တောင်ဥက္ကလာပ VIBE KTV တွင် အုတ်ဖိုမြို့နယ် တွဲဖက်တရားသူကြီး နွယ်နီမြင့်၊ ဖြူးမြို့နယ် တရားသူကြီး အိမ့်မှူးခင်၊ စစ်ဆေးဆရာဝန်ဗိုလ်မှူး ထွန်းလင်းစိုး၊ ဗိုလ်ကြီးကောင်းသန့်မင်း တို့ကို မူးယစ်ဆေးဝါးသုံးစွဲနေစဉ် မူးယစ်ဆေးဝါးများနှင့်အတူ ဖမ်းဆီးရရှိ အောက်တိုဘာ ၂၆၊၂၀၂၆။ ရန်ကုန်တိုင်း တောင်ဥက္ကလာပမြို့နယ်၊ ၈ ရပ်ကွက်၊ စက်မှု ၆ လမ်းရှိ VIBE KTV & Entertainment တွင် အမျိုးသား ၂၃ ဦးနှင့် အမျိုးသမီး ၁၀ ဦး၊ စုစုပေါင်း ၃၃ ဦးကို စိတ်ပြောင်းဆေးဝါးများနှင့်အတူ ဖမ်းဆီးရမိခဲ့ပြီး ဖမ်းဆီးခံရသူများအနက် ပဲခူးတိုင်းဒေသကြီး အုတ်ဖိုမြို့နယ် တွဲဖက်မြို့နယ်တရားသူကြီး နွယ်နီမြင့်၊ ဖြူးမြို့နယ်တရားသူကြီး အိမ့်မှူးခင်၊ နေပြည်တော် အမှတ် ၂ တပ်မတော်သားဖွားမီးယပ်နှင့် ကလေးဆေးရုံတွင် တာဝန်ထမ်းဆောင်နေသည့် ဗိုလ်မှူး ထွန်းလင်းစိုးနှင့် ဗိုလ်ကြီး ကောင်းသန့်မင်းတို့ ပါဝင်ကြောင်း သိရှိရသည်။ အောက်တိုဘာ ၂၅ ရက် မနက် ၁၂ နာရီခွဲခန့်အချိန် မူးယစ်ဆေးဝါးတားဆီးနှိမ်နင်းရေးစီမံချက် Operation 42 အရ မူးယစ်ဆေးဝါးတားဆီးနှိမ်နင်းရေးတပ်ဖွဲ့များ၊ တောင်ဥက္ကလာပမြို့နယ် ရဲတပ်ဖွဲ့နှင့် ရပ်ကွက်အုပ်ချုပ်ရေးအဖွဲ့တို့က သက်သေများနှင့်အတူ မူးယစ်ဆေးဝါးသတင်းအရ VIBE KTV & Entertainment သို့ ဝင်ရောက်စီးနင်းရှာဖွေခဲ့ခြင်းဖြစ်သည်။ ရှာဖွေမှုအတွင်း KTV ဆိုင်အပေါ်ထပ်ရှိ Gentlemen အခန်းမှ အမျိုးသား ၇ ဦးနှင့် အမျိုးသမီး ၆ ဦးကို ကက်တမင်း ၁၂ ထုပ်၊ Happy Water ၂ ထုပ်၊ လက်ကိုင်ဖုန်း ၁၃ လုံးနှင့် DJ စက် ၁ လုံးတို့နှင့်အတူ တွေ့ရှိခဲ့သည်။ Tom & Jerry အခန်းတွင်လည်း အမျိုးသား ၄ ဦးကို ပလတ်စတစ်အိတ်ငယ်များဖြင့် ထုပ်ပိုးထားသည့် ဆေး ခြောက် ၂ ထုပ်၊ Happy Water ၂ ထုပ်၊ အက်တစီဆေးပြား ၁ ပြား၊ ကက်တမင်း ၁ ထုပ်၊ လက်ကိုင်ဖုန်း ၄ လုံးနှင့် DJ စက် ၁ လုံးတို့နှင့်အတူ ဖမ်းဆီးရမိခဲ့သည်။ ထို့အပြင် UFO အခန်းအတွင်းမှ အမျိုးသား ၉ ဦးနှင့် အမျိုးသမီး ၄ ဦးကို Happy Water ၁၀ ထုပ်၊ WY ဆေးပြား ၁၁၀ ပြား၊ လက်ကိုင်ဖုန်း ၁၃ လုံးနှင့် DJ စက် ၁ လုံးတို့နှင့်အတူ ဖမ်းဆီးရမိခဲ့သည်။ အဆိုပါဖြစ်စဉ်နှင့်ပတ်သက်၍ VIBE KTV ၏ ကိုယ်စားလှယ်တာဝန်ခံများဖြစ်သည့် ကောင်းမြတ်ဖြိုး၊ ကျော်ကျော်မိုးနှင့် လက်ထောက်မန်နေဂျာ စောသာကြည်တို့ ၃ ဦးကိုလည်း ဖမ်းဆီးထိန်းသိမ်းခဲ့သည်။ ဖမ်းဆီးရမိသူများအနက် Gentlemen အခန်းမှ နွယ်နီမြင့်သည် ပဲခူးတိုင်းဒေသကြီး၊ အုတ်ဖိုမြို့နယ် တွဲဖက်မြို့နယ်တရားသူကြီးဖြစ်ပြီး အိမ့်မှူးခင်မှာ ပဲခူးတိုင်းဒေသကြီး၊ ဖြူးမြို့နယ်တရားသူကြီးဖြစ်ကြောင်း စိစစ်တွေ့ရှိရသည်။ အလားတူ UFO အခန်းမှ ဖမ်းဆီးရမိသူများအနက် ထွန်းလင်းစိုးသည် နေပြည်တော် အမှတ် ၂ တပ်မ တော်သားဖွားမီးယပ်နှင့် ကလေးဆေးရုံ၊ ကုတင် ၂/၃၀၀ တွင် တာဝန်ထမ်းဆောင်နေသည့် ဗိုလ်မှူးအဆင့်ရှိ စစ်ဘက်အရာရှိတစ်ဦးဖြစ်ကြောင်း သိရသည်။ ဗိုလ်ကြီး ကောင်းသန့်မင်းမှာလည်း နေပြည်တော် အမှတ် ၂ တပ်မတော်သားဖွားမီးယပ်နှင့် ကလေးဆေးရုံတွင် တာဝန်ထမ်းဆောင်နေသည့် စစ်ဘက်အရာရှိတစ်ဦးဖြစ်ကြောင်း သိရှိရသည်။ ဖမ်းဆီးရမိသည့် အမျိုးသား ၂၃ ဦး၊ အမျိုးသမီး ၁၀ ဦး စုစုပေါင်း ၃၃ ဦးကို မူးယစ်ဆေးဝါးတားဆီးနှိမ်နင်းရေးတပ်ဖွဲ့ ရန်ကုန်သို့ ခေါ်ဆောင်စစ်ဆေးနေပြီး အမှုဖွင့်အရေးယူနိုင်ရေးနှင့် ဆက်စပ်ကွင်းဆက်တရားခံများကို ဆက်လက်ဖော်ထုတ်ဖမ်းဆီးနိုင်ရေးအတွက် ဆောင်ရွက်နေကြောင်း သိရသည်။ #fypppppppppppppppppppppppppppppppppppppppppppppppppppppppppppppppppppp # - @eagles0732