သို့ ဝန်ကြီးချုပ် ရန်ကုန်တိုင်းဒေသကြီးအစိုးရအဖွဲ့ နေ့စွဲ။ ၂၀၂၆ အောက်တိုဘာ ၂၃ ရက် အကြောင်းအရာ။ ။ နိုင်ငံတော်အကြီးအကဲ အငြိမ်းစားတစ်ဦးအား အုပ်စုဖွဲ့အနိုင်ကျင့်စော်ကားနေမှုနှင့် ဥပဒေမဲ့လုပ်ရပ်များအပေါ် ဥပဒေနှင့်အညီ အမြန်ဆုံးအရေးယူပေးပါရန် တင်ပြခြင်း။ ၁။ ကျွန်တော်သည် သတင်းမီဒီယာသမားတစ်ဦးဖြစ်သည်နှင့်အညီ ပြည်သူများ သတင်းအချက်အလက် မှန်ကန်စွာသိရှိရေး၊ တရားဥပဒေစိုးမိုးရေးနှင့် နိုင်ငံသားတိုင်း၏ တရားမျှတသော အခွင့်အရေးကို မျှတစွာ ကာကွယ်ဖော်ထုတ်ပေးရန် ရည်ရွယ်၍ ဤတင်ပြစာကို ပေးပို့အပ်ပါသည်။ ၂။ ယခုတင်ပြအပ်သော ဖြစ်စဉ်မှာ တပ်မတော်စစ်ဥပဒေချုပ်(ငြိမ်း)၊ သမ္မတရုံးဝန်ကြီး(ငြိမ်း) ဖြစ်သည့် အဘ ဦးစိုးမောင်၏ ပိုင်ဆိုင်မှုနှင့် လုပ်ကိုင်ခွင့်ရှိသော မြေယာအငြင်းပွားမှုဖြစ်စဉ်အပေါ် အခြေခံထားခြင်း ဖြစ်ပါသည်။ အဆိုပါမြေယာနှင့် ပတ်သက်၍ သက်ဆိုင်ရာ စိုက်ပျိုးရေး၊မွေးမြူရေးနှင့် ဆည်မြောင်းဝန်ကြီးဌာန၏ စီမံကိန်းမြေဖြစ်ပြီး စိုက်ပျိုးရေးလုပ်ငန်းများ လုပ်ကိုင်ရန် တရားဝင်ခွင့်ပြုထားသည့် မြေနေရာဖြစ်ကြောင်း သိရှိရပါသည်။ သို့သော် ယင်းမြေနေရာသို့ တရားဝင်ခွင့်ပြုချက်မရှိဘဲ အစုလိုက်အပြုံလိုက် ဝင်ရောက်ကျူးကျော်ခြင်း၊ စိုက်ပျိုးထားသည့် နှစ်ရှည်ပင်များနှင့် ခြံစည်းရိုးများကို ဖျက်ဆီးခြင်းတို့အပြင် တရားရုံး၏ အမိန့်အရ ဒဏ်ငွေချမှတ်ခံရသည်အထိ ဥပဒေကို ဖောက်ဖျက်ကျူးလွန်ခဲ့ကြသည်ကို စိစစ်တွေ့ရှိရပါသည်။ ၃။ သို့ဖြစ်ပါလျက်နှင့် ယခုအခါတွင် နိုင်ငံတော်အတွက် တာဝန်ထမ်းဆောင်ခဲ့ဖူးသည့် အငြိမ်းစားအကြီးအကဲတစ်ဦး၏ ဂုဏ်သိက္ခာကို ညှိုးနွမ်းစေရန်နှင့် လူထုအထင်အမြင်လွဲမှားစေရန် ရည်ရွယ်ကာ လူမှုမီဒီယာပလက်ဖောင်းများပေါ်တွင် တစ်ဖက်သတ်အချက်အလက်အမှားများဖြင့် ဗီဒီယိုဖိုင်များဖြန့်ဝေခြင်း၊ အုပ်စုဖွဲ့ဖိအားပေးခြိမ်းခြောက်ခြင်းနှင့် လူအများရှေ့တွင် အနိုင်ကျင့်စော်ကားနေမှုများကိုပါ ထပ်မံကျူးလွန်လျက်ရှိသည်ကို တွေ့ရှိရပါသည်။ ဤကဲ့သို့သော လုပ်ရပ်များသည် တစ်ဦးတစ်ယောက်ချင်း၏ ဂုဏ်သိက္ခာနှင့် လုံခြုံရေးကို ထိခိုက်စေရုံသာမက နိုင်ငံတော်၏ ဂုဏ်ထူးဆောင်ပုဂ္ဂိုလ်များအပေါ် မထီလေးစားပြုလုပ်သည့် အန္တရာယ်ကြီးမားသော တရားဥပဒေစိုးမိုးရေး ချိုးဖောက်မှုတစ်ခုပင် ဖြစ်ပါသည်။ ၄။ မည်သည့်နိုင်ငံသားမဆို၊ မည်သည့်အငြိမ်းစားအကြီးအကဲမဆို ဥပဒေ၏အကာအကွယ်ကို တန်းတူညီမျှ ခံစားခွင့်ရှိရမည်ဖြစ်ပြီး၊ မည်သူတစ်ဦးတစ်ယောက်မျှ မိမိတို့၏ အုပ်စုဖွဲ့အာဏာပြမှုများ၊ ဥပဒေမဲ့ခြိမ်းခြောက်ဖျက်ဆီးမှုများဖြင့် အခြားသူ၏ အခွင့်အရေးကို ထိပါးချိုးဖောက်ခွင့် မရှိပါ။ ထို့ကြောင့် ဤကဲ့သို့ အုပ်စုဖွဲ့အနိုင်ကျင့်နေမှုများကို ထိရောက်စွာ အရေးမယူပါက တရားဥပဒေအပေါ် ပြည်သူများ၏ ယုံကြည်ကိုးစားမှုကိုပါ ထိခိုက်လာနိုင်ပါသည်။ ၅။ သို့ဖြစ်ပါ၍ နိုင်ငံတော်အကြီးအကဲ အငြိမ်းစားတစ်ဦးနှင့် သက်ဆိုင်သူများ၏ ဂုဏ်သိက္ခာ၊ လုံခြုံရေးနှင့် တရားမျှတမှုတို့အတွက် အောက်ပါအချက်များကို သက်ဆိုင်ရာဌာနများနှင့် ညှိနှိုင်း၍ အမြန်ဆုံး စိစစ်ဖော်ထုတ် အရေးယူပေးပါရန် တင်ပြအပ်ပါသည် - (က) မြေယာအသုံးပြုခွင့်ဆိုင်ရာ တရားဝင်စာရွက်စာတမ်းများ၊ တရားရုံး၏ အမိန့်နှင့် ဆုံးဖြတ်ချက်များကို သက်ဆိုင်ရာဌာနများမှ စိစစ်အတည်ပြုပေးရန်။ (ခ) မြေယာအတွင်းသို့ အစုလိုက်အပြုံလိုက် တရားဝင်ခွင့်ပြုချက်မရှိဘဲ ဝင်ရောက်ခြင်း၊ သီးနှံပင်များနှင့် ခြံစည်းရိုးများအား ဖျက်ဆီးခြင်း၊ ခြိမ်းခြောက်အနိုင်ကျင့်ခြင်းစသည့် ဥပဒေချိုးဖောက်မှုများကို သက်‌သေအထောက် အထားများအပေါ်မူတည်၍ တရားဥပဒေနှင့်အညီ ထိရောက်စွာ အရေးယူပေးရန်။ (ဂ) လူမှုမီဒီယာပေါ်တွင် တစ်ဖက်သတ်ပုံဖော်ကာ ဂုဏ်သိက္ခာညှိုးနွမ်းစေရန် ရည်ရွယ်ဖြန့်ဝေနေသော သတင်းတု၊ ဗီဒီယိုဖိုင်များနှင့် အုပ်စုဖွဲ့ဖိအားပေးနေမှုများကို မူရင်းအထောက် အထားများဖြင့် စစ်ဆေးပြီး တည်ဆဲဥပဒေများအတိုင်း အမြန်ဆုံး အရေးယူဆောင်ရွက်ပေးရန်။ (ဃ) တရားရုံး၏ အမိန့်နှင့် ဆုံးဖြတ်ချက်များကို လိုက်နာမှုမရှိဘဲ ဆက်လက်နှောင့်ယှက်ဖျက်ဆီးနေမှုများအပေါ် လုပ်ထုံး လုပ်နည်း နှင့်အညီ အားဖြည့်ကိုင်တွယ်ပေးရန်။ (င) မည်သည့်ဘက်လိုက်မှုမျှမရှိဘဲ တရားမျှတပြီး ပွင့်လင်းမြင်သာသော စုံစမ်းစစ်ဆေးမှုဖြင့် သက်ဆိုင်သူအားလုံး၏ အခွင့်အရေးကို ကာကွယ်ပေးရန်။ သတင်းသမားတစ်ဦးအနေဖြင့် အမှန်တရား၊ တရားဥပဒေစိုးမိုးရေးနှင့် တရားမျှတမှုတို့ ဖော်ဆောင်နိုင်ရေးအတွက် ဤတင်ပြချက်ကို ပေးပို့အပ်ပါသည်။ လေးစားစွာဖြင့် ဌေးအောင် အယ်ဒီတာ Orchid News Agency - @peer8786