Milli Məclisin deputatı Fazil Mustafa Bakıda kazino fəaliyyətinin insanların yaşayış məkanlarından uzaqda, təcrid olunmuş ərazilərdə təşkil edilməsinin vacib olduğunu deyib. Deputat bu barədə “Pravda. az”a açıqlamasında danışıb. Onun sözlərinə görə, kazino fəaliyyəti qanunvericiliklə tənzimlənsə də, bu sahə müəyyən sosial risklər yarada bilər: “Bu məsələ elə tənzimlənməlidir ki, insanların yaşayış məkanından daha uzaq yerdə gerçəkləşsin, insanlara hansısa narahatlıq yaradılmasın”. Deputat qeyd edib ki, kazino fəaliyyətini seçən sahibkarlar təhlükəsizlik məsələlərini də nəzərə almalıdırlar. “Kazino məsələsində ən vacib məqam budur ki, insanların həm maddi, həm də mənəvi aşınmasına gətirib çıxara biləcək proseslərə yol verilməsin. Çünki müəyyən riskləri də göz önünə almalıyıq”, - o deyib. Fazil Mustafa bildirib ki, bir sıra ölkələrdə kazinolar yaşayış məntəqələrindən kənarda fəaliyyət göstərir. “Belə olsa, daha yaxşı olar. Kazino hansısa bir adada, təcrid olunmuş məkanda olacaqsa, narahatlıq keçirməyə dəyməz. Adamlar kazinoya seçmə variantda gedəcəklər və əyləncələrini həyata keçirəcəklər. Qnunvericilikdə varsa, həyata keçirilməsi konkret sahibkarların haqqıdır. Buna görə də əngəlləməyə, yaxud narahatlıq keçirməyə dəyməz”, - deputat bildirib. O, qumarın bütün növlərinə qarşı olduğunu, lakin kazino fəaliyyətinin qanunvericilikdə nəzərdə tutulduğu halda onun həyata keçirilməsinin sahibkarların hüququ sayıldığını əlavə edib. Bakıda ilk “Royale Casino”nun 2027-ci ilin mayında açılması planlaşdırılır. Bu barədə “Sea Breeze” layihəsinin sahibi, prezidentin keçmiş kürəkəni Emin Ağalarov məlumat yayıb. Məlumata görə, Xəzər dənizində “Sea Breeze” ərazisində yaradılan süni yarımadada inşa olunan kompleksin sahəsi 90 min kvadratmetr olacaq. Azərbaycanda kazino oyunları 1998-ci ildə keçmiş prezident Heydər Əliyevin sərəncamı ilə qadağan olunub. 2024-cü il mayın 7-də qəbul edilən qanun süni torpaq sahələrində, o cümlədən kazino oyunlarının təşkili və keçirilməsinin əsaslarını müəyyən edir. Sonradan prezident kazino fəaliyyətinə icazə verən dəyişiklikləri təsdiqləyib. - @toplumtv