@gulfexperttelugu: కువైట్ సిటీ, అక్టోబర్ 21:కువైట్‌లో పనిచేస్తున్న ప్రవాస కార్మికులకు ప్రతి నెలా 20వ తేదీలోపు జీతాలు చెల్లించాలని కంపెనీలకు ప్రభుత్వం గట్టి హెచ్చరిక జారీ చేసింది. నిర్ణీత గడువులోగా జీతాలు చెల్లించని కంపెనీల ఫైళ్లను మూసివేస్తామని కువైట్ మొదటి ఉప ప్రధానమంత్రి, అంతర్గత వ్యవహారాల మంత్రి షేక్ ఫహద్ అల్ యూసుఫ్ అల్ సబాహ్ స్పష్టం చేశారు. ప్రవాస కార్మికుల పట్ల మానవత్వంతో వ్యవహరించాలని, వారి జీవన పరిస్థితులు, ఆర్థిక అవసరాలను దృష్టిలో ఉంచుకుని కంపెనీలు పనిచేయాలని మంత్రి సూచించారు. దేశంలో ఎవరికీ అన్యాయం జరగనివ్వబోమని, కంపెనీ యజమానుల పేర్లు, పలుకుబడి ఏవైనా చట్టం అమలుకు అడ్డంకి కావని తెలిపారు. చట్టం అందరికీ సమానంగా వర్తిస్తుందని స్పష్టం చేశారు. కువైట్‌లో సుమారు 10,000 కంపెనీలు నెలల తరబడి ప్రవాస కార్మికులకు జీతాలు చెల్లించడం లేదని మంత్రి వెల్లడించారు. ఈ కంపెనీల్లో ఒక్కో సంస్థలో సగటున ఐదుగురు కార్మికులు పనిచేస్తున్నట్లు తెలిపారు. కొన్ని కంపెనీలు కార్మికులకు జీతాలు చెల్లించకుండానే చెల్లించినట్లు రికార్డుల్లో చూపిస్తున్నాయని చెప్పారు. ఇలాంటి అక్రమాలను అరికట్టేందుకు సెంట్రల్ బ్యాంకుతో కలిసి చర్యలు తీసుకుంటున్నట్లు వెల్లడించారు. జీతాల చెల్లింపు నిబంధనలు పాటించని కారణంగా 2026 జూన్ నాటికి 8,849 కంపెనీల ఫైళ్లను నిలిపివేసినట్లు మంత్రి తెలిపారు. కార్మికులకు జీతాలు చెల్లించకపోవడం, మానవ అక్రమ రవాణా, మనీలాండరింగ్ వంటి నేరాలు అంతర్జాతీయ స్థాయిలో కువైట్ ప్రతిష్ఠను దెబ్బతీస్తాయని ఆయన హెచ్చరించారు. గత రెండు వారాల్లో 300 మంది డెలివరీ కార్మికులను దేశం నుంచి బహిష్కరించినట్లు మంత్రి వెల్లడించారు. అలాగే, నిబంధనల ఉల్లంఘన పేరుతో కార్మికుల జీతాల్లో కోతలు విధించడాన్ని అంగీకరించబోమని స్పష్టం చేశారు. డ్రైవర్లుగా నియమించే వ్యక్తులు తమ స్వదేశాల్లో తగిన డ్రైవింగ్ శిక్షణ పొంది ఉండాలని సూచించారు. డెలివరీ కార్మికులతో రోజుకు 18 గంటల వరకు పని చేయిస్తూ వారిని దోపిడీ చేయడాన్ని ఎట్టి పరిస్థితుల్లోనూ అనుమతించబోమని మంత్రి హెచ్చరించారు. ప్రవాస కార్మికుల హక్కులను కాపాడేందుకు ప్రభుత్వం కఠిన చర్యలు కొనసాగిస్తుందని స్పష్టం చేశారు. #KuwaitNews #KuwaitNewsTelugu #GulfExpertTelugu #KuwaitExpats #KuwaitSalary

gulfexperttelugu

Open In TikTok:

Region: QA

Wednesday 21 October 2026 19:18:37 GMT