VIDEO: Mkuu wa Wilaya ya Babati, Hashimu Mgandilwa, amewataka wenyeviti wa serikali za mitaa na vijiji kuzingatia majukumu yao ya uongozi na kujishughulisha na shughuli nyingine za uzalishaji mali, badala ya kutumia muda mwingi kukaa ofisini bila sababu za msingi. Mgandilwa ametoa kauli hiyo jana Oktoba 22, 2026 katika kikao na wenyeviti wa mitaa na vijiji, watendaji wa mitaa na vijiji pamoja na watendaji wa kata, kilicholenga kuwakumbusha viongozi hao majukumu yao na kuweka uelewa wa pamoja kuhusu utekelezaji wake ili kuepusha mkanganyiko kwa wananchi. Amesema nafasi za uenyekiti wa serikali za mitaa na vijiji hazimaanishi kuwa viongozi hao wanapaswa kukaa ofisini kuanzia wakati wa kufunguliwa hadi kufungwa, akisisitiza kuwa walitakiwa kuwa na shughuli nyingine za kujipatia kipato walipoomba nafasi hizo. “Wenyeviti wa vijiji, wenyeviti wa serikali za mitaa, nafikiri ni jambo ambalo tunalifahamu wakati wa uchukuaji wa fomu ambazo zimetupa nafasi hizi ambazo tunazitumikia. Fomu ile ilitutaka tuwe na shughuli nyingine za kujipatia kipato, sasa wapo wenyeviti ambao wanataka ofisi inapofunguliwa awepo ofisini mpaka inafungwa, si kazi yenu,” amesema DC Mgandilwa. Amesisitiza umuhimu wa viongozi hao kutekeleza majukumu yao kwa kuzingatia mahitaji ya wananchi, huku wakiendelea na shughuli nyingine za uzalishaji mali zinazowawezesha kujipatia kipato. - @jambotv_