@jsvs144: كان نفسي الزمن يكون أحنّ من كده شوية يجمعنا في نفس الدرب نمشي أنا وإنت كتف بكتف، ماشيين بخطى ثابتة، وأنا ماسك يدك وأدلك على الطريق البودي للراحة والفرح الطريق البخلينا نحس إنو الدنيا لسه فيها أمان لكن الظاهر، المكتوب ما بيتهرب منه والقدر كان عندو حكاية تانية لينا 💔 أنا واقف في ضهرك طول الوقت واقف كصديق كزول همه يشوفك بخير حتى لو كان بعيد واقف سند، حتى لو ما قدرت أكون في حياتك بالطريقة البتمناها وده ما لأنو أنا ما حاولت، لكن لأنو الأيام مرات بتكون أقوى من رغبتنا الأيام دي علمتني إنو ما كل الزول البندخلو حياتنا بيكون عنده مكان دائم فيها في ناس بيجوا زي النسمة، يدخلوا حياتك ويغيّروا فيك أشياء كتيرة، يفتحوا ليك أبواب ما كنت تعرفها، وبعد داك يمشوا من غير ما يخلوك حتى تقول شكراً يمكن أنا واحد من الناس ديل جيت في حياتك، حاولت أكون جزء منها، لكن ما لقيت مكاني، أو يمكن مكاني ما كان مفروض يكون قريب 🥺💔 بقيت أشوفك في خيالي، وأعيش الحلم البنتمنى يكون حقيقة، لكن بيني وبينك سور كبير اسمو الظروف الفراق حصل قبل اللقاء، وكأنو الحكاية انكتبت نهايتها قبل ما تبدأ برغم الوجع، وبرغم الإحساس بالغربة وإنت موجود في نفس الدنيا معاي، ما في لحظة ح أكون نادم إني عرفتك. بالعكس، وجودك حتى لو كان عابر، كان نقطة ضوء في حياتي علّمتني حاجات ما كنت عارفها عن نفسي، فتحت لي أبواب فهمت منها معنى العِشرة الطيبة حتى لو كانت قصيرة ❤ ويمكن الزمن يمشي، ويمكن ما نلتقي، لكن الأثر البقيتِه في قلبي ح يفضل باقي، زي وشم ما بيتمسح في المواقف، في الأغاني البتحكي عن الحنين. وح أكون بدعي ليك، لأنو لما القلب يحب بصدق، الدعاء بيكون هو الصلة الأخيرة البتربطو بالشخص الغالي