#creatorsearchinsights #سودانيز_تيك_توك_مشاهير_السودان كل زول قرّب منك كان قلبه معاك، وما كل زول شاركك الطريق كان ناوي يكملو للنهاية.. في ناس بتجيك عشان مصلحة، ولمن تنتهي مصلحتها، بتنتهي معاها الحكاية، وكأنك ما كنت يوم جزء من عمرها. وفي ناس بتبيع العِشرة في لحظة، وتنسى سنين المواقف والودّ، وكأن القلوب عندها ما بتتوجع، وكأن الذكريات ما عندها قيمة. لكن نحنا اتربّينا على إنو العِشرة ما بتترمي، والوفاء ما بتغيّرو الظروف، والناس البتسكن الروح ما بنستبدلها لمجرد إنو لقينا غيرها. نحنا لمن نحب، بنحب بصدق، ولمن ندي الأمان، بندّيهو من غير حساب، ولمن نختار زول، بنختارو بقلبنا قبل عيونا.. وعشان كدا وجعنا ما بيكون من الفراق براهو، وجعنا الحقيقي بيكون لمن نكتشف إنو الزول الكنا حافظين ليهو مقام، كان شايل لينا مكان مؤقت في حياتو. لكن الأيام عندها طريقتها في كشف الحقائق.. بتعرّفك قيمة الزول الخسرتو، وبتعرّفك حقيقة الزول البعتّو. وما كل فراق خسارة، وما كل بقاء مكسب؛ مرات البُعد بكون نجاة من وجع كان مستنيك، ومرات فقدان زول بكون أول خطوة في طريق راحتك. نحنا ما بنندم على قلب حب بصدق، ولا على عِشرة حفظناها، ولا على وفاء قدّمناه.. لأنو دي أخلاقنا، ما ردّة فعل على أخلاق الآخرين. والما عرف قيمة وجودنا، الزمن كفيل يعلّمو إنو في زول كان ممكن يلقى معاهو راحة ما بتتكرر، وصدق ما بتلقاهو في كل طريق. والله ما كل البفارق بننساه، لكن بنتعلّم كيف نخلي مكانو في الذكريات، بدل ما نخليهو يتحكم في بقية عمرنا. #aberheroof - @aberheroof