မိဘတို့၏ မျှော်လင့်ချက်( ၅ )မျိုး **************************** ဖတ်ကြည့်နော်... #အမြော်အမြင်ရှိတဲ့သူတိုင်း မျှော်လင့်ချက် ရှိကြပါတယ်။ မိဘတွေလည်း မျှော်လင့်ချက် ရှိတာပဲ။ ဆရာတွေလည်း မျှော်လင့်ချက် ရှိတာပဲ။ ခေါင်းဆောင်တွေလည်း မျှော်လင့်ချက် ရှိကြတာပဲ။ #မိဘတွေဟာ... သား သမီးတွေနဲ့ ပတ်သက်ပြီး မျှော်လင့်ချက်( ၅ )မျိုး ရှိသတဲ့။ အဲဒီ မျှော်လင့်ချက်( ၅ )မျိုးက... ၁။ သား သမီးတွေဟာ ငါတို့ အသက်ကြီးတဲ့အခါ ငါတို့ကို ပြန်လုပ်ကျွေးလိမ့်မယ်လို့ မိဘတွေက မျှော်လင့်ကြတယ်။ ဘယ်သူပဲဖြစ်ဖြစ် အိုမင်းမစွမ်း ဖြစ်လာတဲ့အခါ သူများကို အားကိုးရတယ်။ မိဘတွေဟာ သူစိမ်းကို အားမကိုးချင်ဘူး။ ကိုယ့်ရဲ့သား သမီးကိုပဲ အားကိုးချင်ကြတယ်။ ဒါမှလည်း အငြိုအငြင် မခံရမှာကိုး။ ၂။ သား သမီးတွေဟာ... ငါတို့ရဲ့ လူမှုရေးကိစ္စ စီးပွားရေးကိစ္စတွေကိုလည်း ဆောင်ရွက်ကြလိမ့်မယ်လို့လည်း မျှော်လင့်ကြတယ်။ အသက်ကြီးလာတော့... မိဘတွေဟာ လူမှုရေးလည်း မလုပ်နိုင်တော့ဘူး၊ စီးပွားရေးလည်း မလုပ်နိုင်တော့ဘူး။ ဒီတော့ ကိုယ့် သား သမီးတွေကိုပဲ မိဘကိုယ်စား လုပ်စေချင်ကြတယ်။ သား သမီးတွေကို သားစဥ်မြေးဆက် တိုးတက်စေချင်တဲ့ စေတနာပဲ ဖြစ်ပါတယ်။ ၃။ သား သမီးတွေဟာ... ငါတို့ရဲ့ မျိုးနွယ်ကိုလည်း စောင့်ကြလိမ့်မယ်လို့လည်း မျှော်လင့်ကြတယ်။ မိဘတွေဟာ... ဘာသာတရား ဓလေ့ထုံးတမ်း ရိုးရာ ယဥ်ကျေးမှုနှင့် ပတ်သက်ပြီး သား သမီးတွေကို ဆက်လက်ပြီး ထိန်းသိမ်းစေချင်တယ်။ သား သမီးတွေကို လူတော်လူကောင်းလေးတွေ ဖြစ်စေချင်တဲ့ စေတနာလို့ ဆိုရမှာပါ။ ၄။ သား သမီးတွေဟာ... ငါတို့ရဲ့ အမွေကိုလည်း သားစဥ်မြေးဆက် ထိန်းသိမ်းကြလိမ့်မယ်လို့လည်း မျှော်လင့်ကြတယ်။ သူတို့ ကြိုးစားပမ်းစား ရှာဖွေထားတဲ့ လယ်ယာ အိုးအိမ် တိုက်တာတွေကို တန်ဖိုးထားစေချင်တယ်။ နောင်လာနောက်သားတွေအတွက် ထားရှိတဲ့ စေတနာလို့ ပြောရမှာပါ။ ၅။ သား သမီးတွေဟာ... ငါတို့သေတဲ့အခါ ကုသိုလ်လုပ်ပြီး ငါတို့ကို အမျှဝေကြလိမ့်မယ်လို့လည်း မျှော်လင့်ကြတယ်။ လူတိုင်းလူတိုင်း တစ်နေ့ကျရင် သေရမှာ မဟုတ်လား-? သေတဲ့အခါ... ကောင်းတဲ့ဘဝ ကူးပြောင်းတာ ရှိတယ်။ မကောင်းတဲ့ဘဝ ကူးပြောင်းတာ ရှိတယ်။ အကယ်၍ မကောင်းတဲ့ဘဝများ ကူးပြောင်းခဲ့ရင် အားကိုးရဖို့အတွက် မျှော်လင့်ချက်ထားတဲ့ သဘောပဲ ဖြစ်ပါတယ်။ နောက်တစ်ခုက... သောကကို ကုသိုလ်နှင့် အစားထိုးခိုင်းတဲ့သဘောလည်း ဖြစ်ပါတယ်။ #ဘာပဲဖြစ်ဖြစ် သား သမီးတွေဟာ မိဘတွေရဲ့ စေတနာကိုတော့ တန်ဖိုးထားဖို့ လိုတယ်။ ဒါမှလည်း မိဘတွေကို ကျေးဇူးဆပ်ရာ ရောက်မှာပါ။ မိဘတွေကို ကျေးဇူးဆပ်မှလည်း ကိုယ့်ဘဝဟာ ကျေနပ်စရာ ဖြစ်မယ်။ ကျေနပ်စရာ ဖြစ်မှလည်း ကိုယ်"ရ"နေတဲ့ဘဝလေးကို "အရတော်လှ လူ့ဘဝ" လို့ ဆိုရမှာ မဟုတ်ပါလား။ မူရင်း-Credit- အင်ကြင်းမြိုင်ဆရာတော် အရှင်ဒေဝိန္ဒာဘိဝံသ မေတ္တာဖြင့်... အရှင်ပုည( ဝကုန်း ) မဟာအောင်မြေကျောင်းတိုက် နေပြည်တော် တပ်ကုန်းမြို့ - @lwin.aung538