетекшісі Евгения Юрьевна Ищенко кірді. Байқау қорытындысы бойынша жеңімпаздар анықталды. «Ән – достықтың алтын көпірі» номинациясы: I орын – Владимир Герок, Қарағанды қаласындағы № 6505 әскери бөлімінің әскери қызметшісі; II орын – Руслан Пегрусь, Саран қаласындағы «Kaztechna» ЖШС жұмысшысы; III орын – Айнұр Багирова, академик Е. А. Бөкетов атындағы Қарағанды ұлттық зерттеу университетінің 3-курс студенті. «Күй күмбірі» номинациясы: I орын – Георгий Перетятько, № 2 балалар музыка мектебі – ЮНЕСКО клубының оқушысы; II орын – Богдан Гарбузов, Қарағанды қаласындағы № 23 жалпы білім беретін мектептің оқушысы; III орын – Владислав Горизанов, Қарағанды қаласындағы «МегаСтройПлюс» ЖШС жобасының әкімшісі. «Би – өнердің әсем өрнегі» номинациясы: I орын – «Эдельвейс» үлгілі би ансамблі, Бұқар жырау ауданы; II орын – Марина Нан, Қарағанды қаласы; III орын – «Ивушка» ансамблі, Бұқар жырау ауданы. Байқау лауреаттары дипломдармен және ақшалай сертификаттармен марапатталды. Барлық қатысушыларға алғыс хаттар мен естелік сыйлықтар табысталды. «Өнеріміз саған – Қазақстан!» облыстық байқауы мәдени мұра мен мемлекеттік тілге деген құрмет Қазақстан халқының бірлігі мен ынтымағын нығайтудың берік негізі екенін көрсетті.

Қоғамдық келісім Қарағанды🇰🇿

Open In TikTok:

Region: KZ

Tuesday 20 October 2026 15:19:14 GMT