WATUHUMIWA TISA WAKAMATWA KWA TUHUMA ZA KUHUSIKA NA MAUAJI YA MWANAFUNZI PEMBA ✍🏻 @rashidbattashy Jeshi la Polisi Mkoa wa Kaskazini Pemba limewakamata watuhumiwa tisa kwa tuhuma za kuhusika na mauaji ya mwanafunzi Raiyan Hemed Amour, mwenye umri wa miaka 15, aliyefariki Oktoba 2, 2026, huku uchunguzi wa tukio hilo ukiendelea. Akitoa taarifa hiyo, Kamanda wa Polisi Mkoa wa Kaskazini Pemba, Kamishna Msaidizi Mwandamizi wa Polisi William Mwampaghale, amesema tukio hilo lilitokea katika Kijiji cha Kwale Mpona, Shehia ya Finya, Wilaya ya Wete, Mkoa wa Kaskazini Pemba. Amesema mwanafunzi huyo alifariki baada ya mwili wake kukutwa Oktoba 4, 2026, majira ya saa 3:20 asubuhi, ukiwa na majeraha ya kukatwa katika kiganja cha mkono wa kulia na kitu chenye ncha kali. Kwa mujibu wa taarifa hiyo, watuhumiwa hao ni miongoni mwa watu zaidi ya 20 waliokamatwa na Jeshi la Polisi kuanzia Septemba 23 hadi Oktoba 21, 2026, kwa tuhuma mbalimbali za uhalifu, ikiwemo mauaji, wizi na makosa mengine ya jinai. Kamanda Mwampaghale amesema upelelezi wa tukio hilo unaendelea, na mara utakapokamilika, watuhumiwa watafikishwa mahakamani kwa hatua zaidi za kisheria. Aidha, Jeshi la Polisi limeendelea kutoa wito kwa wananchi kuzingatia sheria na kushirikiana na vyombo vya ulinzi na usalama katika kudumisha amani na utulivu nchini. - @rashidbattashy