WANAWAKE WAWILI WAKUTWA WAMEFARIKI DUNIA, WAMEFICHWA UVUNGUNI MWA KITANDA MBEYA Wanawake wawili wamekutwa wamefariki dunia na miili yao kufichwa uvunguni mwa kitanda katika chumba kimoja cha nyumba ya kulala wageni iitwayo Igogwe, iliyopo Mtaa wa Makunguru, Kata ya Ruanda, Tarafa ya Iyunga, jijini Mbeya, huku mmoja wa marehemu akitambulika kwa jina la Annastazia Mwakipesile, mwenye umri wa miaka 32. Jeshi la Polisi Mkoa wa Mbeya limethibitisha kutokea kwa tukio hilo, likieleza kuwa taarifa za kupatikana kwa miili hiyo zilitolewa Oktoba 16, 2026, majira ya saa 11:45 alfajiri, na Nice Kabuje, mhudumu wa nyumba hiyo ya kulala wageni. Mwili wa pili bado haujatambuliwa na umehifadhiwa katika Hospitali ya Rufaa Kanda ya Mbeya. Katika kuwasaka waliohusika na mauaji hayo, Jeshi la Polisi lilifanikiwa kumkamata Benson Steven, maarufu kwa jina la Mkembo, fundi sofa na mkazi wa Iwambi jijini Mbeya, Oktoba 21, 2026, majira ya saa 9 alasiri, eneo la Iyela jijini humo. Kwa mujibu wa uchunguzi wa awali wa Jeshi la Polisi, chanzo cha mauaji hayo kinadaiwa kuwa ni imani za kishirikina zilizolenga kupata utajiri, huku mtuhumiwa akieleza kuwa kabla ya kutekeleza kitendo hicho alikwenda kwa mganga wa jadi kwa ajili ya kupata masharti ya utajiri. Jeshi hilo limeeleza kuwa mtuhumiwa alikubali kwa hiari yake kuwaongoza askari kwenda nyumbani kwa mganga huyo. Hata hivyo, wakiwa njiani, mtuhumiwa aliruka kutoka kwenye gari na kuanza kukimbia, hali iliyosababisha askari kufyatua risasi tatu hewani kwa lengo la kumtahadharisha na kumtaka asimame. Kwa mujibu wa taarifa hiyo, baada ya mtuhumiwa kuendelea kukimbia, askari alifyatua risasi iliyompata katika paja la mguu wa kushoto. Mtuhumiwa alikimbizwa katika Hospitali ya Rufaa Kanda ya Mbeya kwa ajili ya matibabu, lakini alifariki dunia akiwa anaendelea kupatiwa matibabu. Aidha, kumbukumbu za Jeshi la Polisi zinaonesha kuwa Benson Steven aliwahi kukamatwa jijini Dar es Salaam na kushtakiwa kwa kosa la kuvunja nyumba usiku na kuiba, ambapo alitiwa hatiani na kuhukumiwa kifungo cha mwaka mmoja jela. Baada ya kumaliza kifungo hicho, alihamia jijini Mbeya. Pia, taarifa zinaonesha kuwa Desemba 29, 2025, mtuhumiwa alikamatwa eneo la Iwamb. #SautiyajamiiChanzochaUkweli - @knews24.media