AR CULUS: DILKII DUL-QARNAYN OO DIB LOO BAARAYO — YAA KA DAMBEEYEY GEERIDIISA? QORAALKA HOOSE AQRI Majaaladda lagu magacaabo African Security Analysis, oo la sheegay inay falanqayso arrimaha sirdoonka iyo xogaha qarsoon, ayaa lagu sheegay inay soo bandhigtay warbixin baariseed oo ku saabsan dilkii Cabdiqani Axmed Diihaal, oo loo yaqaannay Dul-Qarnayn, kaas oo la sheegay in lagu dilay deegaanka Widhwidh bishii Luulyo 2024. Warbixinta la sheegay inay soo baxday ayaa la xiriirta duruufihii ku xeernaa geeridiisa iyo eedeymo culus oo u baahan in si madax-bannaan loo baaro. 🔴 EEDAYMAHA SIRDOONKA ITOOBIYA Baaris ay baahisay majalladda African Security Analysis (ASA) ayaa muujisay sheegashooyin la xiriirinaya hay’adda sirdoonka Itoobiya ee NISS dilka Cabdiqani Axmed Diihaal, oo loo yaqaannay “Dul-Qarnayn”. Dilkan ayaa ka dhacay deegaanka Widhwidh ee gobolka Togdheer bishii July ee sannadkii 2024. Warbixinta la faafiyay ayaa daaha ka qaadday faahfaahinta soo socota ee ku saabsan dilka iyo eedaymaha sirdoonka Itoobiya: ▪️ Hay’adda Fulisay: Baarista ayaa lagu sheegay in dilka ay ka danbeysay laanta sirdoonka dibadda ee Itoobiya oo loo yaqaanno Foreign Research and Studies (FRS), oo hoostagta Hay’adda Sirdoonka iyo Nabadsugidda Qaranka Itoobiya (NISS). ▪️ Sababta loo Ugaarsaday: Sida warbixinta lagu xusay, Dul-Qarnayn (oo ahaa 57-jir) waxaa loo beegsaday hadallo iyo muuqaallo uu ku baahin jiray baraha bulshada. Muuqaalladaas wuxuu si adag uga horimanayay sheegashada dowladda Itoobiya ee deegaannada Soomaalida, isagoo ku celcelin jiray in dhulkaas uu yahay mid Soomaaliyeed, isla markaana uga digayay Soomaalida wax uu ku tilmaamay qulqulka iyo saamaynta maamulka Addis Ababa. ▪️ Baacsigii ka Horreeyey Dilka: Warbixintu waxay sheegtay in sirdoonka Itoobiya ay ku raad-joogeen muddo 45 maalmood ah. Ka hor intaan la dilin, 12-kii July 2024, Dul-Qarnayn ayaa ashkato u gudbiyay saldhigga booliska ee magaalada Laascaanood, isagoo sheegay in 5 nin ay u hanjabeen isla markaana isku dayeen inay u sumeeyaan cunto iyo biyo, balse dacwaddiisa aan si dhab ah loo qaadan. ▪️ Goobta iyo Xilliga dilka: Ka dib markii uu ka soo cararay magaalada Laascaanood si uu naftiisa u badbaadiyo, raggaas ayaa daba-galay, waxaana lagu dilay magaalada Widhwidh 14-kii July 2024. Sheegashooyinkan ayaa si weyn ugu baahay baraha bulshada iyo aaladaha falanqeeya xogaha sirdoonka ee Geeska Afrika ka dib markii la soo saaray warbixintan oo sheegtay in baaristu ay qaadatay muddo ka badan laba sannadood. - @ustaadaliyare