🪷သံယောဇဉ်ဆိုတာ…🪷 🪷 ချစ်တတ်ဖို့လည်း လိုသလို 🪷 🪷 လွှတ်ချတတ်ဖို့လည်း လိုပါတယ်။🪷 ----------------------------------------- ဘဝမှာ ကိုယ်မြတ်နိုးခဲ့ရတဲ့ အရာတွေ၊ ကိုယ်ချစ်ခင်ခဲ့ရတဲ့ လူတွေကို လက်လွှတ်ပေးရမယ့် အချိန်တစ်ခု တစ်နေ့နေ့မှာ ရောက်လာတတ်ပါတယ်။ 🪷ချစ်ပါ။ မြတ်နိုးပါ။ တန်ဖိုးထားပါ။ ဒါပေမဲ့ မမြဲတဲ့အရာကို မြဲစေချင်တဲ့စိတ်နဲ့ သံယောဇဉ်နှောင်ကြိုးကို အတင်းဆုပ်ကိုင်ထားပြီး ကိုယ့်အေးချမ်းမှုကိုတော့ မစတေးလိုက်ပါနဲ့။ တကယ်တော့ မေတ္တာနဲ့ တဏှာဟာ မတူပါဘူး။ မေတ္တာဆိုတာ ကိုယ်ချစ်ရသူရဲ့ ကောင်းကျိုးချမ်းသာကို လိုလားပေးနိုင်တဲ့ စိတ်ပါ။ တဏှာဆိုတာကတော့ ကိုယ်လိုချင်တဲ့အရာကို ရရှိပိုင်ဆိုင်ဖို့၊ ကိုယ့်ဆန္ဒအတိုင်း ဖြစ်လာဖို့ တပ်မက်တောင့်တတဲ့ စိတ်ပါ။ မေတ္တာက ချစ်ရသူရဲ့ ချမ်းသာမှုကို လိုလားပေးတတ်ပေမဲ့ တဏှာကတော့ ကိုယ်လိုချင်သလို မဖြစ်လာတဲ့အခါ စိတ်ကို ပူလောင်စေတတ်ပါတယ်။ အဲဒီတွယ်တာနဲ့ တဏှာစိတ်လေးကပဲ သံယောဇဉ်ကို ဖြစ်စေတာပါ။ 🪷အနားမှာ ရှိနေစေချင်ပေမဲ့ ဝေးကွာသွားတဲ့အခါ၊ ပိုင်ဆိုင်ထားချင်ပေမဲ့ မပိုင်ဆိုင်နိုင်တဲ့အခါ၊ မပြောင်းလဲစေချင်ပေမဲ့ အရာရာ ပြောင်းလဲသွားတဲ့အခါ သံယောဇဥ်ကြောင့် စိတ်ဆင်းရဲရခြင်းရဲ့ အကြောင်းတရားတွေ ပေါ်ပေါက်လာတတ်ပါတယ်။ 🪷ဗုဒ္ဓတရားတော်အရ တွေ့ဆုံပြီး ကွဲကွာရတာကို အနိစ္စလို့ ခေါ်ပါတယ်။ အနိစ္စကိုနားလည်ပြီး အစွဲမပါတဲ့ မေတ္တာကို ချစ်တတ်တယ်လို့ ဆိုတာပါ။ အနိစ္စကို နားလည်ခြင်းဟာ ကိုယ်ချစ်ခင်ရတဲ့ အရာတွေဟာ အမြဲတမ်း ကိုယ့်အနားမှာ ရှိနေနိုင်မှာ မဟုတ်ကြောင်းကို သိမြင်ပြီး ရှိနေစဉ်မှာ တန်ဖိုးထားတတ်ဖို့ ဖြစ်ပါတယ်။ 🪷လွှတ်ချတတ်ခြင်းဆိုတာ မချစ်တော့လို့ မဟုတ်ပါဘူး။ ချစ်ခြင်းကို ပိုင်ဆိုင်လိုစိတ်နဲ့ မချည်နှောင်တော့ခြင်းပါ။ တွေ့ဆုံခွင့်ရတဲ့အခါ ကျေးဇူးတင်ပါ။ အတူရှိခွင့်ရတဲ့အချိန်မှာ မေတ္တာထားပါ။ ကိုယ်တတ်နိုင်သမျှ ကောင်းမွန်စွာ ဆက်ဆံပါ။ ခွဲခွာရတဲ့အခါမှာလည်း အမုန်းတရားနဲ့ ကိုယ့်စိတ်ကို ထပ်မံမချည်နှောင်ထားပါနဲ့။ 🪷သံယောဇဉ်ကို လုံးဝမထားတတ်ဖို့ထက် သံယောဇဉ်ကြောင့် ကိုယ့်စိတ်ကိုယ် အကျဉ်းချမိမနေဖို့က ပိုအရေးကြီးပါတယ်။ 🪷မမြဲတဲ့အရာကို မြဲမယ်လို့ မတောင်းဆိုပါနဲ့။ မထိန်းချုပ်နိုင်တဲ့ အရာတွေကို အတင်းအကျပ် မဆုပ်ကိုင်ပါနဲ့။ ကိုယ့်ဆန္ဒအတိုင်း မဖြစ်လာခြင်းကြောင့် ကိုယ့်စိတ်ထဲမှာ အမုန်းနဲ့ နာကျည်းမှုတွေ ထပ်မံမမွေးဖွားစေပါနဲ့။ 🪷နောက်ဆုံးမှာ အရေးကြီးဆုံးက ဘယ်သူနဲ့ ထာဝရအတူရှိခဲ့သလဲဆိုတာထက် အတူရှိခဲ့စဉ်မှာ ဘယ်လောက် မေတ္တာထားနိုင်ခဲ့သလဲ၊ စိတ်ချမ်းသာမှု ဘယ်လောက်ပေးနိုင်ခဲ့သလဲ၊ ခွဲခွာရတဲ့အခါ ဘယ်လောက် အမုန်းကင်းစွာ နေနိုင်ခဲ့သလဲဆိုတာပါပဲ။ ချစ်ခြင်းကို မစွန့်လွှတ်ပါနဲ့။ ချစ်ခြင်းနဲ့ ရောနှောနေတဲ့ တဏှာကိုသာ သတိနဲ့ ဆန်းစစ်ပါ။ 🪷မေတ္တာနဲ့ ချစ်တတ်ပြီး အနိစ္စသဘောကို နားလည်ကာ လွှတ်ချတတ်လာတဲ့အခါ သံယောဇဉ်ကြားမှာတောင် စိတ်အေးချမ်းမှုကို ရှာဖွေတွေ့ရှိနိုင်ပါလိမ့်မယ်။ #ကျေးဇူးတော်ရှင်ဖားအောက်ဆရာတော်ကြီး #သတ္တာဝါအားလုံးကျန်းမာချမ်းသာကြပါစေ #crd_to_owner_with_respect - @ven.kovida5