လက်ရှိပြဿနာကို ဖြေရှင်းဖို့ဟာ အဓိက ဇစ်မြစ်ကို ရှင်းဖို့က အရေးအကြီးဆုံးပါပဲ။ ကာကွယ်ရေးဦးစီးချုပ်လို သာမန်ဝန်ထမ်းတစ်ဦးက နိုင်ငံတော်သမ္မတကို ဖမ်းဆီးတဲ့အပြင် အာဏာသိမ်းပြီး လိုရာပုဒ်မတပ် တရားစွဲတာဟာ ကြီးလေးတဲ့ ပြစ်မှုကျူးလွန်ခဲ့တာပါပဲ။ ပြည်သူတွေကို ဖမ်းဆီးပြီး အလောင်းလာထုတ်ခိုင်းတာ၊ ရွာတွေကို မီးရှို့တာ၊ အကျဉ်းထောင်ထဲမှာ နှိပ်စက်ခံရလို့ သေဆုံးသွားရတာ၊ လေယာဉ်နဲ့ ဗုံးကြဲလို့ သေကြရတာ ဒါတွေအားလုံးကလည်း ဆက်ပြီး ကျူးလွန်ခဲ့တဲ့ ရာဇဝတ်မှုတွေပါ။ ခေတ်အဆက်ဆက် တစ်ဖက်ကို ထောင်ထဲထည့်ထားပြီး စစ်တပ်လိုချင်တဲ့ ဇာတ်လမ်းတွေ ရေးခဲ့ပြီး နိုင်ငံတကာကို ရောင်းခဲ့ကြတာ အလုပ်မဖြစ်ဘူးဆိုတာ ၂၀၁၁ အခင်းအကျင်းက သက်သေပါပဲ။ ထွက်ပေါက်ပိတ်၊ နိုင်ငံတကာ လက်ခုတ်သံရဖို့ အဲအချိန်တုန်းကလည်း နိုင်ငံတော်အဆင့် သတင်းစာတွေမှာပါ လော်ဘီအမျိုးမျိုးကို စာရေးဆရာနာမည်တပ်ပြီး အပုတ်ချတဲ့ သတင်းတွေကို လုပ်ခဲ့ကြတဲ့ စစ်ဗိုလ်ချုပ်တွေကိုယ်တိုင်ပဲ အစ်မကြီး လွှတ်တော်ထဲ ဝင်ပေးပါဆိုပြီး ကမ်းလှမ်းခဲ့ရတာပါပဲ။ ဥပဒေမလေးစား၊ လူ့အခွင့်အရေးကို ချိုးဖောက်၊ စည်းမရှိ နည်းမရှိတဲ့ စစ်ဗိုလ်ချုပ်တွေနဲ့ အာဏာရှင်နိုင်ငံအချို့ကလွဲရင် ဘယ်နိုင်ငံကမှ ဆက်ဆံလိုစိတ်မရှိပါ။ ပြီးခဲ့တဲ့ နိုင်ငံပေါင်း (၁၈၄) နိုင်ငံပါဝင်တဲ့ ကမ္ဘာ့လွှတ်တော်ညီလာခံမှာ ၂၀၂၀ ရွေးကောက်ပွဲအနိုင်ရ လွှတ်တော်အမတ်တွေကိုပဲ နိုင်ငံကို ကိုယ်စားပြုတက်ရောက်ဖို့ ဆုံးဖြတ်ခဲ့ပါတယ်။ နိုင်ငံတကာပါလီမန်များအဖွဲ့ (IPU) ဆိုတာ ကုလသမဂ္ဂလို ကမ္ဘာလုံးဆိုင်ရာ နိုင်ငံတော်အဆင့်အ လွှတ်တော်တွေနဲ့ ဖွဲ့စည်းထားတဲ့ အဖွဲ့ဖြစ်တယ်။ ကုလကတော့ အစိုးရများနဲ့ ဖွဲ့စည်းထားတာ ဖြစ်တယ်။ အကြောင်းက စစ်တပ်က လုပ်တဲ့ ရွေးကောက်ပွဲကို ကုလကလည်း အသိအမှတ်မပြုသလို အာဆီယံကလည်း အသိအမှတ်မပြုထားဘူး။ အဓိက အရေးကြီးတာက