ဖြူးမြို့ ဒက္ခိဏာရုံ ကျောင်းတိုက်ကြီး၏ ကျောင်းဒါယကာများ ဖြစ်ကြသည် ။ သူတို့ မိသားစုသည် ဝါတွင်း ဥပုသ်နေ့တိုင်း ဥပုသ်မပြတ် စောင့်ထိန်းကြသည် ။ တရားဘာဝနာ ပွားများကြသည် ။ တစ်ချိန်တွင် ဝါတွင်း ဥပုသ်နေ့ ( ၂ ) နေ့ ဆက်ပြီး ကျောင်းဒါယကာ ဇနီးမောင်နှံတို့သည် ဥပုသ်စောင့် ပျက်ကွက်ကြသည် ။ နောက် တစ်ဥပုသ်နေ့ရောက်တော့ ပုံမှန်အတိုင်း ကျောင်းသို့ရောက်လာပြီး ဥပုသ်စောင့်ကြသည် ။ ဆရာတော်ဘုရားကြီးက ကျောင်းဒကာ ဇနီးမောင်နှံနှစ်ဦး အရင် ဥပုသ်နှစ်ပတ်က ဥပုသ်စောင့် မလာသည့်ကိစ္စ မေးသည် ။ " မှန်လှပါဘုရား၊ သားသမီးကိစ္စတွေ ဆောင်ရွက် လုပ်ကိုင်ပေးနေရတာနှင့် ဥပုသ် နှစ်ပတ် ပျက်သွားရပါတယ် ဘုရား " ဟု ကျောင်းဒါယကာကြီးက လျှောက်ထားသည်။ " အင်း•••သားသမီးကိစ္စ သားသမီးကိစ္စနဲ့ ••• သိပ်သံယောဇဉ်များ ဒုက္ခမပွားကြနဲ့ ၊ (သားစွဲ သမီးစွဲ ကျောပြဲရသည် ဆိုတဲ့စကား မကြားဖူးကြဘူးနဲ့ တူတယ်)" ဟု ဆရာတော်ကြီးက မိန့်ကြားသည် ။ " မှန်လှပါ မကြားဖူးပါဘူး၊ သိပါရစေဘုရာ " " အေး•••နားထောင်ကြ၊ ရှေးက ရွာတစ်ရွာမှာ လင်မယား နှစ်ယောက် ရှိကြသတဲ့ ။ သူတို့မှာ သမီးလေးတစ်ယောက် ကလည်း ရှိကြသတဲ့ ။ တစ်ဦးတည်း သမီးဆိုတော့ ချစ်လိုက်ကြတာကလည်း တုန်လို့တဲ့ ။ အချိန်တန် အရွယ်ရောက်တော့ သမီးလေးကို သင့်တော်သူနဲ့ အိမ်ထောင်ချပေးသတဲ့ ။ သမီးလေး အိမ်ထောင်ကျသွားသော်လည်း•• သမီးလေးကို မခွဲနိုင် မခွာရက်သည့်အတွက် အိမ်မှာပဲ အတူ လာနေစေသတဲ့ ။ သမီးနဲ့ သမက် ဝေယျာဝစ္စကိုလည်း အမြဲလုပ်ပေးနေရသလို•• ဘုရားသွား ကျောင်းတတ် ဥပုသ်သီတင်းတောင် ပုံမှန် မသွားနိုင် မစောင့်နိုင်ကြဘူးတဲ့ ။ ဒီလို သားစွဲ သမီးစွဲနှင့် အချိန်ကုန်လာခဲ့ရာကနေ အသက်အရွယ်က ကြီးကြီးလာပြီး အနာရောဂါကဖြစ်လာ ဖိစီးလာတော့ သေခြင်းတရားဘက်သို့ နီးလာသတဲ့ ။ ဒီလိုသေခြင်းတရား နီးလာတော့လည်း သားသမီး သံယောဇဉ်ကြောင့် တရားဓမ္မဘက် ကို မေ့နေကြသတဲ့ ။ ဒီလိုနဲ့ အဘွားကြီးက အရင်သေသတဲ့။ သေတော့ သမီးစွဲ သံယောဇဉ်ကြောင့် ထိုအိမ်မှာ ခွေးမကြီးပဲ ပြန်ဖြစ်ရသတဲ့ ။ အဘိုးကြီးလည်း မကြာခင်သေပြီး သမီးရဲ့ သံယောဇဉ်ကြောင့် ထိုအိမ်မှာပဲ နွားပြန်ဖြစ်ရသတဲ့ ။ ခွေးမကြီးက သမီးကို အလွန်ချစ်တော့ သမီးနားက မခွာဘဲ နေသတဲ့ ။ သမီး ထမင်းချက်ရာမှာလည်း အမြီး တနန့်နန့်နဲ့ ထဘီကို လျှာနှင့်လျက်ပေးသတဲ့ ။ အဘိုးကြီးတစ်ဖြစ်လဲ နွားကြီးကလည်း သမီးလယ်ယာမှာ တအားကုန်ကျုံး ထွန်ယက်လုပ်ကိုင် ပေးရသတဲ့ ။ ဒီလိုလုပ်ပေးရင်းကပင် သမီးယောက်ျားက နွားကျောပြင်ကို ခဏခဏ ရိုက်နှက်ပြီး စေခိုင်းသတဲ့ ။ တစ်နေ့ကျတော့ သမီးက မီးဖိုထဲ ထမင်းချက်နေရင်း အဆင်မပြေတာတစ်ခုဖြစ်ပြီး စိတ်မကြည်လင် ဒေါသဝင်နေသတဲ့ ။ အဲဒီအချိန်မှာ ‌ ခွေးမကြီးကလည်း ထုံးစံအတိုင်း သမီးနားလာပြီး သမီးကို လျှာနဲ့လျက်ပေးသတဲ့ ။ စိတ်မကြည်မလင် ဒေါသထွက်နေတဲ့ သမီးက••• " ဟဲ့•••လူက အလုပ်အဆင်မပြေလို့ ဒေါသထွက်နေရတဲ့အထဲ ဒီခွေးမက လာရှုပ်ပြန်ပြီ " ဆိုပြီး ရဲရဲတောက်နေတဲ့ မီးစနဲ့ ခွေးမဗိုက်ကို တအား ထိုးလိုက်သတဲ့။ မီးအပူရှိန်က ပြင်းထန်လေတော့ ခွေးမရဲ့ဗိုက်မှာ အရေခွံလန်ပြီး အဆီတရွှဲရွှဲနှင့် ပြင်းစွာ ခံရသတဲ့ ။ ခွေးမဟာ သူလို တိရစ္ဆာန် သဘာဝချင်းတူသူ ယောက်ျားကြီး ဒီအိမ်မှာ နွားဖြစ်နေတာကို သိသတဲ့ ။ အဲဒါနဲ့ ခွေးမဟာ ပြင်းထန်သော မီးလောင်ဒဏ်ကို အလူးအလိမ့်ခံ အော်ဟစ်ရင်း ••• သူ့ဘဝဟောင်းက ယောက်ျားဖြစ်တဲ့ နွားကြီး အလုပ်လုပ်နေရာ လယ်ယာထဲသို့ ပြေးသွားသတဲ့ ။ အဲဒီအချိန်မှာ သမက်ကလည်း မယားထမင်းလာပို့တာကို စောင့်ရင်း ထွန်ယက်မှု ခဏနားနေလို့ နွားများကို အနားပေးထားသတဲ့ ။ ခွေးမက နွားကြီးရှေ့သွားပြီး••• " ကြည့်စမ်းပါဦးတော် ရှင့်သမီးလုပ်ပုံက၊ ကျုပ်တို့မှာတော့ သမီးလေးချစ်လွန်လို့ ခွေးဖြစ်တာတောင် လိုက်လံစောင့်ရှောက်ပေးနေရတယ် ။ ယခုတော့ ကြည့်ပါဦး••• တော်သမီးက ကျွန်မဗိုက်ကို မီးစနဲ့ထိုးလိုက်တာ ဗိုက်မှာ အဆီတွေ ရွှဲရွှဲစိုတော့ တာပါပဲတော် " လို့ ပြောသတဲ့ ။ အဲဒီအခါမှာ ထွန်တုံးတန်းလန်းနဲ့ နွားကြီးက ခွေးမကို စိမ်းစိမ်းကြည့်ပြီး••• " ရှင်မ•••နင့်မှာက ယခုမှ ဗိုက်အဆီရွှဲဖြစ်အောင် မီးစနဲ့ အထိုးခံတယ် ။ ငါ့မှာက နင့်သမီးယောက်ျား နေ့စဉ်ရိုက်နှက်လို့ ကျောပြင်တစ်ခုလုံး ပြဲကွဲနေရတယ် ။ ဟဲ့ •••ချစ်ချင်ဦး နင့်သမီး " လို့ ပြောသတဲ့ ။ ယခုလည်း ကျောင်းဒကာတို့ သားစွဲ သမီးစွဲနေကြ••• ကျောပြဲနေကြဦးမယ်နော် " ဟု ဆရာတော်က ပြုံးပြုံးနှင့် မိန့်တော်မူရာ ကျောင်းဒါယကာ ဇနီးမောင်နှံနှင့် ဥပုသ်စောင့် ပရိတ်သတ်တို့မှာ သံဝေဂ လည်းရ၊ သဘောလည်းကျကြ၍ ရယ်မော ကြလေတော့သည် ။ ချမ်းသာ ကိုယ်စိတ် မြဲပါစေ။သားသမီးရှိ့မိဖများ ဖတ်စေခြင်းးးမင်ထံ ရွှေကျင်။ - @yamonekhin111