🔻 Талдықорғанда бір ауысымда 500 адам қабылдайтын жаңа емхана ашылды Республика күні қарсаңында Талдықорған қаласында бір ауысымда 500 адам қабылдауға арналған заманауи емхана пайдалануға берілді. 62 мыңға жуық тұрғынға қызмет көрсететін медициналық нысанның ашылу салтанатына Жетісу облысының әкімі Бейбіт Исабаев қатысты. Өңір басшысы тұрғындарды жаңа емхананың ашылуымен құттықтап, халыққа сапалы әрі қолжетімді медициналық көмек көрсету басты міндеттердің бірі екенін атап өтті. – Мемлекет басшысы халықтың өмір сүру сапасын арттыруға, медициналық көмектің қолжетімділігі мен сапасын жақсартуға ерекше мән беріп келеді. Талдықорғанда үшінші емхананың ашылуы – осы бағыттағы жүйелі жұмыстардың нақты нәтижесі. Қаланың бұл бөлігінде тұрғындар саны артып келе жатқандықтан, заманауи медициналық нысан салу қажеттілігі туындады. Жаңа емхана халық игілігіне қызмет ете берсін! – деді облыс әкімі. Бес қабатты емхананың жалпы ауданы 11 562,7 шаршы метрді құрайды. Мұнда 32 медициналық учаске, отбасылық денсаулық орталығы, амбулаториялық хирургия бөлімі, күндізгі стационар және заманауи зертхана қарастырылған. Сонымен қатар магниттік-резонанстық және компьютерлік томографтар, рентген, маммография аппараттары орнатылған. Мекеменің штаттық бірліктерінің жалпы саны – 445. Жаңа нысанда мүмкіндігі шектеулі азаматтардың кедергісіз жүріп-тұруына да қолайлы жағдай жасалған. Салтанатты рәсімнен кейін облыс әкімі медициналық кабинеттерді аралап, заманауи жабдықтардың жұмысымен және тұрғындарға көрсетілетін қызмет түрлерімен танысты. Жаңа емхананың ашылғанына жергілікті тұрғындар да ризашылықтарын білдіріп, енді сапалы медициналық көмекті тұрғылықты жеріне жақын жерден алуға мүмкіндік туғанын атап өтті. Айта кетейік, Жетісу облысы құрылғаннан бері өңірде 149 жаңа медициналық нысан салынып, 15 нысан күрделі жөндеуден өтті. Оның ішінде 59 медициналық мекеме «Ауылдық денсаулық сақтауды жаңғырту» ұлттық жобасы аясында бой көтерді. Жетісу облысы әкімінің баспасөз қызметінің мәліметі бойынша. - @taldykorgan1868