එක්දින ක්‍රිකට් ඉතිහාසයේ සාර්ථකව හඹාගිය දෙවන ඉහළම ලකුණු සංඛ්‍යාව වාර්තා කරමින්, එංගලන්තය දුන්නු ලකුණු 429ක දැවැන්ත ඉලක්කය පන්දු වාර 49.5කදී ලකුණු 430ක් ගහලා ශ්‍රී ලංකාව දිනපු ඒ අදහාගත නොහැකි ජයග්‍රහණය ගැන මුළු ලෝකයම තාමත් කතා වෙනවා. එංගලන්තයේ හැරී බෲක් පන්දු 114කින් වේගවත්ම ද්විත්ව ශතකය ගහලා විශිෂ්ට වාර්තාවක් තිබ්බත්, අවසානයේදී හැමෝගෙම අවධානය දිනාගත්තේ අපේ කොල්ලන්ගේ මේ අසාමාන්‍ය සටන්කාමී පිතිහරඹයයි. මේ ඓතිහාසික ජයග්‍රහණයෙන් පස්සේ ස්කයි ස්පෝට්ස් (Sky Sports) නාලිකාවේ පැවැත්වුණු තරග විග්‍රහයේදී ප්‍රවීණ විචාරක නසාර් හුසේන් සමඟින් එක්වුණු හිටපු ශ්‍රී ලංකා නායක කුමාර් සංගක්කාර, ශ්‍රී ලංකා කණ්ඩායමේ මේ අපූරු වෙනස ගැන හරිම ලස්සන කතාවක් කළා. සංගා කියන විදිහට, ලකුණු 429ක් හඹාගොස් ජයග්‍රහණය කිරීම කියන්නේ යුගයක බිහිවුණු විශිෂ්ටතම තරගයක්. ලංකාවේ කොල්ලෝ ආරම්භයේ සිටම ඉනිමේ වේගය (tempo) මනාව පාලනය කරපු හැටි ඔහු අගය කළා. පවන් රත්නායක සහ අවිශ්ක ප්‍රනාන්දු එකතු වෙලා අතීතයේ කරපු වැරදි හදාගෙන ඉතාමත් සැලසුම්සහගතව ස්ථාවර අඩිතාලමක් දාලා දුන්නා. ඊටපස්සේ ඉනිම අවසානයේදී දසුන් ශානක 190කට වැඩි ප්‍රහාරාත්මක වේගයකිනුත්, ජනිත් ලියනගේ 200කට වැඩි ප්‍රහාරාත්මක වේගයකිනුත් ගහපු ඒ විනාශකාරී ඉනිම් දෙක තමයි මේ වගේ අසීරු ඉලක්කයක් හඹායන්න ප්‍රධානම හේතුව වුණේ. ඒ වගේම වර්තමාන සීමිත ඕවර ක්‍රිකට්වලදී ඩගවුට් එකෙන් ලැබෙන සංඛ්‍යාලේඛන (analytics) වගේම නායකයාට සහ පුහුණුකරුට තියෙන ක්‍රිකට් බුද්ධිය (cricket nouse) මාරම වැදගත්. පහුගිය මාස 3-4 ඇතුළත ලංකාවේ තීරණ ගැනීමේ පැහැදිලි දියුණුවක් පෙනෙන්න තියෙන බව සංගා මතක් කළා. විශේෂයෙන්ම දසුන් ශානකව 40 වැනි ඕවරයට කලින් පිටියට යවපු එක අතිශය සාර්ථක තීරණයක්. මොකද දසුන් වේගපන්දුවට වගේම දඟපන්දුවටත් එක වගේ පහරදෙන නිසා, තරගයට වැඩිම බලපෑමක් කරන්න පුළුවන් සුදුසුම වෙලාවේ ඔහුව ඉහළට එවන්න තරම් කණ්ඩායම උපක්‍රමශීලී වුණා. අන්තිම මොහොතේදී ජනිත් ලියනගේ පෙන්වපු ඒ පුදුමාකාර සන්සුන් බව පසුපස තියෙන්නේ සැබෑ "Champion Mindset" එකක්. සංගා මෙතැනදී රාජස්ථාන් රෝයල්ස් කණ්ඩායම වෙනුවෙන් Red Bull මධ්‍යස්ථානයේදී පැවැති සම්මේලනයකදී ක්‍රීඩා මනෝවිද්‍යාඥයෙක් කියපු දෙයක් මතක් කළා. ඒ තමයි, "අපිට වරදීද" කියලා බය වෙන එක වගේම "අපි කොහොමත් දිනනවා" කියලා හිතන එකත් අන්තරාදායකයි. සැබෑ චැම්පියන් කෙනෙක් කරන්නේ ඒ දෙකම නැතුව පන්දුවෙන් පන්දුවට වර්තමානයේ විතරක් අවධානය තියන් ක්‍රීඩා කරන එකයි. ජනිත් අන්තිම ඕවරයේදී කළෙත් අන්න ඒ දේමයි. අවසාන වශයෙන් සංගක්කාර කිව්වේ, මේ ඓතිහාසික ජයග්‍රහණය විඳගන්න ගමන්ම තවමත් අපේ පන්දු යැවීම, පන්දු රැකීම සහ මුල් ඕවර 10 ඇතුළත සන්සුන් බව වැනි දියුණු විය යුතු තවත් බොහෝ පැති තියෙන බව අමතක නොකළ යුතු බවයි. හැබැයි ක්‍රීඩකයන්ට තමන්ගේ ස්ථානය ගැන විශ්වාසයක් දීලා එක දිගට සහය දක්වද්දී ලැබෙන ප්‍රතිඵලය මේ තරම් සුන්දරයි! #KumarSangakkara #RawalpindiMiracle #SriLankaCricket - @sportsslmania