ҚАРАТАУДАҒЫ ҚАРҚЫН: АУЫЛДАРДЫҢ ӘЛЕУЕТІ АРТЫП, ИНФРАҚҰРЫЛЫМ ЖАҢАРУДА Қаратау ауылдық округіне қарасты елді мекендерде халықтың тұрмыс сапасын жақсартуға бағытталған ауқымды жұмыстар кезең-кезеңімен жүзеге асырылуда. Бұл туралы аудан әкімі Мұхит Тұрысбековтің Қаратау ауылдық округінің тұрғындарымен өткен кездесуінде кеңінен айтылды. Биылғы маңызды жобалардың бірі – Ақсүмбе елді мекеніне кіреберістегі ұзындығы 12 шақырым болатын KXSZ-12 «КХ-57 «Созақ–Бақырлы–Ақсүмбе» автомобиль жолын жөндеу жұмыстарының аяқталуы. Жолдың жаңаруы тұрғындар мен ауылға қатынайтын көліктердің қауіпсіз әрі қолайлы қозғалысына мүмкіндік береді. Бақырлы елді мекенінде де жол инфрақұрылымын жақсарту жұмыстары жалғасуда. Қазіргі таңда жалпы ұзындығы 4,36 шақырымды құрайтын Тұяқбаев, Е.Домбайұлы, Әбдішүкіров, А.Құнанбаев, Қалмырзаұлы және Шериздианұлы көшелеріне асфальт жабындысын төсеу жұмыстары басталды. Сонымен қатар ауылда ветеринариялық пункттің құрылысы қолға алынған. Кездесу барысында округтің әлеуметтік-экономикалық даму барысы сараланып, алдағы міндеттер айқындалды. Жиынға құқық қорғау органдарының, аудандық дербес бөлімдер мен мекеме басшылары қатысты. Аудан басшысы Мұхит Сексенбайұлы жол сапасын арттыру, әлеуметтік нысандардың құрылысын жүргізу және елді мекендерді абаттандыру бағытындағы жобалардың маңыздылығына тоқталды. Сондай-ақ ауданда атқарылып жатқан жұмыстардың нәтижелері мен алдағы жоспарларды атап өтті. Тұрғындар өз кезегінде елді мекендерде жүзеге асырылып жатқан жұмыстарға ризашылықтарын білдірді. Кездесу барысында жұмыспен қамту, тұрғын үй және басқа да әлеуметтік мәселелер бойынша бірқатар азамат жеке өтініштерін жеткізді. Көтерілген әр мәселе бойынша жауапты сала басшыларына нақты тапсырмалар берілді. Айта кетейік, Қаратау ауылдық округіндегі оң өзгерістер соңғы жылдары жүзеге асқан жобалармен де сабақтасып жатыр. Өткен жылы Бақырлы елді мекенін тәулік бойы сапалы ауыз сумен қамтамасыз ету жобасы іске асырылды. Жоба аясында «Қазатомөнеркәсіп» ҰАК» АҚ-ның еншілес ұйымы – «Волковгеология» АҚ демеушілігімен тереңдігі 180 және 780 метр болатын екі ұңғыма қазылуда. Сонымен қатар «Ауыл құтқарушысы» жобасы шеңберінде өрт сөндіру бекеті мен мал тоғыту орнының құрылысы аяқталды. Округке қарасты елді мекендердің ішкі көшелері толықтай жарықтандырылып, тұрғындарға жайлы орта қалыптастыруға мүмкіндік берді. Әлеуметтік және қоғамдық инфрақұрылымды дамыту бағытында да бірқатар нысандар ел игілігіне берілді. Ақсүмбе және Сарыжаз ауылдарында балалар ойын алаңдары мен кіші футбол алаңдары пайдалануға тапсырылды. Қаратау ауылдық мәдениет үйі ағымдағы жөндеуден өткізіліп, Жиенбет батыр көшесіне заманауи LED экран орнатылды. - @user5627996828530