🇦🇿 BU GÜN VƏTƏN MÜHARİBƏSİ QƏHRƏMANI SÜBHAN CƏBRAYILOVUN DOĞUM GÜNÜDÜR! 🇦🇿 Yaşasaydı, bu gün 43 yaşı tamam olacaqdı... Bəzi qəhrəmanlar var ki, onların ömrü yarımçıq qalsa da, göstərdikləri igidlik, mərdlik və Vətən sevgisi əbədi yaşayır. Baş gizir, Vətən Müharibəsi Qəhrəmanı Sübhan Cəbrayılov da adı Azərbaycan tarixinin şanlı səhifələrinə qızıl hərflərlə yazılan igidlərimizdəndir. Sübhan Cəbrayılov 23 oktyabr 1983-cü ildə Salyan rayonunun Marışlı kəndində dünyaya göz açıb. Hərbi xidmətə başladığı ilk gündən ömrünü Vətənin müdafiəsinə həsr edib, 2002-ci ildən Xüsusi Təyinatlı Qüvvələrin sıralarında xidmətini davam etdirib. Mərdliyi, qorxmazlığı, döyüş əzmi və peşəkarlığı ilə silahdaşlarının hörmətini qazanıb. 2020-ci ildə başlayan 44 günlük Vətən müharibəsində Cəbrayıl, Füzuli və Qubadlı istiqamətlərində, eləcə də Ərgünəş dağı və Hadrut uğrunda gedən ağır döyüşlərdə iştirak edib. O, torpaqlarımızın işğaldan azad olunması naminə düşmənlə ölüm-dirim mübarizəsinə atılıb. Oktyabrın 19-da Qubadlı istiqamətində strateji mövqelər uğrunda gedən ağır döyüşdə son nəfəsinədək vuruşaraq qəhrəmancasına şəhid olub. O, düşmən qarşısında geri çəkilməyən, qorxuya boyun əyməyən, Vətən naminə canından keçən mərd Azərbaycan oğlu idi! Taleyin acı yazısı budur ki, Sübhan Cəbrayılov oktyabr ayında dünyaya gəldi, oktyabr ayında şəhidlik zirvəsinə ucaldı və 23 oktyabrda — öz doğum günündə Sumqayıt Şəhidlər xiyabanında torpağa tapşırıldı. Onun doğum günü artıq yalnız bir yaşın tamam olması deyil, həm də Vətən uğrunda canından keçən qəhrəmanın əziz xatirəsini ehtiramla yad etmək günüdür. Azərbaycan Respublikasının Prezidenti İlham Əliyevin sərəncamları ilə Sübhan Cəbrayılova ölümündən sonra “Vətən Müharibəsi Qəhrəmanı” adı verilmiş, o, “Vətən uğrunda”, “Cəbrayılın azad olunmasına görə”, “Füzulinin azad olunmasına görə” və “Xocavəndin azad olunmasına görə” medalları ilə təltif edilmişdir. Bu gün Sübhanın 43 yaşı tamam olmalı idi... Kaş ki, doğum gününü doğmalarının əhatəsində qeyd edə, sevdiklərinin üzündə təbəssüm görə, üçrəngli bayrağımızın dalğalandığı azad torpaqlarda yaşaya biləydi. Lakin o, öz həyatını Vətənin azadlığına qurban verdi və adını qəhrəmanlıq salnaməmizə əbədi həkk etdirdi. Sübhan Cəbrayılov, sən Vətən üçün yaşayan, Vətən üçün döyüşən və Vətən uğrunda şəhid olan igidlərdənsən! Sənin kimi qəhrəmanların xatirəsi heç vaxt unudulmayacaq. Sənin qəhrəmanlığın gələcək nəsillərə örnək, adın isə Azərbaycan xalqının qəlbində əbədi yaşayacaq. 🎂 Doğum günün mübarək olsun, Vətən Müharibəsi Qəhrəmanı! 🕊️ Ruhun şad, məkanın cənnət olsun, mərd və qorxmaz Azərbaycan oğlu! Sübhan Cəbrayılov — Qəhrəmanlar ölmür, onlar xalqının yaddaşında əbədiləşirlər! 🇦🇿 - @eminnnn_