အဲဒီတရားဝင် အစည်းအဝေးမှာလည်း "Military junta" အာဏာသိမ်းစစ်အစိုးရ လို့ သုံးနှုန်းသွားတယ်။ တရားဝင်နိုင်ငံတော် အစိုးရက လုပ်တဲ့ ရွေးကောက်ပွဲမဟုတ်ဘူး။ အာဏာသိမ်းထားတဲ့ စစ်တပ်က လုပ်တဲ့ ရွေးကောက်ပွဲလို့သာ သုံးနှုန်းပါတယ်။ အဲဒီညီလာခံမှာ တရုတ်၊ အိန္ဒိယ၊ ရှရှားလည်း အဖွဲ့ဝင်အဖြစ် တက်ရောက်ပါတယ်။ နှစ်နိုင်ငံခြား ဘာတွေပြောထားတယ်မသိပေမယ့် နိုင်ငံတကာအစည်းအဝေးမှာ သိက္ခာကျခံပြီး မကန့်ကွက်ခဲ့ပါဘူး။ အဲကြောင့် လက်ရှိ ကုလရဲ့ တရားဝင်ကိုယ်စားပြုခွင့်မှာလည်း နေပြည်တော်က အာဏာသိိမ်းအစိုးရ အစားထိုးနိုင်မှာ မဟုတ်ပါဘူး။ ဒီကြားထဲ အိမ်နီးချင်းတွေနဲ့ပဲ ရှေ့ဆက်လို့မထူးတဲ့ စစ်တပ်က အမေရိကန်အစိုးရဆီ ချဉ်းကပ်ခဲ့ပါသေးတယ်။ ဒါပေမယ့် မြန်မာနဲ့ပတ်သတ်ပြီး တစ်ကမ္ဘာလုံးက တောင်းဆိုထားတဲ့ အချက်တွေ ရှိတယ်။ အဲဒါတွေကို လုပ်မှ တရားဝင်ဆက်ဆံရေးလုပ်မယ်။ ပူးပေါင်းဆောင်ရွက်မှုလုပ်မယ်ဆိုတာ သူတို့ဘက်က ကိုင်ထားတဲ့ ရပ်တည်ချက်ပါ။ လက်ရှိ လေကြောင်းတိုက်ခိုက်မှုအပါအဝင် အကြမ်းဖက်နေတာတွေ ရပ်တန့်ပေးရမယ်။ နံပါတ်နှစ်က နိုင်ငံရေးအရ ဖိနှီပ်ဖို့ ဖမ်းဆီးထားတဲ့ သူတွေကို လွှတ်ပေးရမယ်။ အားလုံးပါဝင်တဲ့ စကားဝိုင်းကနေ ညှိနှိုင်းဖြေရှင်းဖို့ လုပ်ရမယ်။ မဲမသာမှုရှိတယ်ဆိုပြီး တရားဝင်နိုင်ငံတော်အစိုးရကို ပုန်ကန်ပြီး အာဏာသိမ်းယူခဲ့လို့ ဖြစ်တဲ့အတွက် ဒီပြဿနာတွေကို ဖြေရှင်းနိုင်ဖို့ဟာ တရားဝင်နိုင်ငံတော်အကြီးအကဲတွေကို လွှတ်ပေးပြီး ပြည်သူက ရွေးကောက်တင်မြှောက်ထားပြီး နိုင်ငံတကာက ယုံကြည်တဲ့ တရားဝင် ခေါင်းဆောင်တွေကို လွှတ်ပေးဖို့ပါပဲ။ ဖြေရှင်းရမယ့် ပြဿနာကို မဖြေရှင်းဘဲ ပြဿနာ မရှိချင်ယောင်ဆောင်ပြီး ဆက်သွားနေလို့လည်း ဘယ်နိုင်ငံ၊ ဘယ်အဖွဲ့အစည်းကမှ အသိအမှတ်ပြုမှု မပေးပါဘူး။ စရိတ်ကုန် စလုံပွန်းပဲ ဖြစ်ရုံပါပဲ။ #စစ်အာဏာရှင်စနစ်ကျဆုံးရမယ် - @jas.mine7522