Қорғанминге қарасты Ұлттық әскери-патриоттық орталықтың басшысы болып тағайындалған Ринат Зайыт қазақ әскеріндегі идеологияны реформалауға кірісіп, халыққа уәде берді, деп хабарлайды Ertenmedia.kz. «Бір жылда, осыдан 12-14 айда нәтиже шығара алмасам, антымды бұзсам қара тас бассын! Нақты есебімді берейін. Егер іске асыра алмасам, бетіме айтыңыздар. Онда мен кешірім сұраймын да, бұдан былай мұндай қызметке өзім де жоламаймын. Мені де жолатпаңыздар деп айтуға ерік-жігерім жетеді», – деді Ринат Зайыт Adal Adam-ға берген сұхбатында. Айтуынша, қазір әскерде тәрбие мен идеология жүйесі ескі кеңестік қалыптан арыла алмай, әбден құлдырап тұр. Салдарынан қоғам сарбазды батыр емес, мүсіркейтін нысан көреді: «Көшеде жауынгер көрсек, оған мүсіркеп қараймыз. «Жаулап алды махабат» деп ән айтып келе жатады. Ондай әскерден жау қорқа ма? Әскер деген сенің қорғаның, батырың емес пе? Кезінде батырлардың атын білетін едік. Қазір балалар қазақ жауынгерінің түрі қандай болатынын да білмейді. Олар Маша мен Аюды, Фиксиктерді таниды. Әскердің киім үлгісін өзгерткеннен ештеңе шықпайды, ең бастысы сананы өзгертуіміз керек». Орталық басшысы әскери ант мәтініндегі қисынсыз тіркестер мен саптық әуендерді де өзгертпек. «Қатарға кіре отырып» деген сөзді ол «адам түрмеге отырады, ал сарбаз сапқа тұрады» деп сынады. Сондай-ақ сапта «Сарбазым» секілді қыздың әндерін айтуды тоқтатып, бабалар жырын марштық әуенге салу тапсырылған. Сонымен бірге Ринат Зайыт депутат кезіндегі басты талабынан айныған жоқ, министрлердің балалары да әскерге баруы тиіс деген ұстанымда. «Министрдің, АП қызметкерлерінің баласы да әскерге барып келсін. Екі айға, үш айға, тіпті бір жылға барсын. Мемлекеттік қызметші болғың келе ме, әкім немесе депутат болғың келе ме, онда балаңды әскерге жібер. Қойшының баласын жіберіп қойып, «менің балам бармайды» деу әділетті қоғам қағидасына қайшы», - дейді ол. Толығырақ телеграм арнамызда. Сілтеме профильде. - @ertenmedia