@leqalxeber.az: ABŞ kəşfiyyatı İranın Yaxın Şərqdə və digər ölkələrdə amerikalılara qarşı mümkün hücumlar hazırladığı barədə məlumat əldə edib. LEQAL XƏBƏR məlumat verir ki, bu barədə “The New York Times” qəzeti ABŞ rəsmilərinin açıqlamalarına istinadən məlumat yayıb. ABŞ Milli Kəşfiyyatının direktoru Cey Kleytonun dövlət katibi Marko Rubioya göndərdiyi memorandumda Dövlət Departamentinin əməkdaşları üçün yarana biləcək təhlükələr barədə xəbərdarlıq edilib. Amerika qurumlarının qiymətləndirməsinə görə, fevral ayında müharibə başlayandan bəri Yaxın Şərqdə və bir sıra digər ölkələrdə ABŞ vətəndaşları üçün təhlükə ən yüksək səviyyəyə çatıb. ABŞ Prezidenti Donald Tramp və onun yaxın köməkçiləri artan risklər barədə mütəmadi məlumatlandırılırlar. Qəzetin mənbələrinin bildirdiyinə görə, bəzi kəşfiyyat məlumatları İranın ABŞ ərazisində əməliyyatçılarının ola biləcəyinə işarə edir. Avropadakı obyektlər də mümkün hədəflər sırasında göstərilir. Mövcud təhlükələr fonunda ABŞ Dövlət Departamenti Səudiyyə Ərəbistanında çalışan və fəaliyyəti zəruri olmayan əməkdaşlarına, eləcə də onların ailə üzvlərinə ölkəni tərk etmək barədə göstəriş verib. Yaxın Şərqdəki digər Amerika diplomatik nümayəndəliklərində də əməkdaşların sayı azaldılır. Məlumata görə, Tehran ABŞ və İsrailin yeni hücumları baş verəcəyi təqdirdə Fars körfəzində sualtı kommunikasiya kabellərinə zərbələr endirmək planlarını da nəzərdən keçirir. #iran #ABŞ #yaxınşərq
