@myatthunews: 24 Oct 2026 ရှမ်းပြည်နယ်မြောက်ပိုင်း၊ နောင်ချိုမြို့ရှိ မြို့မအစ္စလာမ်ဗလီ အဆောက်အအုံကို ပြည်သူ့ဘဏ္ဍာအဖြစ် သိမ်းဆည်းရန်နှင့် ဗလီမှ တရားဟောဆရာ နှစ်ဦးအား အကြမ်းဖက်မှုတိုက်ဖျက်ရေး ဥပဒေ ပုဒ်မများဖြင့် ထောင်ဒဏ် ၁၁ နှစ်စီ ကျခံစေရန် စစ်ကောင်စီလက်အောက်ခံ ကျောက်မဲခရိုင်တရားရုံးက အမိန့်ချမှတ်လိုက်ကြောင်း သိရသည်။ ကျောက်မဲခရိုင် တရားသူကြီး ကျော်စိုးခိုင်က ရာဇသတ်ကြီးမှုအမှတ် ၃/၂၀၂၅ ဖြင့် စီရင်ချက်ချရာတွင် တရားခံဟု စစ်ကောင်စီက သတ်မှတ်ထားကြသည့် ဦးလုထွေးနှင့် ဦးစိုးသိန်းတို့နှစ်ဦးအား အကြမ်းဖက်မှုတိုက်ဖျက်ရေးဥပဒေ ပုဒ်မ ၅၀(ည) အရ အလုပ်နှင့်ထောင်ဒဏ် ၁၁ နှစ်စီ၊ ပုဒ်မ ၅၂(က) အရ အလုပ်နှင့်ထောင်ဒဏ် ၃ နှစ်စီ ချမှတ်ခဲ့ပြီး ပြစ်ဒဏ်များကို တစ်ပေါင်းတည်းကျခံစေရန် အမိန့်ပေးခဲ့ခြင်းဖြစ်သည်။ ထို့အပြင် နောင်ချိုမြို့၊ ဈေးရပ်ကွက်၊ နယ်မြေ (၆) တွင် တည်ရှိသည့် အလျား ၅၅ ပေ၊ အနံ ၆၀ ပေရှိ မြေကွက်နှင့် အဆိုပါ မြေကွက်ပေါ်တွင် ဆောက်လုပ်ထားသည့် အလျား ၅၀ ပေ၊ အနံ ၆၀ ပေ၊ အမြင့် ၃၀ ပေရှိ အစ္စလာမ်ဘာသာရေးဝတ်ပြု မြို့မဗလီ အဆောက်အအုံ (၁) လုံးကိုလည်း ပြည်သူ့ဘဏ္ဍာအဖြစ် သိမ်းဆည်းရန် စီရင်ချက်တွင် ပါရှိသည်။ တစ်ဦးတစ်ယောက်၏ စွပ်စွဲချက်အပေါ် မူတည်၍ မြို့ပေါ်ရှိ မွတ်စလင်မ်ထု တစ်ခုလုံးနှင့် သက်ဆိုင်သည့် ဗလီကြီးအား ပြည်သူ့ဘဏ္ဍာအဖြစ် သိမ်းဆည်းလိုက်ခြင်းသည် ဖွဲ့စည်းပုံအခြေခံဥပဒေပါ ဘာသာရေး လွတ်လပ်စွာ ကိုးကွယ်ခွင့်ကို ပိတ်ပင်လိုက်ခြင်း ဖြစ်ကြောင်း နောင်ချိုမြို့ခံ မွတ်စလင်မ်အသိုင်းအဝိုင်းက ဝေဖန်ပြောဆိုသည်။ “အများမွတ်စလင်မ်ထုနဲ့ သက်ဆိုင်တဲ့ ဗလီကြီးကို ပြည်သူ့ဘဏ္ဍာအဖြစ် သိမ်းဆည်းတာဟာ ဘာသာရေးလွတ်လပ်ခွင့် မရှိ၊ လွတ်လပ်စွာ ကိုးကွယ်ခွင့်ကို ပိတ်ပင်လိုက်တာဖြစ်တယ်။ အများပိုင် ပစ္စည်းကို သူပိုင်တာ မဟုတ်ဘဲ သိမ်းယူတဲ့ အမိန့်ကို သဘောရိုးနဲ့ လက်ခံလို့ မရပါဘူး” ဟု နောင်ချိုမြို့ခံတစ်ဦးက Myanmar Muslims News Network လူမှုကွန်ရက်ကတစ်ဆင့် ပြောဆိုသည်။ ပြီးခဲ့သည့် ၂၀၂၅ ခုနှစ် ဇူလိုင်လအတွင်း တအာင်းအမျိုးသားလွတ်မြောက်ရေးတပ်မတော် (TNLA) ထိန်းချုပ်ထားသည့် နောင်ချိုမြို့ကို စစ်ကောင်စီတပ်က ပြန်လည်ဝင်ရောက်တိုက်ခိုက်ပြီးနောက် တော်လှန်ရေးအဖွဲ့များနှင့် ဆက်စပ်သည်ဆိုသည့် စွပ်စွဲချက်ဖြင့် မြို့မဗလီကြီး အပါအဝင် ဂေါ်ရခါး ဘာသာရေးအဖွဲ့၏ တည်းခိုရိပ်သာ၊ ရွှေဆိုင်၊ ဓာတ်ဆီဆိုင်များနှင့် အရပ်သားနေအိမ် ၂၀ ကျော်ကို စစ်တပ်က လိုက်လံချိတ်ပိတ်ခဲ့ခြင်း ဖြစ်သည်။ အဆိုပါ မြို့မဗလီကို စစ်တပ်က စတင်ဝင်ရောက်စဉ်က ခွင့်ပြုချက်မရှိဘဲ ပြင်ဆင်ဆောက်လုပ်သည်ဟု အကြောင်းပြကာ ချိတ်ပိတ်ခဲ့ရာမှ ယခုအခါ အကြမ်းဖက်မှု ပုဒ်မများ တပ်ကာ အပြီးသတ် ပြည်သူ့ဘဏ္ဍာအဖြစ် သိမ်းဆည်းလိုက်ခြင်းဖြစ်သည်။ #MPA #နောင်ချိုဗလီ #ဘာသာရေး

TK Khaing

Open In TikTok:

Region: MM

Saturday 24 October 2026 12:17:37 GMT